కుప్పకూలిన ఫుట్ ఓవర్ బ్రిడ్జి.. ఐదుగురి మృతి

0

ముంబైలో తీవ్ర విషాదం చోటుచేసుకుంది. రైల్వే ఫుట్ ఓవర్ బ్రిడ్జ్ కుప్పకూలిన ఘటనలో ఐదుగురు వ్యక్తులు దుర్మరణం పాలయ్యారు. మరో 30 మందికి పైగా తీవ్రంగా గాయపడ్డారు. వీరిలో పలువురి పరిస్థితి విషమంగా ఉంది. ముంబైలోని అత్యంత రద్దీ ప్రాంతాల్లో ఒకటైన ఛత్రపతి శివాజీ మహరాజ్ టెర్మినల్ (సీఎస్‌టీ) సమీపంలో గురువారం (మార్చి 14) రాత్రి ఈ దుర్ఘటన చోటుచేసుకుంది. టైమ్స్ ఆఫ్ ఇండియా బిల్డింగ్, అంజుమన్ ఇస్లాం కాలేజీ సమీపంలో ఈ ప్రమాదం జరిగింది.

ఛత్రపతి శివాజీ మహరాజ్ టెర్మినల్ రైల్వే స్టేషన్ మొదటి నంబర్ ప్లాట్‌ఫాం నుంచి బీటీ లేన్‌ను కలిపే పాదచారుల వంతెన ఒక్కసారిగా కుప్పకూలింది. వంతెన కూలిన సమయంలో దానిపై ప్రయాణికులు కిక్కిరిసి ఉన్నట్లు ప్రత్యక్ష సాక్షులు చెప్పారు. ఈ ఘటనలో ఇద్దరు వ్యక్తులు అక్కడికక్కడే మృతి చెందగా.. మరో ముగ్గురు ఆస్పత్రిలో చికిత్స పొందుతూ ప్రాణాలు విడిచాడు.

క్షతగాత్రులను సమీపంలోని సెయింట్ జార్జ్ ఆస్పత్రికి తరలించి చికిత్స అందిస్తున్నారు. గాయపడిన వారి సంఖ్య ఎక్కువగా ఉండవచ్చని అధికారులు అంచనా వేస్తున్నారు. శిథిలాల కింద మరింత మంది ప్రయాణికులు చిక్కుకొని ఉండవచ్చని అధికారులు భావిస్తున్నారు. సహాయక చర్యలు కొనసాగుతున్నాయి.

మృతుల్లో ఇద్దరు మహిళలు ఉన్నారు. వీరిద్దరూ సెయింట్ జార్జ్ ఆస్పత్రిలో నర్సుగా పనిచేస్తున్నట్లు సమాచారం. వీరిలో అపూర్వ అనే నర్సు ఈ ఏడాదికి గానూ ‘ఉత్తమ నర్సు’గా అవార్డు అందుకున్నారు.

అత్యంత రద్దీ ప్రాంతంలో ప్రమాదం జరగడంతో ట్రాఫిక్ స్తంభించిపోయింది. వాహనదారులు ప్రత్యామ్నాయ మార్గాల్లో వెళ్లాలని అధికారులు సూచించారు..




Please Read Disclaimer