చంద్రబాబు మళ్లీ సీఎం కావాలని చండీహోమం

0

ఇటీవల తెలంగాణ అసెంబ్లీ ఎన్నికల ముందు కేసీఆర్ రాజశ్యామల యాగాన్ని నిర్వహించిన విషయం తెలిసిందే. ఈ యాగం వల్లే టీఆర్ఎస్ విజయదుందుభి మోగించి, వరుసగా రెండోసారి అధికారంలోకి వచ్చారనే ప్రచారం సాగింది. తాజాగా, ఏపీలోనూ ఎన్నికలు జరుగుతుండటంతో వివిధ పార్టీలు యాగాలు, హోమాలకు సమాయత్తమవుతున్నాయి. చంద్రబాబు రెండోసారి మరోసారి టీడీపీ విజయం సాధించి, చంద్రబాబు మళ్లీ ముఖ్యమంత్రి కావాలని కోరుతూ కర్నూలులో చండీహోమం నిర్వహించారు. మూడు రోజులపాటు సాగిన ఈ హోమం శుక్రవారం పూర్ణాహుతితో ముగిసింది. కర్నూలు జిల్లా టీడీపీ నేతల ఆధ్యర్యంలో ఈ క్రతువు సాగింది. దీనిపై టీడీపీ నేతలు మాట్లాడుతూ.. రాష్ట్రం సుభిక్షంగా ఉండాలని, టీడీపీ తిరిగి అధికారంలోకి వచ్చి ముఖ్యమంత్రిగా చంద్రబాబు మళ్లీ బాధ్యతలు చేపట్టాలని కోరుతూ చండీహోమం నిర్వహించామని అన్నారు.

రాష్ట్రం అభివృద్ధి పథంలో పయనించేలా అనుగ్రహం ప్రసాదించాలని భగవంతుడిని, అమ్మవారిని ప్రార్థించినట్టు తెలిపారు. కర్నూలు నగరం గాయత్రీ ఎస్టేట్‌ విశ్వేశ్వరయ్య సర్కిల్‌ వద్ద జిల్లా టీడీపీ కార్యాలయంలో జరిగిన చండీహోమంలో రాజ్యసభ సభ్యుడు టీజీ వెంకటేష్‌, టీడీపీ జిల్లా అధ్యక్షుడు సోమిశెట్టి వెంకటేశ్వర్లు, ఎమ్మెల్సీలు కేఈ ప్రభాకర్‌, బీటీ నాయుడు ఇతరులు పాల్గొన్నారు. ఈ సందర్భంగా ఎంపీ టీజీ వెంకటేశ్ మాట్లాడుతూ.. టీడీపీ అధినేత చంద్రబాబు ప్రకటించే రెండో జాబితాలో తన కుమారుడు భరత్‌కు చోటు దక్కే అవకాశం ఉందని వ్యాఖ్యానించారు. ఎన్నికల సందర్భంగా ఎమ్మెల్యేలు, ఎంపీల గెలుపు కోసం టీడీపీ జిల్లా అధ్యక్షుడు హోమం నిర్వహించారని, తాను మాత్రం నా కొడుకు విజయం కోసం ప్రార్థించినట్టు తెలిపారు. పార్టీ కోసం విధేయుడిగా పనిచేస్తానని, నా తనయుడి విషయం వేరని ఆయన పేర్కొన్నారు.




Please Read Disclaimer