బరిలో ఉంటాం.. వెనక్కు తగ్గేది లేదంటోన్న నిజామాబాద్ రైతులు!

0

తెలంగాణ లోక్‌‌సభ ఎన్నికల్లో ఇప్పుడు అందరి దృష్టి నిజామాబాద్‌ పార్లమెంటుపైనే ఉంది. తమ సమస్యల గురించి దేశం మొత్తానికి తెలియజేయాలనే ఉద్దేశంతో పసుపు రైతులు ఈ ఎన్నికల్లో పోటీకి నిలిచారు. పసుపు, ఎర్రజొన్న రైతుల సమస్యలను పరిష్కరిస్తామని గతంలో హామీ ఇచ్చిన ఎంపీ కవిత ఆ దిశగా ఎలాంటి చర్యలు చేపట్టలేదని వారు ఆమెపైనే పోటీకి దిగారు. కవిత ప్రాతినిధ్యం వహిస్తోన్న నిజామాబాద్ స్థానంలో నామినేషన్లు వేసిన రైతులు తామంతా బరిలో ఉండాలని నిర్ణయం తీసుకున్నారు. ఈమేరకు ఆయా రైతు సంఘాలు తీర్మానం చేసి, తమ అభిప్రాయాన్ని ప్రకటించాయి. వీరిని బుజ్జగించడానికి నేతలు చేసిన ప్రయత్నాలు ఫలించకపోవడంతో బ్యాలెట్‌ పద్ధతిలో ఎన్నికల నిర్వహణకు అధికారులు సిద్ధమయ్యారు. నామినేషన్ల ఉపసంహరణకు గురువారం వరకు గడువు ఉండగా బుధవారం ఒక్కరూ ఉపసంహరణకు ముందుకు రాలేదు.

నిజామాబాద్‌‌లో నామినేషన్ల పరిశీలన అనంతరం 189 మంది అభ్యర్థులు బరిలో ఉన్నారు. వీరిలో టీఆర్ఎస్, కాంగ్రెస్‌, బీజేపీ, పిరమిడ్‌, బహుజన ముక్తి, సమాజ్‌వాదీ ఫార్వర్డ్‌ బ్లాక్‌తో పాటు మరో ఇద్దరు స్వతంత్రులు కాగా, మిగతా వారు రైతులే. మంగళవారం చేపట్టిన నామినేషన్ల పరిశీలన రాత్రి 11 గంటల వరకు సాగింది. మొత్తం 14 మందికి చెందిన నామినేషన్లు తిరస్కరణకు గురయ్యాయి. అఫిడవిట్‌, వివరాలు సరిగా నింపని కారణంగా వీటిని తిరస్కరించినట్లు అధికారులు వెల్లడించారు. మొత్తం 203 నామినేషన్ల దాఖలు కాగా, పరిశీలన అనంతరం చివరికి 189 మంది బరిలో నిలిచారు.

నిజామాబాద్‌ జిల్లాలో పసుపు, ఎర్రజొన్న సాగు చేసే రైతులు ఎక్కువగా ఉన్నారు. ముఖ్యంగా పసుపు రైతులు నిజామాబాద్ పార్లమెంట్ స్థానం పరిధిలోనే అధికం. వీరంతా తమ పంటలకు సరిపడా గిట్టుబాటు ధర రావడం లేదంటూ గత కొన్నేళ్లుగా పోరాటాలు చేస్తున్నారు. అయినా ప్రభుత్వాల నుంచి సరైన స్పందన రాకపోవడంతో తమ సమస్యను జాతీయ స్థాయిలో ప్రతిబింబించాలనుకున్నారు. అందుకోసం లోక్ సభ ఎన్నికల్లో పోటీ చేయాలని నిర్ణయం తీసుకొన్నారు. ప్రతి గ్రామం నుంచి ఐదుగురు చొప్పున మొత్తం 1000 మంది రైతులు నామినేషన్ వేయాలని నిర్ణయం తీసుకున్నారు. అయితే, 190 మంది రైతులు నామినేషన్ వేశారు. రైతులు తీసుకున్న నిర్ణయంతో టీఆర్ఎస్ ఆందోళన చెందుతోంది. ఇక్కడి నుంచి కేసీఆర్ కుమార్తె కవిత పోటీ చేస్తుండటంతో ఆ పార్టీ ప్రతిష్ఠాత్మకంగా తీసుకుంది.




Please Read Disclaimer