ప్రముఖ సినీ నటుడు బోస్ కన్నుమూత

0

ప్రముఖ నటుడు పి.సుభాష్ చంద్రబోస్‌ అలియాస్ బోస్ కన్నుమూశారు. హైదరాబాద్‌లోని గాంధీ ఆసుపత్రిలో చికిత్స పొందుతూ బోస్ తుదిశ్వాస విడిచారు. నాలుగు రోజుల క్రితం కృష్ణానగర్‌లోని తన ఇంట్లో బోస్ ప్రమాదవశాత్తు జారిపడ్డారు. దీంతో ఆయన తలకు తీవ్ర గాయమైంది. వెంటనే ఆయణ్ని గాంధీ ఆసుపత్రిలో చేర్పించారు. నాలుగు రోజులపాటు మృత్యువుతో పోరాడిన బోస్ ఆదివారం మరణించారు.

చాలా సినిమాల్లో చిన్న చిన్న పాత్రలు చేసిన బోస్ తెలుగు ప్రేక్షకులకు సుపరిచితులే. ఆయన పేరు చాలా మందికి తెలియకపోవచ్చు కానీ, ఆయణ్ని చూస్తే కచ్చితంగా గుర్తుపడతారు. దర్శకులు పూరి జగన్నాథ్, కృష్ణవంశీ సినిమాల్లో బోస్ ఎక్కువగా నటించారు. రెండేళ్ల క్రితం ఆయన చివరిగా ఇచ్చిన ఓ ఇంటర్వ్యూలో తన సినీ ప్రస్థానం గురించి బోస్ చెప్పుకొచ్చారు. సుమన్ హీరోగా రవిరాజా పినిశెట్టి దర్శకత్వంలో 1990లో వచ్చిన ‘సాహసపుత్రుడు’ తన తొలి సినిమా అని బోస్ వెల్లడించారు. ఆ తరవాత ఈవీవీ సత్యనారాయణ ‘చెవిలో పువ్వు’లో నటించానన్నారు. హిందీలో చిరంజీవి హీరోగా రవిరాజా పినిశెట్టి తెరకెక్కించిన ‘ప్రతిబంధ్‌’ సినిమాలోనూ నటించారు. ఆ వెంటనే ‘కొదమ సింహం’లోనూ అవకాశం వచ్చిందన్నారు.

సురేష్ ప్రొడక్షన్స్‌ బ్యానర్‌పై వచ్చిన ‘ప్రేమఖైదీ’ సినిమాలో ప్రతినాయకుడి పాత్ర పోషించినట్లు బోస్ చెప్పారు. ఈవీవీ సత్యనారాయణ దర్శకుడిగా తానేంటో నిరూపించుకున్న సినిమా ఇది. ఈ సినిమాలో శారద కొడుకు పాత్రలో తాను నటించినట్లు బోస్ తెలిపారు. పూరి జగన్నాథ్ తనకు మొదటి నుంచి స్నేహితుడని, కృష్ణానగర్‌లో ఉన్నప్పుడు కలిసి టీ తాగేవాళ్లమని చెప్పారు. కృష్ణవంశీ ‘గులాబీ’ సినిమాలో తనకు అవకాశం ఇచ్చారని, అప్పటి నుంచి ఆయన ప్రతి సినిమాలో నటించానని వెల్లడించారు. అయితే ‘డేంజర్’ తరవాత కృష్ణవంశీ తనకు మళ్లీ అవకాశం ఇవ్వలేదన్నారు. కాగా, బోస్ పలు తెలుగు టీవీ సీరియళ్లలోనూ నటించారు.




Please Read Disclaimer