రూపాయికే ఇడ్లీ.. ఆ బామ్మకు ఆనంద్ మహీంద్ర బంపర్ ఆఫర్!

0

రూపాయికే ఇడ్లీలు విక్రయిస్తూ.. పేదల కడుపు నింపుతున్న బామ్మగారు గుర్తున్నారా? తమిళనాడులోని వడివేలంపాల్యంలో నివసిస్తున్న కె.కమలతాల్ 30 ఏళ్ల నుంచి ఇడ్లీలు అమ్ముతోంది. 80 ఏళ్ల వయస్సులోనూ ఉదయాన్నే నిద్రలేచి, పిండి రుబ్బి ఇడ్లీల తయారీలో నిమగ్నమయ్యే ఈ బామ్మగారి లైఫ్‌స్టైల్ సోషల్ మీడియాలో వైరల్‌గా మారింది.

ఈ సమాచారం మహీంద్ర గ్రూప్ ఛైర్మన్ ఆనంద్ మహీంద్రకు కూడా చేరింది. ముదిమి వయస్సులోనూ కష్టపడి వ్యాపారం చేస్తున్న ఆ బామ్మగారిని చూసి ఆయన ఆశ్చర్యపోయారు. కట్టెల పొయ్యిపైనే ఆమె ఇడ్లీలు వేస్తున్న ఆమెకు సాయం చేయడానికి ముందుకొచ్చారు. ఈ సందర్భంగా ఆయన కమలతాల్ వీడియోను ట్వీట్ చేశారు.

‘‘మనలను ఆశ్చర్యానికి గురిచేసే అద్భుత గాథల్లో ఇది కూడా ఒకటి. కమలతాల్ వంటి వారికి కొంత సాయం చేసినా.. ఎంతో మందికి మంచి జరుగుతోంది. ఆ బామ్మ ఇప్పటికీ కట్టెల పొయ్యే వాడుతున్నారు. మీకు ఎవరికైనా ఆమె తెలిస్తే నాకు చెప్పండి. నేను ఆమె వ్యాపారంలో పెట్టుబడి పెడతా. గ్యాస్ స్టవ్ కొనిస్తా’’ అని ట్విట్టర్ ద్వారా పేర్కొన్నారు.

స్పందించిన ఇండియన్ ఆయిల్: ఆనంద్ మహీంద్ర ట్వీట్‌పై ‘ఇండియన్ ఆయిల్’ సంస్థ కూడా స్పందించింది. ‘‘సరిగ్గా చెప్పారు. ఇండియన్ ఆయిల్ దేశానికి ఏ స్ఫూర్తితో సేవలను అందిస్తుందో.. ఆమె కూడా ఆవిధంగానే సమాజ సేవ చేస్తోంది. అలాంటి వారికి మా మద్దతు ఉంటుంది. ఆ అవ్వకు ఎల్పీజీ సిలిండర్, గ్యాస్ స్టవ్, రెగ్యులేటర్ అందిస్తాం’’ అని తెలిపింది.




Please Read Disclaimer