చెమట పట్టినా, స్నానం చేసినా ఆమె చనిపోతుంది!

0

ఆమె కన్నీళ్లు కార్చకూడదు. చెమట పట్టేలా పనిచేయకూడదు. చివరికి స్నానం కూడా చేయకూడదు. నీళ్లు పడితే చాలు.. యాసిడ్ పడినట్లుగా ఆమె శరీరంపై బొబ్బలు ఏర్పడతాయి. ఒళ్లంతా దద్దుర్లతో ఎర్రగా మారిపోతుంది. పొరపాటున ఆమె స్విమ్మింగ్‌ పూల్‌లో దిగినా.. వర్షంలో తడిచినా.. ప్రాణాలు పోతాయి. ఎందుకంటే.. ఆమెకు ‘వాటర్ అలర్జీ’.

నీళ్లు తగిలితే నరకమే!

మీరు విన్నది నిజమే. ప్రపంచంలో చాలామందికి చాలా రకాల అలర్జీలు ఉంటాయి. కొందరు అరటి పండు అలర్జీ ఉంటే.. ఇంకొందరికి చీజ్ ఎలర్జీ ఉంటుంది. మరికొందరికి పండ్లు లేదా కూరగాయలు, మాంసాహారాల ఎలర్జీలు ఉంటాయి. పొరపాటు వారు వాటిని తాకినా, తిన్నా ప్రాణాలకే ప్రమాదం. ఇదే తరహాలో తెస్సా హాన్సెన్ స్మిత్ అనే 21 ఏళ్ల యువతి ‘ఆక్వాజెనిక్ ఆర్టికేరియా’ అనే అలర్జీతో బాధపడుతోంది.

Also Read: కుక్క నాకడంతో ప్రాణాలు కోల్పోయిన యజమాని.. ఘటనపై షాకింగ్ వాస్తవాలు!

చర్మం బొబ్బలెక్కతుంది

ఆమె పొరపాటున నీటిని తాకితే వెంటనే జ్వరం వస్తుంది. నీళ్లు తగిలిగిన ప్రాంతంలో చర్మం బొబ్బలెక్కుతుంది. చెమట పట్టినా ఆమెకు ఇదే పరిస్థితి ఏర్పడుతుంది. అందుకే, ఆమె ఆటలు ఆడటం మానేసింది. ఎక్కువగా నడవడానికి కూడా భయపడుతుంది. దీంతో తన యూనివర్శీటీ క్యాంపస్‌లో కూడా కారులోనే తిరుగుతుంది.

నెలకు రెండు సార్లే స్నానం

ఈ అలర్జీ వల్ల నెలకు కేవలం రెండు సార్లే స్నానం చేసే సాహసం చేస్తుంది. అది కూడా భయం భయంగా. తాను ఎదుర్కొంటున్న సమస్యలపై తెస్సా మాట్లాడుతూ.. ‘‘కన్నీళ్లు కూడా కార్చలేని పరిస్థితి నాది. చెమటపట్టినా సరే నాకు జ్వరం వచ్చేస్తుంది. నీటి శాతం ఎక్కువగా ఉన్న పండ్లు లేదా ఆహారాన్ని తిన్నా.. నా నోరు పుండులా మారిపోతుంది. నీళ్లు తాగితే నా నాలుకపై పుండ్లు వస్తాయి’’ అని తెలిపింది.

ఎనిమిదేళ్ల వయస్సులో..

‘‘నాకు ఎనిమిదేళ్ల వయస్సు ఉన్నప్పుడు ఈ విషయం తెలిసింది. అయితే, అది నీటి వల్ల వస్తుందని అనుకోలేదు. సబ్బు, షాంపూలు లేదా ఆహారం వల్ల అలర్జీ వస్తుందని నా తల్లిదండ్రులు భావించేవారు. పదేళ్ల వయస్సు వచ్చాక వైద్యులు చికిత్స అందించడం మొదలు పెట్టారు. చెప్పాలంటే నేను చాలా లక్కీ. అమ్మా నాన్న.. ఇద్దరూ డాక్టర్లే’’ అని తెలిపింది.

రోజుకు 9 రకాల మాత్రలు

వాస్తవానికి నీటితో అలర్జీ వస్తుందని ఎవరూ భావించలేరు. చాలామంది శుభ్రంగా ఉండకపోతేనే అలర్జీ వస్తుందని భావిస్తారు. ఆమె తల్లిదండ్రులు కూడా మొదట్లో అదే అనుకున్నారు. ఆమె స్నానానికి వాడుతున్న సబ్బులు, షాంపూలు మార్చి చూశారు. చివరికి వైద్య పరీక్షల్లో ఆమెకు ‘ఆక్వాజెనిక్ ఆర్టికేరియా’ ఉందని తెలుసుకుని షాకయ్యారు. ఈ వ్యాధి నివారణ కోసం ఆమె రోజుకు 9 రకాల మాత్రలు మింగుతుంది. ప్రపంచంలో 100 కంటే తక్కువ మందికి మాత్రమే ఈ సమస్య ఉన్నట్లు వైద్యులు తెలుపుతున్నారు.

Photos Credit: tess.hs and @livingwaterless/Instagram




Please Read Disclaimer