హరీశ్ రావు తిరుగుబాటు చేసే అవకాశాలున్నాయి, కుటుంబ సభ్యురాలిగా చెబుతున్నా: రమ్యారావు

0

టీఆర్ఎస్ పార్టీపై, కేసీఆర్‌పై హరీశ్ రావు తిరుగుబాటు చేసే అవకాశాలు ఉన్నాయని సోదరుడి కూతురు రమ్యారావు తెలిపారు. చావైనా బతుకైనా టీఆర్ఎస్‌తోనే అని హరీశ్ రావు అంటున్నప్పటికీ.. ఆయనను బయటకు పంపే అవకాశాలు ఉన్నాయని ఆమె చెప్పారు. కేసీఆర్ కుటుంబ సభ్యురాలిగా ఈ మాట చెబుతున్నానన్నారు. ఓ యూట్యూబ్ ఛానెల్‌కు ఇచ్చిన ఇంటర్వ్యూలో ఆమె ఈ వ్యాఖ్యలు చేశారు. తాను ఈ స్థితిలో ఉండటానికి కారణం మేనమామ కేసీఆర్ అని హరీశ్‌కు తెలుసు. కానీ గత కొంత కాలంగా తనను ఎందుకు పెట్టారు.. గతంలో తనకు న్యాయం చేసిన కేసీఆర్ ఇప్పుడు అన్యాయం ఎందుకు చేస్తున్నారని ఆయన ఆలోచిస్తుండొచ్చన్నారు. తనపై ఎవరైనా చాడీలు చెబుతున్నారేమో అనే ఆలోచనతోనూ హరీశ్ రావు ఓపికతో వ్యవహరిస్తుండొచ్చని ఆమె తెలిపారు.

ప్రస్తుతం పార్టీ కేవలం కేసీఆర్ చేతుల్లోనే లేదన్న రమ్యారావు.. హరీశ్ రావును పార్టీలో ఉంచుకుంటారా? లేదా అనేది టీఆర్ఎస్ నాయకుల చేతుల్లోనే ఉందన్నారు. కుటుంబం, టీఆర్ఎస్ పార్టీ బలంగా ఉండాలని హరీశ్ రావు కోరుకుంటారని ఆమె తెలిపారు. అభద్రతా భావంతోనే ఆయన్ను పక్కనబెడుతున్నారని ఆమె చెప్పారు. కేసీఆర్ నమ్మకాన్ని వమ్ము చేయకుండా హరీశ్ పని చేశాడన్నారు.

హరీశ్ రావు లాంటి నేత మంచి స్థానంలో ఉండాలని సిద్ధిపేట ప్రజలే కాకుండా తెలంగాణ ప్రజలు కూడా కోరుకుంటున్నారని రమ్య తెలిపారు. పార్టీ పుట్టక ముందే.. కేసీఆర్, కవిత లేనప్పుడే నేను, హరీశ్ కేసీఆర్‌కు అత్యంత సన్నిహితంగా మెలిగామన్నారు. గతంలో నాకు అన్యాయం జరిగింది, ఇప్పుడు హరీశ్‌కు జరుగుతోందని ఆమె చెప్పారు. కేసీఆర్ కావాలనే నాకు అన్యాయం చేయలేదన్న రమ్యా రావు.. అక్కడున్న వాళ్ల వల్లే ఈ పరిస్థితి తలెత్తిందన్నారు. అటెండర్ స్థాయికి కూడా సరిపడని వ్యక్తులకు రాజ్యసభ సభ్యత్వం ఇచ్చారని సంతోష్‌ను ఉద్దేశించి ఆమె పరోక్షంగా విమర్శలు గుప్పించారు. కొన్ని రకాల పరిస్థితుల్లోనే తాను బయటకు రావాల్సి వచ్చిందన్నారు.

పార్టీ పెట్టొదని సూచించిన కుటుంబ సభ్యులే పార్టీకి గుర్తింపు రావడంతో వచ్చి పార్టీలో చేరారని సంతోష్‌ కుమార్‌ను ఉద్దేశించి రమ్యారావు విమర్శలు చేశారు. సంతోష్ కుమార్ కల్వకుంట్ల ఫ్యామిలీ మెంబర్ ఎప్పటికీ కాదని, కేసీఆర్ భార్య ప్రోద్బలంతోనే ఆయన అడ్డదారిలో ఈ స్థాయికి వచ్చారన్నారు. ఆయన ఏ రోజూ ఉద్యమంలో పాల్గొనలేదన్నారు. రాజకీయాల్లో ఓనమాలు కూడా తెలియని, ఉద్యమం గురించి, పార్టీ గురించి అవగాహన వ్యక్తికి రాజ్యసభ సభ్యత్వం ఇవ్వడం దురదృష్టం అన్నారు.




Please Read Disclaimer