‘రౌడీ’ తెచ్చిన తంట.. పోలీసులకు విజయ్ దేవరకొండ క్షమాపణలు

0

సెన్సేషనల్ హీరో విజయ్ దేవరకొండ తనకు తాను రౌడీ అని పిలుచుకుంటారు. ఎప్పుడు స్టేజ్ ఎక్కినా ‘డియర్ రౌడీస్’ అంటూ తన అభిమానులకు పలకరిస్తుంటారు. ఇప్పుడు ‘రౌడీ’ అనేది విజయ్ అభిమానులకు ఒక బ్రాండ్. ఈ బ్రాండ్ నేమ్‌ను వారు ఎక్కడ బడితే అక్కడ రాసుకుంటున్నారు. అయితే, ఓ కుర్రాడు తన రాయల్ ఎన్‌ఫీల్డ్ బైక్ నంబర్ ప్లేట్‌పై ‘రౌడీ’ అని రాసుకోవడం విజయ్‌కు తలనొప్పిగా మారింది. నంబర్ ప్లేటుపై రిజిస్ట్రేషన్ నంబర్ లేకుండా కేవలం ‘రౌడీ’ అని రాసున్న మోటార్ సైకిల్‌కు హైదరాబాద్ ట్రాఫిక్ పోలీసులు చలానా రాశారు. అంతేకాకుండా ఆ బైక్ ఫొటోను తమ అధికారిక ట్విట్టర్ అకౌంట్‌లో పెట్టారు.

అయితే దీనిపై విజయ్ దేవరకొండ హుందాగా స్పందించారు. ఆ కుర్రాళ్ల బదులు తాను క్షమాపణలు చెబుతున్నానని ట్వీట్ చేశారు. తక్షణమే దీనిపై అందరిలోనూ చైతన్యం కలిగిస్తానని పేర్కొన్నారు.

ఆ తరవాత తన అభిమానులకు ఓ సందేశాన్ని ట్విట్టర్ ద్వారా విజయ్ పంపారు. ‘నా ప్రియాతిప్రియమైన అందరికీ, మీరు రౌడీ అని రాసుకోవడాన్ని నేను చూస్తే, వెంటనే మనమంతా ఒక కుటుంబం అని భావిస్తాను. అందుకే మన కుటుంబ సభ్యులందరికీ ఒక మాట చెబుతున్నాను, సమస్యల్లో చిక్కుకోకండి. కొన్ని నిబంధనలను మనం అనుసరించాలి. అవన్నీ మన మంచి కోసమే. నేను కూడా వాటిని అనుసరిస్తాను. మీ ప్రేమను ఎవరిమీదైనా చూపించుకోండి (కుటుంబం/స్నేహితుడు/దేవుడు), మీ బైక్‌లోని ఏ ఇతర పార్ట్ మీదైనా చూపించుకోండి. కానీ నంబర్ ప్లేట్ మీద మాత్రం కేవలం నంబర్లు మాత్రమే ఉంచండి. మీ రౌడీ కామ్రేడ్, విజయ్ దేవరకొండ’ అని విజయ్ ట్వీట్ చేశారు.




Please Read Disclaimer