హైదరాబాద్ నుంచి ఏపీ వచ్చే వారికి అనుమతి, కానీ.. దిమ్మతిరిగే కండీషన్లు..

0

>

హైదరాబాద్ నుంచి రాష్ట్రానికి వచ్చే వారికి ఏపీ అనుమతిచ్చింది. దీంతో తెలంగాణ, ఏపీ సరిహద్దుల్లో అవస్థలు పడుతున్న విద్యార్థులు, యువతకు ఊరట లభించినట్లయింది. హైదరాబాద్‌లోని హాస్టళ్లు, పేయింగ్ గెస్ట్ (పీజీ)లు మూసివేయడంతో విద్యార్థులు, యువతీ యువకులు ఆందోళన వ్యక్తం చేసిన విషయం తెలిసిందే. దీంతో వారికి తమ స్వగ్రామాలకు వెళ్లేందుకు హైదరాబాద్ పోలీసులు ప్రత్యేక పాస్‌లు జారీ చేశారు. వాటితో బయల్దేరిన వారిని ఏపీ పోలీసులు అడ్డుకున్నారు. రాష్ట్రంలోకి రావడానికి వీల్లేదని స్పష్టం చేశారు. దీంతో గంటల తరబడి ఉద్రిక్త పరిస్థితులు నెలకొన్నాయి. చివరకు ఇప్పటి వరకు బోర్డర్‌లో ఉన్న వారిని మాత్రమే అనుమతించాలని ఏపీ ప్రభుత్వం నిర్ణయించింది. ఈ మేరకు ఇరు రాష్ట్రాల ముఖ్యమంత్రులు వైఎస్ జగన్మోహన్‌రెడ్డి, కేసీఆర్ మధ్య సంప్రదింపులు జరిగినట్లు తెలుస్తోంది. అనంతరం ప్రస్తుతానికి బోర్డర్‌లో ఉన్న వారిని మాత్రమే రాష్ట్రంలోకి అనుమతించాలని నిర్ణయించింది. ఇందుకోసం ఏపీ ప్రభుత్వం ప్రత్యేక బస్సులు ఏర్పాటు చేస్తున్నట్లు తెలిసింది.

అంతకు ముందు హైడ్రామా

అంతకు ముందు హైదరాబాద్‌లో హాస్టళ్లు, మెస్‌ల మూసివేత, ఏపీ విద్యార్థుల అగచాట్ల అంశాన్ని తెలంగాణ ప్రభుత్వం దృష్టికి ఆంధ్రప్రదేశ్‌ ప్రభుత్వం తీసుకెళ్లింది. తెలంగాణ ఐటీ పురపాలక శాఖ మంత్రి కేటీఆర్‌తో ఏపీ పురపాలక, పట్టణాభివృద్ధి శాఖ మంత్రి బొత్స సత్యనారాయణ ఫోన్‌లో మాట్లాడారు. హాస్టళ్ల నుంచి ఖాళీ చేయించడంతో వారికి రవాణా పరమైన ఇబ్బందులు వస్తాయని, అంతేకాకుండా కరోనా విజృంభిస్తున్న వేళ ఒక చోట నుంచి ఇంకో చోటకు కదలడం శ్రేయస్కరం కాదని కేటీఆర్‌ దృష్టికి మంత్రి బొత్స తీసుకెళ్లారు. ఇక ఇదే విషయంపై తెలంగాణ సీఎస్‌ సోమేష్‌ కుమార్‌తో ఏపీ సీఎస్‌ నీలం సాహ్ని మాట్లాడారు. ప్రత్యేకంగా పోలీసులు పాసులు ఇస్తున్న ఘటనలను కూడా తమ దృష్టికి వచ్చిందని సోమేష్‌ కుమార్‌ వద్ద నీలం సాహ్ని ప్రస్తావించారు.

సమస్యలు ఉంటే 1902కు కాల్‌ చేయ్యండి

అలాగే హైదరాబాద్‌లో ఉంటున్న ఏపీ విద్యార్థులు, ప్రైవేటు సంస్థల్లో పనిచేస్తున్న వారు ఎక్కడి వారు అక్కడే ఉండాలని ఆంధ్రప్రదేశ్‌ ప్రభుత్వం విజ్ఞప్తి చేసింది. కరోనా వైరస్‌ వేగంగా వ్యాపిస్తున్న సమయంలో బయటకు రావొద్దని వారిని కోరింది. ఏపీలోని తమ కుటుంబ సభ్యుల ఆరోగ్యాన్ని దృష్టిలో ఉంచుకుని ఎక్కడి వారు ఆక్కడే ఉండాలని పేర్కొంది. అదేవిధంగా ఏమైనా సమస్యలు ఉంటే 1902కు కాల్‌ చేయమని ప్రభుత్వం కోరింది.

పాస్‌లు చెల్లవన్న తెలంగాణ డీజీపీ

లాక్‌ డౌన్‌ నేపథ్యంలో హాస్టళ్లలో ఉండే విద్యార్థులను ఖాళీ చేయించొద్దని నిర్వాహకులకు తెలంగాణ డీజీపీ మహేందర్‌రెడ్డి సూచించారు. హాస్టల్‌లో ఉండే విద్యార్థులను ఎట్టి పరిస్థితుల్లోనూ బయటకు పంపొద్దని అధికారులను ఆయన ఆదేశించారు. స్వస్థలాలకు వెళ్లేందుకు ఇప్పటి వరకు పోలీసులు ఇచ్చిన అనుమతి పత్రాలేవీ చెల్లవని డీజీపీ స్పష్టం చేశారు. పోలీసులు, జీహెచ్‌ఎంసీ అధికారులు హాస్టళ్ల నిర్వాహకులతో మాట్లాడాలని మహేందర్‌రెడ్డి ఆదేశించారు. అయితే అప్పటికే స్వస్థలాలకు వెళ్లేందుకు ఇప్పటికే వందల సంఖ్యలో అనుమతి పత్రాలను నగర పోలీసులు జారీ చేశారు. వాటితో ఊళ్లకు బయల్దేరిన హాస్టల్‌ విద్యార్థులు ఏపీ సరిహద్దుల్లో చిక్కుకుపోయారు.

విపక్షాల తీవ్ర విమర్శలు..

హైదరాబాద్ నుంచి వస్తున్న వారిని ఏపీ పోలీసులు అడ్డుకోవడంతో విపక్షాలు ఒక్కసారిగా మండిపడ్డాయి. టీడీపీ ప్రధాన కార్యదర్శి నారా లోకేష్, బీజేపీ రాష్ట్ర అధ్యక్షుడు కన్నా లక్ష్మీనారాయణ, టీడీపీ ఎమ్మెల్యే గోరంట్ల బుచ్చయ్యచౌదరి, ఎంపీ కేశినేని సహా ప్రభుత్వ తీరును తీవ్రంగా తప్పుపట్టారు. తెలంగాణ పొమ్మంటే.. ఆంధ్రా ప్రభుత్వం రానివ్వనంటోందని తీవ్ర విమర్శలు గుప్పించారు. ఇరు ప్రభుత్వాల మధ్య సమన్వయలోపం కొట్టొచ్చినట్లు కనిపిస్తోందని దుమ్మెత్తి పోశారు. ఈ నేపథ్యంలో ఇరు రాష్ట్రాల మధ్య చర్చలు ప్రారంభమయ్యాయి.

కొట్టొచ్చిన సమన్వయ లోపం

ఆ నేపథ్యంలో తెలంగాణ అధికారుల తీరును ఏపీ ప్రభుత్వం తీవ్రంగా తప్పుపట్టినట్లు తెలుస్తోంది. తమతో సంప్రదించకుండా హాస్టళ్లు మూసివేయడం, ఏపీకి వచ్చేందుకు ప్రత్యేక పాస్‌లు జారీ చేయడం ఏంటని ప్రశ్నించినట్లు తెలుస్తోంది. ఇలాగైతే లాక్ డౌన్‌లు ఎందుకని నిలదీసినట్లు సమాచారం. తెలంగాణలో కరోనా కేసులు పెరుగుతున్న నేపథ్యంలో ప్రస్తుతం వేల సంఖ్యలో ఏపీకి వస్తుండటంపై ఏపీ సర్కార్ ఆందోళన చెందుతున్నట్లు తెలుస్తోంది. అందుకే ఇప్పటి వరకు బోర్డర్‌లో ఉన్న వారిని మాత్రమే రాష్ట్రంలోకి అనుమతిచ్చి, ఇకపై కొత్తగా ఎవరూ హైదరాబాద్ నుంచి రావడానికి వీల్లేదని ప్రభుత్వం నిర్ణయించింది.

వచ్చినోళ్లకు దిమ్మతిరిగే కండీషన్లు

ఏపీ, తెలంగాణ బోర్డర్ వద్ద పరిస్థితి తీవ్రం కావడంతో కృష్ణా జిల్లా సబ్‌ కలెక్టర్‌ ధ్యాన్‌చంద్ గరికపాడు చెక్‌పోస్టు వద్దకు చేరుకున్నారు. ఏపీలోకి వస్తే ప్రభుత్వ క్వారంటైన్‌లో ఉండాలని సబ్‌కలెక్టర్‌ తేల్చి చెప్పారు. అందరి వివరాలు తీసుకొని క్వారంటైన్‌కు తరలిస్తామని ఆయన పేర్కొన్నారు. అనంతరం వారిని ఏపీలోకి వచ్చేందుకు అనుమతిచ్చారు. ప్రత్యేక బస్సుల్లో వీరిని తలరించేందుకు చర్యలు తీసుకుంటున్నారు. ఏపీకి వచ్చే కృష్ణా, గుంటూరు జిల్లాలకు చెందిన వారిని నూజివీడు ట్రిపుల్ ఐటీకి, తూర్పు గోదావరి జిల్లాకు చెందిన వారిని రాజమండ్రి క్వారంటైన్‌కు, పశ్చిమ గోదావరి జిల్లాకు చెందిన వారిని తాడేపల్లి గూడెం, పాలకొల్లు, భీమవరంల్లోని క్వారంటైన్‌కు పంపాలని నిర్ణయించారు. వీరికి వైద్య పరీక్షలు నిర్వహించిన అనంతరం స్థలాలకు పంపాలని నిర్ణయించారు. దీంతో ప్రస్తుతానికి వివాదం సద్దుమణిగింది. అయితే హైదరాబాద్‌లో ఉన్నవారు అక్కడే ఉండాలని ఏపీ ప్రభుత్వం ఆదేశించడంతో అక్కడి వారు ఎలా స్పందిస్తారో చూడాల్సి ఉంది.




Please Read Disclaimer


30రూ|| మాస్క్ కేవలం 2రూ|| కే తయారు చేసుకోండి Make your own mask for Just Rs.2/-