వివాదం రాజేసిన అంబటి రాయుడి ట్వీట్..!

0

హైదరాబాద్ క్రికెట్ అసోషియేషన్(హెచ్‌సీఏ)లో అవినీతి పెరిగిపోయిందంటూ మంత్రి కేటీఆర్‌కి తాజాగా క్రికెటర్ అంబటి రాయుడు ఫిర్యాదు చేశాడు. వన్డే ప్రపంచకప్ సమయంలో రిటైర్మెంట్ ప్రకటించి.. కొద్దిరోజుల వ్యవధిలోనే వీడ్కోలు నిర్ణయంపై మళ్లీ వెనక్కి తగ్గిన అంబటి రాయుడు ఇటీవల దేశవాళీ టోర్నీల్లో హైదరాబాద్ కెప్టెన్‌గా ఆడాడు. కానీ.. వచ్చే ఏడాది మాత్రం హైదరాబాద్ తరఫున రంజీలు ఆడబోనని ఇప్పటికే ప్రకటించిన రాయుడు.. హెచ్‌సీఏలో పెరిగిపోయిన అవినీతే అందుకు కారణమని చెప్పుకొచ్చాడు.

హైదరాబాద్ జట్టు ఆశించిన మేర రాణించలేకపోవడానికి కారణం హెచ్‌సీఏలో అవినీతి పెరిగిపోవడమేనని కేటీఆర్‌కి చేసిన ట్వీట్‌లో రాసుకొచ్చిన అంబటి రాయడు.. అసోషియేషన్‌లో అక్రమాలకి పాల్పడుతున్న వారిపై ఇప్పటికే ఏసీబీ కేసులు ఉండటాన్ని గుర్తుచేశాడు. అయినప్పటికీ వారికే అసోషియేషన్‌లో పట్టం కడుతున్నారని ఈ సీనియర్ క్రికెటర్ ఆవేదన వ్యక్తం చేశాడు. అయితే.. అంబటి రాయుడు ట్వీట్‌పై కేటీఆర్‌ ఇంకా స్పందించలేదు. కానీ.. హెచ్‌సీఏలో చర్చ మొదలైంది.

రిటైర్మెంట్ నిర్ణయం వెనక్కి తీసుకోగానే.. హైదరాబాద్‌ జట్టు పగ్గాలు రాయుడి చేతికి వచ్చాయి. దీంతో దేశవాళీ టోర్నీలు విజయ్ హజారే, సయ్యద్ ముస్తాక్ అలీ ట్రోఫీల్లో అతను జట్టుని ముందుండి నడిపించాడు. కానీ.. జట్టులోని రాజకీయాలు ప్రదర్శనని దెబ్బతీస్తున్నాయని ఆరోపిస్తున్న రాయుడు.. టీమ్‌కే దూరంగా ఉండాలని నిర్ణయించుకున్నట్లు తెలుస్తోంది.

దేశవాళీ టోర్నీలో హైదరాబాద్‌కి ఆడటం ద్వారా ఫామ్ అందుకుని మళ్లీ టీమిండియాలోకి పునరాగమనం చేయాలని రెండు నెలల క్రితం రాయుడు ఆశించాడు. కానీ.. విజయ్ హజారే, ముస్తాక్ అలీ ట్రోఫీలో అతను భారత సెలక్టర్లని మెప్పించే ఇన్నింగ్స్ ఒక్కటీ ఆడలేకపోయాడు. దీంతో.. హైదరాబాద్‌ టీమ్‌కి దూరంగా ఉండి వచ్చే ఏడాది ఏప్రిల్‌లో జరగనున్న ఐపీఎల్ 2020పై అతను దృష్టి సారించబోతున్నట్లు తెలుస్తోంది.




Please Read Disclaimer