బీఎస్ఎన్ఎల్ వినియోగదారులకు ఒక గుడ్ న్యూస్.. ఒక బ్యాడ్ న్యూస్.. అందుబాటులోకి వైఫై కాలింగ్.. కానీ?

0

ప్రస్తుతం మన దేశం మొత్తం వైఫై కాలింగ్ గురించి మాట్లాడుకుంటోంది. ఎందుకంటే రిలయన్స్ జియో, ఎయిర్ టెల్ ఇప్పటికే వైఫై కాలింగ్ ను ప్రారంభించాయి. ఈ కొత్త సర్వీస్ తో మొబైల్ నెట్ వర్క్ సరిగ్గా లేకపోతే వైఫై ద్వారా కాలింగ్ ను చేసుకోవచ్చు. రిలయన్స్ జియో వైఫై కాలింగ్ ను సపోర్ట్ చేసే 150కు పైగా స్మార్ట్ ఫోన్ల జాబితాను ఇప్పటికే వెల్లడించింది. ఎయిర్ టెల్ కూడా దాదాపు 100 వరకు స్మార్ట్ ఫోన్లకు ఈ సేవలను అందిస్తోంది. తాజాగా బీఎస్ఎన్ఎల్ కూడా ఈ జాబితాలో చేరింది. కానీ బీఎస్ఎన్ఎల్ వైఫై కాలింగ్ వీటన్నిటికీ భిన్నం.

​BSNL Wings ప్రారంభం!

కేంద్ర ప్రభుత్వ సంస్థ బీఎస్ఎన్ఎల్ వింగ్స్ పేరిట కొత్త సర్వీస్ ను ప్రారంభించింది. ఇది మిగతా మొబైల్ నెట్ వర్క్ లు ప్రారంభించిన వైఫై కాలింగ్ తరహాలోనే ఉంది. ఈ బీఎస్ఎన్ఎల్ వింగ్స్ సర్వీస్ ద్వారా బీఎస్ఎన్ఎల్ వినియోగదారులు VoWiFi వంటి సర్వీస్ లను ఎంజాయ్ చేయవచ్చు. కానీ మార్కెట్లో ఉన్న వైఫై కాలింగ్ ఫీచర్లకు, దీనికి కాస్త తేడా ఉంది.

​జియో, ఎయిర్ టెల్, బీఎస్ఎన్ఎల్.. ఏంటి తేడా?

ఇక్కడ మీరు తెలుసుకోవాల్సిన విషయం ఏంటంటే.. ఎయిర్ టెల్, జియో, బీఎస్ఎన్ఎల్ మూడు సర్వీసులు అందించే వైఫై కాలింగ్ సేవలకు సంబంధించిన బేసిక్ టెక్నాలజీ ఒక్కటే. వీటి ద్వారా చేసుకునే కాల్స్ VoIP కాల్సే. కానీ మీరు కాల్స్ ఎలా చేసుకునే విధానాన్ని గమనిస్తే.. అక్కడ మీకు తేడా కనిపిస్తుంది.

​BSNL Wingsకు యాప్ అవసరం..

ఈ బీఎస్ఎన్ఎల్ వింగ్స్ సర్వీసులను ఉపయోగించాలంటే మీరు బీఎస్ఎన్ఎల్ వింగ్స్ యాప్ ను ఇన్ స్టాల్ చేసుకోవాలి. ఈ యాప్ ను ల్యాప్ టాప్, ట్యాబ్లెట్, స్మార్ట్ ఫోన్ ఎందులో అయినా ఇన్ స్టాల్ చేసుకోవచ్చు. ఈ యాప్ ద్వారా సబ్ స్క్రైబర్లు తమ ఫోన్ కాంటాక్ట్స్ యాక్సెస్ చేయవచ్చు. దాని ద్వారా వైఫై నెట్ వర్క్ కాల్స్ ను చేసుకోవచ్చు. అయితే ఈ సేవలను ఉపయోగించుకోవడానికి మీ దగ్గర లాగిన్ ఐడీ, పాస్ వర్డ్ ఉండాలి. వినియోగదారులు ఈ సేవలను అభ్యర్థించినప్పుడు వాటిని బీఎస్ఎన్ఎల్ అందిస్తుంది.

​వైఫై కాలింగ్ vs బీఎస్ఎన్ఎల్ వింగ్స్.. ఏంటి తేడా?

ఈ రెండిటికీ ఉన్న ప్రధాన తేడా ఏంటంటే.. రిలయన్స్ జియో, ఎయిర్ టెల్ వైఫై కాలింగ్ కు రిజిస్ట్రేషన్ అవసరం లేదు. బీఎస్ఎన్ఎల్ వింగ్స్ సేవలను ఉపయోగించుకోవడానికి వినియోగదారులు ఏటా రూ.1,099 చెల్లించాల్సి ఉంటుంది. అయితే రిలయన్స్ జియో, ఎయిర్ టెల్ తమ వినియోగదారులకు ఈ సేవలను ఉచితంగా అందిస్తున్నాయి. అందుకు మీ దగ్గర దాన్ని సపోర్ట్ చేసే స్మార్ట్ ఫోన్ ఉంటే చాలు!

​మరెన్నో చార్జీలు..

ఇక్కడ మీరు గుర్తుంచుకోవాల్సిన విషయం ఇంకోటి ఉంది. బీఎస్ఎన్ఎల్ వింగ్స్ వార్షిక సబ్ స్క్రిప్షన్ రూ.1,099 కాగా, రిజిస్ట్రేషన్ సమయంలోనే మీరు మరో 2,000 చెల్లించాల్సి ఉంటుంది. అప్పుడు మీకు నెలకు 1,800 బీఎస్ఎన్ఎల్ వింగ్స్ నిమిషాలు లభిస్తాయి. ఈ ఉచిత నిమిషాలను ఉపయోగించుకున్న అనంతరం నిమిషానికి 30 పైసల చార్జీలను చెల్లించాల్సి ఉంటుంది. అయితే ఇందులో కొన్ని డిస్కౌంట్ ఆప్షన్లు కూడా ఉన్నాయి. ఉదాహరణకు ప్రభుత్వ ఉద్యోగులు, బీఎస్ఎన్ఎల్ బ్రాడ్ బ్యాండ్ వైఫై వినియోగదారులు రూ.599 చెల్లిస్తే చాలు.. ఈ సేవలను వినియోగించుకోవచ్చు.




Please Read Disclaimer