వేలంటైన్స్ డే ఎఫెక్ట్: పార్కుల్లో షీ టీమ్స్ నిఘా

0

ప్రేమికుల దినోత్సవం రోజున బయట జంటగా కనిపిస్తే పెళ్లి చేస్తామంటూ కొన్ని సంఘాల హెచ్చరికలతో హైదరాబాద్‌లోని షీ టీమ్స్ అప్రమత్తమయ్యాయి. యువత ఎక్కువగా సంచరించే ప్రాంతాల్లో షీ బృందాలు నిఘా ఏర్పాటు చేయనున్నాయి. గతంలో ప్రేమికుల దినోత్సవం రోజున కొన్ని పార్కుల్ని సంఘాలు మూసివేయించాయి. ఆరోజు కలిసి తిరిగిన జంటలకు పెళ్లిళ్లు చేసేందుకు ప్రయత్నించడం అప్పట్లో వివాదాస్పదమైంది.

ఇలాంటి ఘటనల దృష్ట్యా గురువారం హైదరాబాద్‌లో యువత సంచరించే ప్రాంతాల్లో పటిష్ఠ పర్యవేక్షణ చేపట్టాలని షీ బృందాలు నిర్ణయించాయి. ఇందిరాపార్క్‌, నెక్లెస్‌ రోడ్డు, పీపుల్స్‌ ప్లాజా, పబ్లిక్‌ గార్డెన్‌, బిర్లా టెంపుల్‌, మల్టీప్లెక్స్‌లు.. తదితర ప్రాంతాల్లో నిఘా ఉంచేందుకు సిద్ధమయ్యారు. షీ టీమ్స్ ఆయా ప్రాంతాల్లో సంచరిస్తూ ఎలాంటి అవాంఛనీయ సంఘటనలు జరగకుండా చర్యలు తీసుకుంటాయని, ఒకవేళ జంటల్ని ఎవరైనా బెదిరించేందుకు ప్రయత్నిస్తే అడ్డుకుంటామని హైదరాబాద్‌ షీ బృందం ఇన్‌ఛార్జ్ సి.నర్మద వెల్లడించారు.

రాత్రి సమయంలో కొన్ని ప్రత్యేక ప్రాంతాలతో పాటు ఐస్‌క్రీమ్‌ పార్లర్లు, పబ్‌లు, రెస్టారెంట్ల వద్ద నిఘా ఉంచనున్నట్లు పోలీసులు తెలిపారు. బంజారాహిల్స్‌, జూబ్లీహిల్స్‌ లాంటి ప్రాంతాల్లో ఇవి ఎక్కువగా ఉండటంతో అక్కడ గస్తీ పెంచామని పోలీస్‌ ఉన్నతాధికారులు తెలిపారు. వేలంటైన్స్ డే రోజు యువతీ యువకుల కదలికలపై తల్లిదండ్రులూ ఓ కన్నేయడం మంచిదని పోలీసులు చెబుతున్నారు.




Please Read Disclaimer