జయప్రదకు బీజేపీ టికెట్.. బద్ధ విరోధి ఆజామ్ ఖాన్‌పై పోటీ

0

బీజేపీ ఉత్తర ప్రదేశ్ నుంచి లోక్ సభకు పోటీ చేస్తున్న 29 మంది అభ్యర్థుల జాబితాను ప్రకటించింది. మంగళవారమే పార్టీలో చేరిన సినీ నటి జయప్రదకు ఆ పార్టీ టికెట్ ఇచ్చింది. జయ ప్రద రామ్‌పూర్ నుంచి పోటీ చేయనున్నారు. సమాజ్ వాదీ పార్టీ నేత ఆజామ్ ఖాన్‌తో ఆమె తలపడనున్నారు. 2004, 2009ల్లో జయప్రద ఇదే స్థానం నుంచి సమాజ్ వాదీ పార్టీ తరఫున ఎంపీగా గెలుపొందారు. 2004 ఎన్నికల్లో రామ్‌పూర్ నుంచి జయప్రద గెలవడంలో ఆజామ్ ఖాన్ కీలక పాత్ర పోషించడం విశేషం.

సమాజ్ వాదీ పార్టీలో ఉన్న తొలినాళ్లలో జయ ప్రద, ఆజామ్ ఖాన్ సన్నిహితంగానే ఉండేవారు. కానీ అమర్ సింగ్‌‌కు జయ ప్రద మద్దతుగా నిలవడంతో ఇద్దరి మధ్య విబేధాలు తలెత్తాయి. ఆజామ్ ఖాన్ తనను హింసించారని జయ ప్రద ఆరోపించారు. 2009 ఎన్నికల్లో ఆజామ్ ఖాన్ మద్దతుదారులు ఆమెకు వ్యతిరేకంగా ప్రచారం చేశారు. కానీ ఆ ఎన్నికలలో జయ ప్రద విజయం సాధించారు. ఆజామ్ ఖాన్, జయ ప్రద ఒకరిపై మరొకరు బహిరంగంగా విమర్శలు గుప్పించుకున్నారు.

జయ ప్రద ఆజామ్ ఖాన్‌ను అల్లా ఉద్దీన్ ఖిల్జీతో పోల్చగా.. బదులుగా ఆయన జయను నాట్య గత్తె అంటూ విమర్శించారు. 2009 ఎన్నికల్లో తన మార్ఫింగ్ ఫొటోలను ఆజామ్ ఖాన్ రామ్‌పూర్‌లో సర్క్యులేట్ చేశారని జయప్రద ఆరోపించారు. ఆమె ముఖంతో ఉన్న న్యూడ్ ఫొటోలు సోషల్ మీడియాలో వైరలయ్యాయి. రామ్‌పూర్‌లో సిడీలను కూడా పంచిపెట్టారు. దీంతో ఒకానొక దశలో ఆత్మహత్య చేసుకోవాలని కూడా అనుకున్నానని జయ ప్రద తెలిపారు. కాగా, ఈ ఆరోపణలను ఆజామ్ ఖాన్ ఖండించారు. ఆజామ్ తనపై యాసిడ్ దాడికి యత్నించారని ఆమె ఇటీవల ఆరోపించారు.

2010లో అమర్ సింగ్‌, జయ ప్రద సమాజ్ వాదీ పార్టీకి దూరమయ్యారు. తర్వాత వీరిద్దరూ రాష్ట్రీయ లోక్ మంచ్ అనే పార్టీని ఏర్పాటు చేశారు. 2014 ఎన్నికల ముందు జయ ప్రద, అమర్ సింగ్‌లు.. అజిత్ సింగ్‌కు చెందిన రాష్ట్రీయ లోక్ దళ్‌లో చేరారు.

రామ్ పూర్‌లో జయ ప్రద విజయం అంత తేలికేం కాదని భావిస్తున్నారు. 2014లో మోదీ గాలి వీచిన సమయంలోనూ బీజేపీ అభ్యర్థి ఇక్కడ తక్కువ మెజార్టీతోనే గెలుపొందారు. ఈసారి యూపీలో ఎస్పీ, బీఎస్పీ కలిసి పోటీ చేస్తున్నాయి. దీంతో ఆజామ్ ఖాన్‌కు ముస్లింల ఓట్లతోపాటు దళితుల ఓట్లు కూడా కలిసొచ్చే అవకాశం ఉంది. ఇక్కడ కాంగ్రెస్ ఎవరిని బరిలో నిలుపుతుందనే విషయం ఆసక్తికరంగా మారింది.




Please Read Disclaimer