హీటెక్కిన అమరావతి పోరు.. ఆ వైసీపీ ఎంపీ చుట్టూ రాజకీయం

0

రాజధాని అమరావతిలో రాజకీయం వేడెక్కింది. నెలల తరబడి రైతుల చేస్తున్న ఆందోళనలతో రాజధాని గ్రామాల్లో రోజురోజుకూ పోరు తారాస్థాయికి చేరుకుంటోంది. ఆయా గ్రామాల్లో అధికార వైఎస్సార్ కాంగ్రెస్ పార్టీ నాయకులు కనిసిస్తే చాలు.. వివాదం ముదురుతోంది. ఇటీవలే వైసీపీ ఎమ్మెల్యేలు ఆర్కే రోజా, ఉండవల్లి శ్రీదేవి సహా పలువురు నాయకులు రాజధాని రైతుల నిరసన సెగలు ఎదుర్కోగా.. తాజాగా, బాపట్ల వైసీపీ ఎంపీ నందిగం సురేష్‌కు సైతం తప్పలేదు. అయితే ఎంపీ నందిగం విషయంలో మాత్రం వివాదాస్పదమైంది. అమరావతి జేఏసీ ముసుగులో టీడీపీ కార్యకర్తలు తనపై దాడి చేశారని నందిగం సురేష్ చెబుతుండగా.. ఎంపీ అనుచరులే తమపై దాడికి దిగినట్లు ఆ ప్రాంత మహిళలు ఆరోపిస్తున్నారు.

ఆదివారం అసలేం జరిగిందంటే..

అమరావతిలో ఆదివారం జరిగిన రథమహోత్సవంలో పాల్గొన్న ఎంపీ నందిగం సురేష్‌ అనంతరం రోడ్డు మార్గంలో గుంటూరుకు బయల్దేరారు. ఈ క్రమంలో లేమల్లె గ్రామంలో ఎంపీకి నిరసన సెగ తగిలింది. జై అమరావతి అంటూ నందిగం సురేష్‌ కాన్వాయ్‌ను అడ్డుకున్నారు. అయితే అమరావతి జేఏసీ ముసుగులో తమపై టీడీపీ కార్యకర్తలు దాడికి పాల్పడ్డారని ఎంపీ నందిగం సురేష్ ఆరోపించారు. మహిళలను ముందుపెట్టి టీడీపీ నాయకులు ఈ దాడి చేయించారని విమర్శించారు.

పథకం ప్రకారమే మాపై దాడి: నందిగం సురేష్‌

పథకం ప్రకారమే టీడీపీ నేతలు తమపై దాడి చేశారని బాపట్ల ఎంపీ నందిగం సురేష్‌ ఆరోపించారు. అమరావతి రైతుల ముసుగులో టీడీపీ నేతలు దాడులకు పాల్పడుతున్నారని మండిపడ్డారు. ముఖ్యమంత్రి వైఎస్‌ జగన్‌మోహన్‌రెడ్డి పాలన చూసి ఓర్చుకోలేకనే చంద్రబాబు అండ్‌ కో కుట్రలు చేస్తున్నారని విమర్శించారు. ప్రజా ప్రతినిధులపైనే దాడులు చేస్తే ఇక సామాన్యుల పరిస్థితి ఏంటని ఆవేదన వ్యక్తం చేశారు. ఇలాంటి దాడులు చేసే వారిపై కఠిన చర్యలు తీసుకోవాలని పోలీసులకు విజ్ఞప్తి చేశారు.

ఖండించిన మాదిగ కార్పొరేషన్‌ చైర్మన్‌

ఎంపీ నందిగం సురేష్‌పై జరిగిన దాడి అమానుషమంటూ మాదిగ కార్పొరేషన్‌ చైర్మన్‌ కొమ్మూరి కనకరావు ఖండించారు. ఆయన మీడియాతో మాట్లాడుతూ.. ఉద్దేశపూర్వకంగానే ఎంపీ సురేష్‌పై దాడి చేశారని ఆయన మండిపడ్డారు. చంద్రబాబుకు దళితులంటే చిన్నచూపు అని ధ్వజమెత్తారు. నందిగం సురేష్‌పై జరిగిన దాడి చంద్రబాబు నీచ రాజకీయాలకు పరాకాష్ట అని వ్యాఖ్యానించారు. చంద్రబాబు చేస్తున్న ఉద్యమానికి ప్రజల మద్దతు లేకపోవడంతోనే టీడీపీ మహిళా నేతలతో దాడులు చేయిస్తున్నారని కనకరావు విమర్శించారు..

‘ఎంపీ సురేష్ అనుచరులే దాడి’

ఇదిలా ఉంటే, వైసీపీ ఎంపీ నందిగం సురేష్ అనుచరులే తాము ప్రయాణిస్తున్న బస్సుపై దాడి చేశారని అమరావతి జేఏసీ మహిళా నేతలు ఆరోపించారు. ఎంపీ సురేష్ అనుచరులే తమపై దాడి చేశారని, వారిని కఠినంగా శిక్షించాలని డిమాండ్ చేస్తున్నారు. ఈ మేరకు అమరావతి పోలీస్ స్టేషన్ వద్దకు చేరుకున్న మహిళలు ఫిర్యాదు చేశారు. మహిళలకు టీడీపీ ఎంపీ గల్లా జయదేవ్ మద్దతు ప్రకటించారు. ఎంపీ సురేష్ తమను దుర్భాషలాడారని మహిళలు ఆరోపించారు.

ఇటీవల ఎంపీని అడ్డగించిన టీఎన్ఎస్ఎఫ్ నేతలు

ఎంపీ నందిగం సురేశ్‌ను టీఎన్ఎస్ఎఫ్ నాయకులు అడ్డుకున్నారు. తన సొంత పనిపై కృష్ణా జిల్లా నందిగామకు వచ్చిన ఎంపీ సురేశ్ వాహనాన్ని అడ్డుకున్నారు. రాజధాని అమరావతికి మద్దతు తెలపాలని డిమాండ్ చేశారు. జై అమరావతి అంటూ నినాదాలు చేశారు. దీంతో వీరు తనపై దాడికి యత్నించారంటూ సురేష్ పోలీసులకు ఫిర్యాదు చేశారు. దీంతో 14 మంది టీఎన్ఎస్ఎఫ్ కార్యకర్తలను పోలీసులు అరెస్టు చేశారు. రెండు వారాల తర్వాత వీరు బెయిల్‌పై విడుదల కాగా, టీడీపీ ప్రధాన కార్యదర్శి నారా లోకేశ్ స్వాగతం పలికారు.




Please Read Disclaimer


30రూ|| మాస్క్ కేవలం 2రూ|| కే తయారు చేసుకోండి Make your own mask for Just Rs.2/-