నాస్తికత్వంపై రాజమౌళి క్లారిటీ

0



Rajamouliరాజమౌళి తన సినిమాల్లో దేవుడి గురించి గొప్పగా చూపిస్తుంటాడు. అది చూసి అతను పరమ భక్తుడేమో అనుకుంటాం. కానీ తాను నాస్తికుడిని అంటూ ఈ మధ్యే ఓ సంచలన విషయం చెప్పాడు రాజమౌళి. ఇది అందరికీ పెద్ద షాకే. ఐతే తాను గుడికే వెళ్ల‌న‌నేమీ కాద‌ని అంటున్నాడు రాజ‌మౌళి. గుడికి వెళ్తే ఒక‌ప్పుడున్న ప్ర‌శాంత‌త ఇప్పుడు లేద‌ని అంటున్నాడు జ‌క్క‌న్న‌. అలాగే తాను నాస్తికుడు కావ‌డానికి కార‌ణాలేంటో కూడా తాజాగా ఒక ఇంట‌ర్వ్యూలో అత‌ను వివ‌రించాడు. ఇంత‌కీ దేవుడు భ‌క్తి నాస్తిక‌త్వం గురించి రాజ‌మౌళి ఏమంటున్నాడంటే..

‘‘నాకు దేవుడంటే నమ్మకం లేదు.మన పని మనం చేసుకుంటూ కర్మయోగాన్ని పాటించాలంతే అన్న‌ది నా భావ‌న‌. హిందూ ధర్మం, హిందూ మతం వేరని తెలుసుకున్నా. హిందూ ధర్మంలో మనిషికి దానికి నాలుగు మార్గాలు సూచించారు. కర్మయోగం, భక్తియోగం, రాజయోగం, జ్ఞానయోగం. అందులో భక్తియోగంలో మాత్రమే దేవుడున్నాడు. మిగతావాటిలో దేవుడు లేడు. అంటే హిందూ ధర్మంలోనే నాస్తికత్వం ఉంది.

మా అమ్మా,నాన్నల‌కు దేవుడంటే చాలా నమ్మకముంది. మా నాన్నగారు ఏవో పద్ధతులు చెబుతుంటారు. నేను వినను. మా అమ్మ చెబితే చేస్తాను. కానీ ఆమె నాకు చెప్పదు. మా అమ్మ ఇప్పుడు లేదు ఆమె ఉన్న‌పుడు త‌న‌తో క‌లిసి చిన్న‌పుడు మంత్రాలయం వెళ్లేవాడిని. ఆమె పోయే ముందు న‌న్ను మంత్రాల‌యం తీసుకెళ్తుండమ‌ని మా ఆవిడ‌కు చెప్పింది. కాబట్టి అప్పుడ‌ప్పుడూ అక్క‌డికి వెళ్తుంటాను.

నా చిన్నపుడు మంత్రాలయం వెళ్తే తుంగభద్ర నదిలోకి వెళ్లి మునిగి… దేవుణ్ణి దర్శించుకుంటే హాయిగా ఉండేది. సంతోషంగా ఉండేది. ఇపుడు సెలబ్రిటీ స్టేల‌స్ వల్ల.. లోపల స్వామి వారి దగ్గరికి వెళ్లినా అక్కడా ఫొటోలు తీస్తున్నారు. ఇవన్నీ ఇబ్బందికరంగా ఉంటున్నాయి. నాకెందుకో గుళ్లు, భక్తి బిజినెస్‌ నచ్చదు.విషయమేంటంటే నాకు దేవుడు ఇష్టం లేదు కానీ గుడికెళ్లి కూర్చుంటా. పైగా ప్ర‌స్తుతం దేవాల‌యాల్లో అన్నీ బిజినెస్ అయిపోయాయి. ప్ర‌శాంత‌త ఉండ‌ట్లేదు’’ అన్నాడు రాజమౌళి.