పెళ్లికి ముందు తీసుకునే జాగ్రత్తలు

0




marriage-couples-picజీవితంలో పెళ్లి అనేది అతి పెద్ద ముందడుగు. వివాహ బంధం అనేది జీవితాన్ని ఎంతగానో మార్చేస్తుంది. ఇప్పటి వరకూ ఒక్కరిగా బతికిన వాళ్ల కాస్తా.. పెళ్లయ్యాక ఒకరికి ఒకరుగా బతకాల్సి ఉంటుంది. భాగస్వామి కాబోయే వ్యక్తి గురించి బాగా తెలిసి ఉంటే మంచిది. విభిన్న కుటుంబ నేపథ్యాల నుంచి వచ్చిన వ్యక్తులు పెళ్లి చేసుకొని ఒక్కటయ్యే ముందు ఈ కింద పేర్కొన్న విషయాలను గురించి తెలుసుకోవాలి. ఈ విషయాలు వివాహ బంధం బలపడటానికి ఎంతగానో దోహదం చేస్తాయి.

* కాబోయే భాగస్వామి వివాదాల పట్ల ఎలా స్పందిస్తారో గమనించండి. ఏ విషయంలోనైనా తాను పట్టిన కుందేలుకు మూడే కాళ్లు తరహా వ్యవహార శైలిలో ఉండేవారితో జాగ్రత్తగా ఉండాలి. గొడవలు వచ్చిన సర్దుకుపోయే లక్షణం ఉందో లేదో గమనించండి. లేదంటే వివాహ బంధం క్లిష్టమవుతుంది.

* మీ కాబోయే భాగస్వామి కుటుంబ సభ్యులతోపాటు క్లోజ్ ఫ్రెండ్స్‌తో కూడా మాట్లాడుతుండండి. మీ ఇద్దరి మధ్య విబేధాలు తలెత్తినప్పుడు వారు సాయం చేసే వీలుంటుంది.

* పెళ్లయ్యాక చాలా మంది ఎదుర్కొనే సమస్య డబ్బు. కాబట్టి వివాహం చేసుకున్నాక ఆర్థికంగా ఎలాంటి సమస్యలు తలెత్తే అవకాశం ఉందో ఓ అంచనాకు రండి. కాబోయే భాగస్వామితోనూ ఈ విషయం చర్చించండి. ఆర్థికంగా క్లిష్ట పరిస్థితులు తలెత్తితే ఇద్దరూ ఎలా సర్దుకుపోవాలనే విషయంలోనూ ఓ అవగాహనకు వస్తే బెటర్.

* మీకేమైనా చెడు అలవాట్లు ఉంటే ముందుగానే చెప్పేయండి. ముందుగా ఐయామ్ ఏ గుడ్ పర్సన్ అని చెప్పి.. తర్వాత చెడు అలవాట్ల గురించి తెలిస్తే గొడవలు వచ్చే అవకాశాలు ఉంటాయి. పెళ్లయ్యాక మానేద్దాం అనుకోకుండా.. ముందే చెడు అలవాట్లకు గుడ్ బై చెబితే బెటర్.

* ఏదైనా తప్పు చేస్తే క్షమించమని అడగటం ఎలాగో తెలుసుకోండి. ఇద్దరూ పరస్పరం గౌరవం ఇచ్చిపుచ్చుకోండి. మీ గురించి అంత త్వరగా తప్పుడు అభిప్రాయం ఏర్పర్చుకునేందుకు అవకాశం ఇవ్వకండి.

* కొన్ని సందర్భాల్లో సర్దుకుపోవడం కుదరకపోవచ్చు. అలాంటప్పుడు మీరు వెనక్కి తగ్గకుండానే అలా ఎందుకు చేయాల్సి వచ్చిందో నెమ్మదిగా చెప్పేందుకు ప్రయత్నించండి. ఏ మాత్రం తేడాగా ప్రవర్తించిన వ్యవహారం బెడిసికొడుతుందని గుర్తుంచుకోండి.

* జీవితంలో ఎలా ఎదగాలని అనుకుంటున్నారో తెలుసుకోండి. వ్యక్తిగతంగా, ఇద్దరు కలిసి ఏ లక్ష్యాలను చేరుకోవాలని అనుకుంటున్నారో ఇప్పటి నుంచే అవగాహనకు రండి.

* కొన్ని సందర్భాల్లో ఇద్దరూ త్యాగాలు చేయాల్సి రావచ్చు. కాబట్టి వెనక్కి తగ్గాల్సి వచ్చినప్పుడు అది నా చిరకాల వాంఛ అంటూ గొడవలు పడే ఆస్కారం లేకుండా జాగ్రత్తపడండి.

* జీవితంలో సెక్స్ అనేదే ప్రధానం కాదు. కాకపోతే అది కూడా ముఖ్యమే కాబట్టి ఆ విషయం గురించి కూడా మాట్లాడుకోండి. ఇలాంటి విషయాలు అసలు మాట్లాడకుండా.. పెళ్లయ్యాక కాస్త బెరకుగా ఉండాల్సి వస్తుంది.

* ఇద్దరూ కలిసి బయటకు వెళ్లడానికి ప్లాన్ చేసుకోండి. అలా వెళ్లినప్పుడు మీ కాబోయే భాగస్వామి ఇష్టాయిష్టాల గురించి తెలుసకోవడానికి వీలవుతుంది.

* ఆరోగ్యం, ఇతర కుటుంబ సభ్యుల ఆలోచనలు, వ్యవహర శైలి గురించి కూడా ముందుగానే తెలుసుకోండి. వారికి నచ్చని, అనవసర విషయాల జోలికి వెళ్లి.. ఇబ్బందుల్లో పడకండి.