హత్య అని ముందే చెప్పలేదేం? రక్తపు మరకలు తుడిచారెందుకు? మానవత్వం లేదా?: బాబు

0

వైఎస్ వివేకానంద రెడ్డి హత్యపై ఆంధ్రప్రదేశ్ ముఖ్యమంత్రి చంద్రబాబు నాయుడు స్పందించారు. హార్ట్ ఎటాక్‌తో చనిపోయారని తొలుత చెప్పారు.. కానీ పోస్ట్ మార్టమ్ నివేదిక వచ్చాక అది హత్య అనే తేలింది. తలపై, శరీరంపై అంత పెద్ద గాయాలుంటే.. అది హత్య అని ఎందుకు చెప్పలేకపోయారు? ఇంట్లో రక్తపు మరకలను ఎందుకు శుభ్రం చేశారు? హార్ట్ అటాక్ అని ఎందుకు చెప్పారు? మృతదేహాన్ని బెడ్రూమ్ నుంచి బాత్రూమ్‌లోకి ఎవరు తీసుకెళ్లారు? అని చంద్రబాబు నాయుడు ప్రశ్నించారు.

హత్యను డ్రైవర్ మీద నెట్టేసే ప్రయత్నం చేస్తున్నారని బాబు చెప్పారు. ‘ఉదయం ఐదున్నరకు పీఏ వివేకానంద గది దగ్గరకు వెళ్లారు. తర్వాత పనిమనిషి వచ్చారు. వెనుక డోర్ తెరిచి ఉండటంతో అక్కడి నుంచి లోపలికి వెళ్లిన వారికి బాత్రూంలో ఆయన చనిపోయి ఉండటాన్ని గమనించారు. 6.40కి అవినాష్ రెడ్డి పోలీసులకు ఫోన్ చేశారు. వివేకానంద చనిపోయారని ఆయనకు ఎవరు చెప్పారు.

పోలీసులకు వివేకానంద చనిపోయారని చెప్పారేగానీ హత్య అని చెప్పలేదు. లా అండ్ ఆర్డర్ సమస్య ఉంటుంది రమ్మని కోరడంతో పోలీసులు అక్కడికి వెళ్లారు. హత్య జరిగితే శవాన్ని అక్కడి నుంచి కదిలించరు. పంచనామా కంటే ముందే శవాన్ని కదిలిస్తే ఫోరెన్సిక్ ఆధారాలు మాయమవుతాయి. బాత్రూంలో చనిపోయాడని చెప్పారు. కానీ మృతదేహాన్ని బెడ్రూంలోకి తీసుకొచ్చారు. తలకు గాయమైందని గుడ్డ కట్టారు. సీఐ అక్కడికి వెళ్లే లోపే రక్తపు మరకలు కడిగేశారు. తర్వాత డెడ్ బాడీని హాస్పిటల్‌కు తరలించార’ని చంద్రబాబు తెలిపారు.

మీ ఇంట్లో హత్య చేస్తే.. నామీద, పార్టీ మీద, లోకేష్ మీద ఆరోపణలు చేస్తున్నారు. మీరు వాస్తవాలు చెప్పకుండా.. మాపై ఆరోపణలు చేసి పబ్బం గడుపుకోవడం ఏంటని వైఎస్ఆర్సీపీ నేతలను చంద్రబాబు ప్రశ్నించారు.

‘హాస్పిటల్‌కు ముఖ్య నాయకులు, బంధువులు వెళ్లారు. అంత ముఖ్యమైన వ్యక్తి చనిపోతే.. అది హత్య అని ఎందుకు చెప్పలేకపోయారు? హార్ట్ ఎటాక్‌, హత్య మధ్య తేడా తెలీదా మీకు? డ్రైవర్ చంపారని లెటర్ ఇచ్చారు. ఇదంతా మిస్టరీగా ఉంది. ఈ కేసును ఎవరి మీదకు నెట్టడానికి ప్రయత్నిస్తున్నార’ని బాబు ప్రశ్నించారు.

‘అసాంఘిక చర్యలకు పాల్పడటం దుర్మార్గం. జరిగిన సంఘటనను తీవ్రంగా ఖండిస్తున్నాను. ఆయన్ను ఇంట్లోనే చంపడం వీళ్ల దౌర్జాన్యానికి పరాకాష్ట. కేసును క్షుణ్నంగా విచారించాలి. అనివార్య కారణాల వల్ల హాస్పిటల్‌కు తీసుకెళ్లి పోస్ట్ మార్టమ్ చేసేంత వరకు హత్య అని చెప్పకుండా దాచిపెట్టారు? ఇలా ఎందుకు చేశారో కుటుంబ సభ్యులు చెప్పాల’ని బాబు డిమాండ్ చేశారు.

‘హత్య అని తెలియగానే సిట్ వేశాం. దోషులను కఠినంగా శిక్షించాలని నిర్ణయించాం. దీని వెనకున్న రాజకీయాలేంటి? దేనికి చంపారు? బయటి వాళ్లు చంపితే వేరేలా ఉంటుంది. ఇంట్లో వాళ్లు చంపితేనే సాక్ష్యాలను మాయం చేయాలి. బయటి వాళ్లు చంపితే సాక్ష్యాలను చూపే ప్రయత్నం చేస్తారు. ఫోరెన్సిక్ ఆధారాలను ఎందుకు మాయం చేసే ప్రయత్నం చేశారు. హత్యను కూడా రాజకీయానికి వాడుకుంటారా?’ అని బాబు నిలదీశారు.

హార్ట్ అటాక్‌ వస్తే తల నుంచి రక్తం వస్తుందా? సీబీఐ విచారణ ఎందుకు కోరుతున్నారు? ఈలోగా ఎన్నికలు అయిపోతాయనా? పోలీసులు విచారణ జరపాలి. నేరాలు చేయడంలో దిట్టలైన వ్యక్తులు ఎలాంటి నేరాలు చేస్తారో ఇదే పరాకాష్ట. కుటుంబ సభ్యుడు చనిపోతే.. సాక్ష్యాలు లేకుండా చేయాలని చూడటం నేరం.

ఇలాంటి వ్యక్తులు రాజకీయాల్లో ఉండటం మన దౌర్భాగ్యం. రాజకీయాలను అడ్డం పెట్టుకొని నేరస్థులు ఎదురు దాడి చేస్తూ తప్పించుకోవాలని చూస్తుండటం బాధాకరమన్నారు. మీ చిన్నాన్న చనిపోతే కూడా కరుణ లేకపోతే.. హత్య జరిగితే మీకు బాధలేకపోతే ఎలా? ఈ హత్య పట్ల వైఎస్ఆర్సీపీ, జగన్ సమాధానం చెప్పాలని చంద్రబాబు డిమాండ్ చేశారు.

రాత్రి ఏం జరిగింది? ఈ హత్యతో ఎవరికి సంబంధం ఉందనేది తేలాల్సి ఉంది. టీడీపీ వాళ్లు ఉన్నారంటున్నారు. మీ ఇంట్లో హత్య జరిగితే ఆధారాలు ఎందుకు మాయం చేశారు. మర్డర్ జరిగాక రక్తం కడగడం ఎవరికి అవసరం? బాత్రూమ్‌లో నుంచి బెడ్రూంలోకి ఎవరు తీసుకొచ్చారు? హాస్పిటల్‌కి ఎవరు తీసుకెళ్లారు? మార్నింగ్ లేని లెటర్ సాయంత్రానికి ఎలా వచ్చింది? డ్రైవర్‌ను తొందరగా డ్యూటీకి రమ్మన్నాను. అతడికి కోపం వచ్చింది. నన్ను చచ్చేలా కొట్టాడు. డ్రైవర్ ప్రసాద్‌ను వదిలిపెట్టొద్దు. ఈ లెటర్ రాసేందుకు చాలా కష్టపడ్డాను’ అని వివేకానంద రెడ్డి రాసిన లేఖ పోలీసులకు కుటుంబ సభ్యులే ఇచ్చారని చంద్రబాబు తెలిపారు.




Please Read Disclaimer