30 ఏళ్ల తర్వాత కాకినాడపై టీడీపీ జెండా

0



Kakinada-civic-pollsకాకినాడ కార్పొరేషన్ ఎన్నికల్లో తెలుగుదేశం పార్టీ విజయం దిశగా దూసుకుపోతోంది. దాదాపు 30 ఏళ్ల తర్వాత కాకినాడ మున్సిపల్ కార్పొరేషన్‌లో తెలుగుదేశం జెండా రెపరెపలాడుతోంది. టీడీపీ ఆవిర్భావం తర్వాత 1985లో జరిగిన కాకినాడ మునిసిపాలిటీ ఎన్నికల్లో ఆ పార్టీ విజయం సాధించింది. టీడీపీ తర్వాత జరిగిన తొలి ఎన్నికల్లో తప్పా ఆపై మరెన్నడూ ఇక్కడ టీడీపీ గెలవలేదు. ఇప్పటి వరకు కాంగ్రెస్ పార్టీయే కాకినాడను పాలిచింది. కాపుల రిజర్వేషన్‌ కోరుతూ రంగంలోకి దిగిన మాజీ మంత్రి ముద్రగడ పద్మనాభం ప్రభావం ఈ ఎన్నికపై ఏమాత్రం ప్రభావం చూపలేదు.

మళ్లీ ఇన్నేళ్ల తర్వాత కాకినాడ తమకు దక్కడంపై టీడీపీ నేతలు ఆనందోత్సాహాలతో ఉన్నారు. మొత్తం 48 డివిజన్లకు గానూ తెదేపా 29 స్థానాల్లో విజయం సాధించింది. వైకాపా కేవలం 9 డివిజన్లకే పరిమితమైంది. టీడీపీ మిత్ర పక్షం బీజేపీ 3 డివిజన్లలో, ఇండిపెండెంట్లు 3 చోట్ల గెలుపొందారు. మిగతా4చోట్ల ఫలితం వెలువడాల్సి ఉంది. సుదీర్ఘ కాలం పాటు కాంగ్రెస్ పాలనలో ఉన్న కాకినాడ కార్పొరేషన్ ఈ ఎన్నికల్లో టీడీపీ అభివృద్ధి నినాదానికి పట్టం కట్టింది. అత్యధిక స్థానాలో గెలుపొందిన టీడీపీ మేయర్ పీఠాన్ని దక్కించుకుంది. నంద్యాల ఉప ఎన్నికలో గెలిచి ఊపు మీదున్న టీడీపీ, కాకినాడలోనూ తన విజయ పరంపర కొనసాగించింది. కాకినాడ కార్పొరేషన్‌కు పన్నెండేళ్ల తర్వాత ఎన్నిక జరగడం గమనార్హం. 2005 ఎన్నికల్లో గెలిచి మేయర్ పీఠాన్ని దక్కించుకున్న కాంగ్రెస్ పాలన ముగిసిన తర్వాత ఎన్నిక వాయిదా పడుతూ వచ్చాయి.