రాంగోపాల్ వర్మపై వంగవీటి రాధా పిటిషన్

0




RGV-In-vangaveetiవివాదాస్పద దర్శకుడు రామ్ గోపాల్ వర్మ పై హై కోర్టులో ఫిర్యాదులతో కూడిన పిటిషన్ ను దాఖలు చేశాడు రాజకీయ నేత వంగవీటి రాధ. ‘వంగవీటి’ సినిమా రూపకల్పన విషయంలో వర్మ తీరుపై రాధ అభ్యంతరం వ్యక్తం చేశారు. అభ్యంతరకరమైన రీతిలో సినిమాను రూపొందించారని ఆ సినిమా దర్శకుడు వర్మ, నిర్మాత దాసరి కిరణ్ కుమార్ లపై రాధ కోర్టుకు ఫిర్యాదు చేశారు. సినిమా ఆరంభంలో కల్పిత పాత్రలు.. అనే విషయాన్ని పేర్కొనలేదని, నిజజీవిత పాత్రలు అన్నట్టుగా.. తమ కుటుంబాన్ని ఉద్దేశించే వర్మ ఈ సినిమాను రూపొందించాడని రాధ పేర్కొన్నారు.

తమ కుటుంబం పరువుకు భంగం కలిగేలా సినిమా ఉందని, రాధ, రంగాలు రౌడీలు అన్నట్టుగా తన తల్లి రౌడీయిజాన్ని ప్రోత్సహించే వ్యక్తి అన్నట్టుగా చూపారని రాధ తన పిటిషన్ లో పేర్కొన్నారు. ఈ విషయంలో తాము సినిమా విడుదలకు ముందే అభ్యంతరాలు వ్యక్తం చేశామని.. అయినా వర్మ పట్టించుకోలేదని రాధ పిటిషన్ లో పేర్కొన్నారు.

‘వంగవీటి’ సినిమా విడుదల సమయంలో వంగవీటి కుటుంబం అభ్యంతరాలు వ్యక్తం చేయడం, ‘వంగవీటి’ సినిమా దర్శకనిర్మాతలతో చర్చలు జరపడం జరిగింది. అయితే అప్పట్లో వివాదం పరిష్కారం కాకుండానే సినిమా విడుదల అయ్యింది. ఈ సినిమా అంతగా ఆకట్టుకోలేకపోయినప్పటికీ.. ఇప్పుడు వంగవీటి రాధ పిటిషన్ తో మళ్లీ చర్చనీయాంశంగా మారింది.