జనసేన ఎంపీ అభ్యర్థి, నంది పైపుల అధినేత ఎస్పీవై రెడ్డి కన్నుమూత

0

జనసేన ఎంపీ అభ్యర్థి, నంద్యాల సిట్టింగ్ ఎంపీ ఎస్పీవై రెడ్డి (69) కన్నుమూశారు. అనారోగ్యం కారణంగా మంగళవారం రాత్రి హైదరాబాద్ కేర్ హాస్పిటల్లో తుది శ్వాస విడిచారు. గుండె, కిడ్నీ సంబంధిత వ్యాధుల కారణంగా ఆయన మరణించారని హాస్పిటల్ వర్గాలు వెల్లడించాయి. ఏప్రిల్ 3న ఆయన హాస్పిటల్లో చేరగా.. అప్పటి నుంచి వెంటిలేటర్‌పై ఉంచి చికిత్స అందిస్తున్నారు. నంద్యాల సిట్టింగ్ ఎంపీగా ఉన్న ఎస్పీవై రెడ్డికి టీడీపీ టిక్కెట్ నిరాకరించడంతో.. ఇండిపెండెంట్‌గా పోటీ చేటీ చేసేందుకు సిద్ధపడ్డారు. కానీ జనసేన నుంచి ఆహ్వానం అందడంతో ఆయన పవన్ సమక్షంలో పార్టీలో చేరిన ఆయన జనసేన తరఫున ఎంపీగా పోటీ చేశారు.

ఎండలను సైతం లెక్కచేయకుండా ఆయన ఎన్నికల ప్రచారంలో పాల్గొన్నారు. ఎన్నికల ప్రచారంలో ఉండగానే ఆయనకు వడదెబ్బ తగిలింది. వయోభారం, ఇతర సమస్యలు తోడవడంతో ఆయన తీవ్ర అస్వస్థతకు గురయ్యారు. దీంతో కుటుంబ సభ్యులు ఆయన్నుహైదరాబాద్‌‌లోని కేర్ హాస్పిటల్‌లో చేర్పించారు.

నంద్యాల నంది పైపుల అధినేతగా సుపరిచితుడైన ఎస్పీవై రెడ్డి 2014 ఎన్నికల్లో వైసీపీ తరఫున గెలుపొందారు. అనంతరం ఆయన టీడీపీలో చేరారు. సామాజిక సేవా కార్యక్రమాలతో ఆయన నంద్యాల పరిసర ప్రాంతాల్లో మంచి పేరు సంపాదించారు. ఎంపీగా ఎన్నిక కాకముందు నుంచే ఎస్పీవై రెడ్డి అందరికి సుపరిచితులు. ఉచితంగా రైతులకు బోర్లు వేయించడం, బావులు తవ్వించడం, స్కూల్‌లో జరిగే క్రీడా పోటీల సమయంలో అన్నదానం చేయడం ద్వారా మంచి పేరు సంపాదించారు.

ప్రస్థానం ఇది..
ఎస్పీవై రెడ్డి పూర్తి పేరు ఎస్ పెద్ద ఎరికల రెడ్డి. ఆయన 1950 జూన్ 4న కడప జిల్లా అంకాలమ్మ గూడురులో జన్మించారు. ఎన్‌ఐటీ వరంగల్‌లో మెకానికల్ ఇంజినీరింగ్ పూర్తి చేశారు. బీజేపీతో ఆయన రాజకీయ ప్రస్థానాన్ని ప్రారంభించారు. 1991లో బీజేపీ తరఫున ఆయన నంద్యాల ఎంపీగా పోటీ చేశారు. 1999లో నంద్యాల, గిద్దలూరు అసెంబ్లీ స్థానాలకు ఇండిపెండెంట్‌గా పోటీ చేశారు. 2000లో కాంగ్రెస్ తరఫున నంద్యాల మున్సిపల్ చైర్మన్‌గా భారీ మెజార్టీతో గెలుపొందారు.

2004లో నంద్యాల ఎంపీగా పోటీ చేసిన ఆయన లక్ష మెజార్టీతో విజయం సాధించారు. 2009లోనూ తిరిగి ఎంపీగా ఎన్నికయ్యారు. 2014లో వైసీపీ తరఫున 1.08 లక్షల మెజార్టీతో గెలిచారు. కానీ ఎంపీగా ప్రమాణ స్వీకారానికి ముందే ఆయన టీడీపీలో చేరారు. ఇటీవలే ఆయన ఇంట్లో సీబీఐ సోదాలు చేపట్టింది.




Please Read Disclaimer