ఈవీఎం దొంగ‌లంటే భుజాలు త‌డుముకుంటారెందుకు: లోకేష్

0

ఏపీ ఎన్నికల తర్వాత ఈవీఎంల పనితీరుపై వివాదం రాజుకుంది. టీడీపీ అధినేత చంద్రబాబు.. ఢిల్లీ వేదికగా మళ్లీ పోరాటాన్ని మొదలు పెట్టారు. విపక్షాలతో కలిసి మరోసారి సుప్రీంకోర్టు మెట్లు ఎక్కేందుకు సిద్ధమయ్యారు. ఈ వ్యవహారంపై వైసీపీ, టీఆర్ఎస్‌ చంద్రబాబుపై మండిపడుతున్నాయి. ఎన్నికల్లో ఓటమిని తప్పించుకునేందుకు ఈవీఎంలను సాకుగా చూపే ప్రయత్నం చేస్తున్నారంటూ మాటల యుద్ధాన్ని మొదలు పెట్టింది. ఈ విమర్శలకు మంత్రి నారా లోకేష్ ట్విట్టర్‌లో కౌంటరిచ్చారు.

‘అప‌ర‌మేధావులూ.. ఈవీఎం దొంగ‌లంటే భుజాలు త‌డుముకుంటారెందుకు? ఏపీలో ఎన్నిక‌లు అస్త‌వ్య‌స్త నిర్వ‌హ‌ణ‌పై టీడీపీ పోరాటం మీకు చెల‌గాటంగా మారింది. ఈవీఎంలపై అనుమానాలంటే జ‌గ‌న్‌, @narendramodi,కేసీఆర్ ఎందుకు ఉలిక్కిపడుతున్నారు?’అంటూ ప్రశ్నించారు.

‘ప్ర‌మాదంలో ప్ర‌జాస్వామ్యం అంటూ బీజేపీ ఎంపీ పుస్తకం రాయొచ్చు. ఈవీఎంలు ట్యాంప‌రింగ్ చేయొచ్చ‌ని కేసీఆర్ మీడియాకి చెప్పొచ్చు. కానీ, 50శాతం వీవీప్యాట్‌లు లెక్కించాల‌ని టీడీపీ కోర‌కూడ‌దా? . చంద్ర‌బాబు ఐటీ- టెక్నాల‌జీకి మ‌ద్ద‌తు ఇస్తున్నార‌ని, ఈవీఎం వ్య‌వ‌స్థ లోపాలు స‌మ‌ర్థించాలా?’ అన్నారు.

‘తెలంగాణ‌లో ప‌నిచేసి, ఏపీలో మొరాయించిన ఈవీఎంల వెనుక కుట్ర‌ని ప్ర‌శ్నించ‌కూడ‌దా? .. టీడీపీ కంచుకోట‌ల్లాంటి ప్రాంతాల్లోనే ఈవీఎంలు ఎందుకు ప‌నిచేయ‌లేద‌ని అడ‌గ‌కూడ‌దా?’అంటూ ప్రశ్నించారు.

‘2010లోనే టీడీపీ ఈవీఎంలను ట్యాంపర్ చేయొచ్చని వెలుగులోకి తెచ్చింది. హరి ప్రసాద్ ఈవీఎంలలో అవకతవకలకు అవకాశం ఉందని నిరూపించారు. తప్పుడు కేసులతో ఆయన్ను ఇరికించారు.. కానీ టీడీపీ మాత్రం ఆయన వాదనల్లో నిజాలను గుర్తించి మద్దతుగా నిలిచింది. మళ్లీ ఏపీ ఎన్నికలు నిర్వహించడంలో ఈసీ ఘోరంగా విఫలమయ్యింది. అందుకే చంద్రబాబు మళ్లీ ఈవీఎంల పనితీరుపై విపక్షాలను ఒకే తాటిపైకి తీసుకొచ్చే ప్రయత్నాన్ని ప్రారంభించారు. ప్రధాని మోదీ వ్యవస్థల్ని ఎలా భ్రష్టు పట్టిస్తున్నారో దేశంలో ఉన్న ప్రజలకు తెలియజెప్పే ప్రయత్నం చేస్తున్నారు. గతంలో ఈవీఎంల పనితీరుపై అభ్యంతరాలు వ్యక్తం చేసిన కేసీఆర్ కూడా ఉన్నట్టుండి యూ టర్న్ తీసుకున్నారు. అలాగే జగన్ కూడా ఎన్నికల సంఘానికి ధన్యవాదాలు చెప్పారు. ఎందుకంటే మోదీ నుంచి అందిన సాయానికి’అంటూ సెటైర్లు పేల్చారు.




Please Read Disclaimer