ఆర్టీజీఎస్‌ను టోనీ బ్లెయిర్ మెచ్చుకున్నారు: చంద్రబాబు

0

ఆర్టీజీఎస్ (రియల్ టైమ్ గవర్ననెన్స్ సొసైటీ) విధానం ప్రపంచంలో ఎక్కడా లేదని బ్రిటన్ మాజీ ప్రధాని టోనీ బ్లెయిర్ ప్రశంసించారని ఏపీ ముఖ్యమంత్రి చంద్రబాబు తెలిపారు. నేడు (జనవరి 7న) ఏపీ సచివాలయ సందర్శనకు వచ్చిన టోనీ బ్లెయిర్.. ఆర్టీజీఎస్‌ వ్యవస్థ పనితీరుపై ప్రతి విషయాన్ని అడిగి తెలుసుకోవడం చూస్తే మనం ఒక మంచిపని చేస్తే ప్రపంచమంతా తెలుస్తుందని అనిపిపించిందని పేర్కొన్నారు.

అంతకు ముందు అమరావతిలోని సచివాలయానికి విచ్చేసిన టోనీ బ్లెయిర్‌కు సీఎం చంద్రబాబు సాదర స్వాగతం పలికారు. రాష్ట్రంలో టీడీపీ ప్రభుత్వం చేపడుతున్న పథకాలను బ్లెయిర్‌కు వివరించగా ఆసక్తిగా విన్నట్లు చంద్రబాబు వరుసట్వీట్లు చేశారు. దేశంలోనే అభివృద్ధి చెందిన రాష్ట్రంగా ఏపీని తీర్చిదిద్దేందుకు తాము చేస్తున్న ప్రయత్నాలపై ప్రశంసలు కురిపించారని పేర్కొన్నారు. రాష్ట్రంలో ఏడు మిషన్లు ఏర్పాటుచేసి, వాటిని సాధించడానికి గ్రిడ్‌లు ఏర్పాటు చేశామని చంద్రబాబు వివరించారు.

విజన్‌ 2050ని రూపొందించామని, 2022నాటికి దేశంలో 3 అత్యుత్తమ రాష్ట్రాల్లో ఏపీ ఒకటిగా నిలవాలని లక్ష్యంగా పనిచేయడంపై టోనీ బ్లెయిర్ ప్రశంసించారని వివరించారు. ఆంధ్రప్రదేశ్‌లో జరుగుతున్న డాటా రివల్యూషన్ విధానం దేశానికి ఆదర్శంగా నిలవాలని ఆకాంక్షిస్తున్నట్లు చంద్రబాబు చెప్పారు.

ప్రతి ఇంటికీ 15 ఎంబీపీఎస్‌ స్పీడ్‌తో ఇంటర్నెట్ అందిస్తున్నామని చెప్పారు. ఫైబర్‌ గ్రిడ్‌ చాలా ఖర్చుతో కూడుకున్న ప్రాజెక్టు అని, ప్రత్యామ్నాయంగా విద్యుత్‌ స్తంభాలను వాడుకొని ఫైబర్‌ కేబుల్‌ వేశామని టోనీ బ్లెయిర్‌కు చంద్రబాబు వివరించారు.




Please Read Disclaimer