త్వరలో శివాజీరాజా కొడుకు తెరంగేట్రం!

0



Sivaji-Raja-Sonప్రముఖ క్యారెక్టర్ ఆర్టిస్ట్, ‘మా’ అధ్యక్షుడు శివాజీరాజా తనయుడు విజయ్ త్వరలో టాలీవుడ్‌లో తెరంగేట్రం చేయబోతున్నాడు. నటుడిగా తనేంటో నిరూపించుకోవడానికి విజయ్ సిద్ధంగా ఉన్నాడట. ‘మావాడి గ్రాడ్యుయేషన్ పూర్తయింది. హైదరాబాద్‌లోని ఓ ప్రముఖ ఫిల్మ్ స్కూల్‌లో నటనలో శిక్షణ పొందాడు. విజయ్‌ని లాంచ్ చేయడానికి కొంత మంది దర్శకులు ఇప్పటికే నన్ను కలిశారు’ అని శివాజీరాజా చెప్పారు.

దర్శకులు చెప్పిన కథల్లో తనకు రెండు సబ్జెక్టులు నచ్చాయని, అయితే తన కొడుకును హడావుడిగా తెరంగేట్రం చేయించాలని అనుకోవడం లేదన్నారు. మంచి కథ దొరకగానే విజయ్‌ను తెరంగేట్రం చేయిస్తానని చెప్పారు. ఈలోగా తన కొడుకు నటనా నైపుణ్యాలను మరింత మెరుగుపరచాలని అనుకుంటున్నట్లు వెల్లడించారు. కాగా, 2011లో వచ్చిన ‘విరోధి’ సినిమాలో విజయ్ బాల నటుడిగా నటించాడు. ఈ సినిమా నంది అవార్డును సొంతం చేసుకుంది. రియల్ లైఫ్‌లో తండ్రీకొడుకులైన శివాజీరాజా-విజయ్‌లు రీల్ లైఫ్‌లోనూ అవే పాత్రల్లో నటించారు.

శివాజీరాజా తెలుగులో 300కి పైగా సినిమాల్లో నటించారు. ‘కళ్లు’ అనే సినిమా ద్వారా తెలుగు తెరకు పరిచయం అయ్యారు. మొదటి చిత్రంతోనే ఉత్తమ నూతన నటుడిగా నంది అవార్డు అందుకున్నారు. సముద్రం, ఘటోత్కచుడు, సిసింద్రీ, మావిచిగురు, పెళ్లిసందడి, ప్రేయసి రావే, కుర్రాళ్ల రాజ్యం, ఖడ్గం వంటి సినిమాలతో నటుడిగా మంచి గుర్తింపు తెచ్చుకున్నారు. ‘మొగుడ్స్ పెళ్లామ్స్’ సినిమా ద్వారా హీరో అవతారమెత్తారు. ఈ ఏడాది మార్చిలో మూవీ ఆర్టిస్ట్ అసోసియేషన్(మా) అధ్యక్షుడిగా శివాజీరాజా ఏకగ్రీవంగా ఎన్నికయ్యారు.