జగన్ సర్కారు కీలక నిర్ణయం.. దొనకొండకు భారీ ప్రాజెక్టు!

0

ప్రకాశం జిల్లా దొనకొండ కేంద్రంగా కేంద్ర రక్షణ రంగ క్లస్టర్‌ ఏర్పాటు చేసేందుకు ప్రభుత్వం కసరత్తు చేస్తోందని రాష్ట్ర పరిశ్రమలు, వాణిజ్య, ఐటీ, జౌళి, నైపుణ్యాభివృద్ధి, శిక్షణ శాఖల మంత్రి మేకపాటి గౌతం రెడ్డి వెల్లడించారు. ఉత్తరప్రదేశ్‌లోని లక్నోలో జరుగుతున్న ఫ్రెంచ్-ఇండో డిఫెన్స్ ఎక్స్ పో-2020 లో ఆయన మాట్లాడారు. అలాగే దీనికి సంబంధించి మంగళ, బుధవారాల్లో ఆయన వరుస ట్వీట్లు చేశారు. దొనకొండలో అన్ని వసతులు సమకూర్చేందుకు ముఖ్యమంత్రి వైఎస్ జగన్‌మోహన్‌రెడ్డి నేతృత్వంలోని వైసీపీ ప్రభుత్వం అన్ని చర్యలు తీసుకుంటున్నట్లు తెలిపారు.

దొనకొండకు అందుబాటులో పోర్టులు

డిఫెన్స్ క్లస్టర్ ఏర్పాటుకు కావాల్సిన చర్యలు తీసుకుంటున్నట్లు కేంద్రానికి ఏపీ పరిశ్రమల శాఖ ప్రతిపాదనలు పంపినట్లు తెలిపారు. దొనకొండలో డిఫెన్స్ క్లస్టర్ ఏర్పాటుకు అవసరమైన భూమి అందుబాటులో ఉందని వెల్లడించారు. దొనకొండకు చేరువలో ఉన్న కృష్ణపట్నం, చెన్నై పోర్టుల నుంచి ఎగుమతి, దిగుమతులను జరుపుకునే అవకాశముందని గౌతం రెడ్డి వెల్లడించారు.

35 దేశాల ప్రతినిధులతో మంత్రి భేటీ

మేకిన్ ఇండియా ప్రాజెక్టులో భాగంగా రక్షణ ఉత్పత్తుల పరిశ్రమల ఏర్పాటుకు దొనకొండ అనువైన ప్రాంతమని కేంద్రం దృష్టికి తీసుకెళ్లామన్నారు. ఎరోస్పేస్, రక్షణ రంగాలకు సంబంధించిన పరిశ్రమల స్థాపనకు దొనకొండ ప్రాంతం కీలకమని స్పష్టం చేశారు. ఫ్రెంచ్ కంపెనీలతో కలసి పనిచేసేందుకు ఏపీ ప్రభుత్వం సిద్ధంగా ఉందని వెల్లడించారు. కాగా, డిఫెన్స్ ఎక్స్ పోకు హాజరైన 35 దేశాల ప్రతినిధులతో మంత్రి గౌతమ్ రెడ్డి ఈ సందర్భంగా భేటీ అయ్యారు.

మేకపాటి వరుస ట్వీట్లు

ప్రకాశం జిల్లా దొనకొండలో రక్షణ, ఎరోస్పేస్ రంగాల్లో మెరుగైన వృద్ధి సాధించేందుకు ఆంధ్రప్రదేశ్ ప్రభుత్వం సిద్ధంగా ఉందని వెల్లడించారు. ఈ మేరకు ఆయన వరుస ట్వీట్లు చేశారు. రాబోయే రోజుల్లో ఇండియాలో రక్షణ పరికరాల తయారీ రంగంలో కీలక స్థానం ఆక్రమిస్తుందని పేర్కొన్నారు. ముఖ్యమైన డిఫెన్స్ కంపెనీలకు ఇదే సదవకాశమని పేర్కొన్నారు. ఆంధ్రప్రదేశ్ స్వాగతం పలుకుతున్నట్లు తెలిపారు.

విభజన తర్వాత వార్తల్లో దొనకొండ

ఆంధ్రప్రదేశ్ విభజన తర్వాత రాజధానిపై చర్చ ప్రారంభమైనప్పటి నుంచి ప్రకాశం జిల్లా దొనకొండ వార్తల్లో నిలుస్తూ వస్తోంది. విస్తారమైన ప్రభుత్వ భూములు ఆ ప్రాంతంలో ఉన్నాయి. రెండో ప్రపంచ యుద్ధ సమయంలో దొనకొండలో ఎయిర్‌పోర్ట్ నిర్మించగా.. అక్కడి నుంచే యుద్ధ సామాగ్రి సరఫరా చేసేవారు. దొనకొండలో రాజధాని నిర్మించాలని గతంలో వైసీపీ ప్రతిపాదనలు కూడా చేసింది. ఈ నేపథ్యంలో దొనకొండలో కీలకమైన రక్షణరంగ ప్రాజెక్టు ఏర్పాటుకు రాష్ట్రం ప్రతిపాదనలు పంపించడం విశేషం.

 




Please Read Disclaimer