బీఎస్ఎన్ఎల్ కస్టమర్లకు ఎయిర్‌టెల్, వొడాఫోన్, జియో సెగ!

0

ప్రభుత్వ రంగ టెలికం కంపెనీ బీఎస్ఎన్ఎల్ తాజాగా తన కస్టమర్లకు షాకిచ్చింది. టారిఫ్ ధరలను పెంచుతున్నట్లు ప్రకటించింది. డిసెంబర్ 1 నుంచి టారిఫ్ ధరల పెంపు నిర్ణయం అమలులోకి వస్తుందని పేర్కొంది. ఇప్పటికే భారతీ ఎయిర్‌టెల్, వొడాఫోన్ ఐడియా, రిలయన్స్ జియో వంటి కంపెనీలు కూడా టారిఫ్ ధరల పెంపును ప్రకటించిన విషయం తెలిసిందే.

సుప్రీం కోర్టు ఏజీఆర్ రూలింగ్‌ నేపథ్యంలో కంపెనీలు కొత్త ఇన్వెస్ట్‌మెంట్ల కోసం ఈ మేరకు ధరలు పెంచుతున్నాయి. మూడు నెలలలోగా కేంద్ర ప్రభుత్వానికి బకాయి ఉన్న మొత్తాన్ని చెల్లించాలని సుప్రీం కోర్టు తీర్పును వెలువరించింది. దీంతో టెలికం కంపెనీలు డిపార్ట్‌మెంట్ ఆఫ్ టెలికం (డాట్)కు ఏకంగా రూ.92,000 కోట్లు చెల్లించాల్సిన పరిస్థితి వచ్చింది.

ఈటీ రిపోర్ట్ ప్రకారం.. బీఎస్‌ఎన్ఎల్ డిసెంబర్ 1 నుంచి టారిఫ్ ధరలను సవరించనుంది. దీంతో వాయిస్, డేటా టారిఫ్ ధరలు పెరిగే ఛాన్స్ ఉంది. ఎయిర్‌టెల్, వొడాఫోన్ కంపెనీలు నిమిషాల వ్యవధిలో ఇటీవలనే టారిఫ్ ధరల పెంపును ప్రకటించాయి. ఒక రోజు తర్వాత రిలయన్స్ జియో కూడా ధరలు పెంచుతామని తెలిపింది. ఇప్పుడు బీఎస్‌ఎన్ఎల్ కూడా వీటి దారిలోనే నడుస్తోంది.

కాగా కేంద్ర ప్రభుత్వం ఇటీవలనే బీఎస్ఎన్ఎల్, ఎంటీఎన్ఎల్ కంపెనీల విలీనానికి పచ్చజెండా ఊపింది. బీఎస్‌ఎన్‌ఎల్, ఎంటీఎన్ఎల్ కంపెనీలను గట్టెక్కించడానికి దాదాపు రూ.70,000 కోట్లతో పునరుద్ధరణ ప్రణాళికను వెల్లడించింది. వచ్చే 3- 4 ఏళ్లలో కంపెనీలను లాభాల్లో నడిపించాలని మోదీ సర్కార్ భావిస్తోంది.

ఇందులో భాగంగానే బీఎస్ఎన్ఎల్, ఎంటీఎన్‌ఎల్ ఉద్యోగుల కోసం రూ.30,000 కోట్లతో వీఆర్ఎస్ ప్యాకేజ్‌ను ప్రకటించింది. 50 ఏళ్లకు పైన ఉన్న వారికే bsnl vrs వర్తిస్తుంది. వీఆర్ఎస్ ప్యాకేజ్‌ను ఎంచుకున్న వారికి కేంద్ర ప్రభుత్వం దాదాపు 10 ఏళ్ల వేతనాన్ని అడ్వాన్స్ రూపంలో ముందుగానే చెల్లిస్తుంది.




Please Read Disclaimer