వైఎస్ మృతిపై చీఫ్ విప్ శ్రీకాంత్ రెడ్డి సంచలన వ్యాఖ్యలు

0

వైఎస్ కనిపించకుండా పోవడం.. మరణంపై ఇప్పటికీ అనుమానాలున్నాయంటూ ప్రభుత్వ చీఫ్ విప్, రాయచోటి ఎమ్మెల్యే గడికోట శ్రీకాంత రెడ్డి సంచలన వ్యాఖ్యలు చేశారు. టీడీపీ అధినేత చంద్రబాబుపై తీవ్రస్థాయిలో విరుచుకుపడ్డారు ఏపీ ప్రభుత్వ చీఫ్ విప్ గడికోట శ్రీకాంత్ రెడ్డి. గత ఎన్నికల్లో ప్రజలు ఛీత్కరించినా చంద్రబాబుకు బుద్ధి రాలేదని మండిపడ్డారు. చంద్రబాబుకు మతిభ్రమించిందని.. అందుకే మళ్లీ జమిలి ఎన్నికల గురించి మాట్లాడుతున్నారని ఎద్దేవా చేశారు. ఈ సారి ఎన్నికలు జరిగితే టీడీపీకి ఒక్క సీటు కూడా రాదన్న విషయాన్ని చంద్రబాబు గుర్తుపెట్టుకోవాలన్నారు.

మాతో పెట్టుకుంటే మటాష్ అని చంద్రబాబు చేసిన వ్యాఖ్యలపై శ్రీకాంత్ రెడ్డి తీవ్రంగా స్పందించారు. గతంలోనూ అసెంబ్లీలో ఒకసారి దివంగత ముఖ్యమంత్రి వైఎస్ రాజశేఖర్ రెడ్డిపై కూడా ఇలాంటి వ్యాఖ్యలే చేశారని.. ఆ మరుసటి రోజే ఆయన కనిపించకుండా పోయారంటూ సంచలన వ్యాఖ్యలు చేశారు. ఈ విషయంపై ఇప్పటికీ తమకు అనుమానాలు ఉన్నాయని.. సమగ్ర విచారణ జరిపించాలన్నారు. నలభై ఏళ్ల రాజకీయ అనుభవం ఉన్న వ్యక్తి మాట్లాడాల్సిన మాటలేనా అని ఆయన తప్పుబట్టారు.

వైఎస్ వివేకా హత్య కేసు ఛేదించలేకపోయారని టీడీపీ నేతలు చేస్తున్న విమర్శలను తిప్పికొట్టారు. చాలా పకడ్బందీగా కేసు విచారణ జరుగుతోందని.. అన్ని విషయాలు బయటకు వస్తాయన్నారు. వివేకా హత్య.. ఆ తరువాత చంద్రబాబు చేసిన కుట్రలను స్పష్టంగా ప్రజలకు వివరిస్తామని శ్రీకాంత్ రెడ్డి అన్నారు. ఎన్టీఆర్ చావుకు కారణాలపై కూడా విచారణ జరిపిద్దామంటూ సవాల్ చేశారు.

సీఎంగా పని చేసిన ఏ వ్యక్తి కూడ ఏ ప్రాంతాన్ని తక్కువగా మాట్లాడరని.. కానీ చంద్రబాబు పదే పదే రాయలసీమను కించపరిచేలా వ్యాఖ్యలు చేశారని శ్రీకాంత్ రెడ్డి అన్నారు. అందుకే రాయలసీమ ప్రజలు చంద్రబాబుకి తగిన బుద్ది చెప్పారన్నారు. గత ఎన్నికల్లో చిత్తూరు జిల్లా సహా రాయలసీమలో చావుదెబ్బ తగిలిందని ఘాటుగా వ్యాఖ్యానించారు. చంద్రబాబు.. పవన్.. రాయలసీమను అవమానపరిచేలా మాట్లాడుతున్నారని.. వాళ్లిద్దరూ సీమ ప్రజలకు క్షమాపణ చెప్పాలని డిమాండ్ చేశారు.




Please Read Disclaimer