ఫీజులు చెల్లించమంటే విద్యార్థుల్ని లాఠీలతో కొడతారా: బాబు

0

ఫీజ్‌ రీయింబర్స్‌మెంట్‌ బకాయిలను వెంటనే విడుదల చేయాలని, తమ సమస్యలను వెంటనే పరిష్కరించాలని డిమాండ్ చేస్తూ విజయనగరంలో విద్యార్థులు భారీ ర్యాలీ నిర్వహించారు. స్కాలర్ షిప్ బకాయిలను చెల్లించాలని, ఎస్టీ హాస్టళ్లలో వసతులను మెరుగుపరచాలని ఎస్ఎఫ్ఐ ఆధ్వర్యంలో డిమాండ్‌ చేశారు. సంక్షేమ హాస్టళ్లలో విద్యార్థులు జ్వరాలతో బాధపడుతుంటే.. జిల్లా కలెక్టర్‌ పట్టించుకోవడం లేదని ఆగ్రహం వ్యక్తం చేస్తూ కలెక్టరేట్‌లో చొచ్చుకెళ్లేందుకు ప్రయత్నించారు.

కలెక్టర్‌ తమతో మాట్లాడాలని డిమాండ్ చేస్తూ రోడ్డుపై బైఠాయించి ఆందోళన చేశారు. దీంతో రంగంలోకి దిగిన పోలీసులు విద్యార్థులపై లాఠీఛార్జి చేశారు. బూట్‌ కాలుతో తన్ని పోలీస్‌ స్టేషన్లకు తరలించారు. విద్యార్థినులపై కూడా పోలీసులు లాఠీ ఝలిపించారు. విద్యార్థినులను సైతం వ్యాన్‌లలో ఎక్కించారు. విద్యార్థులను తరలిస్తున్న లారీకి అడ్డంగా విద్యార్థులు బైఠాయించారు. దీంతో పరిస్థితి మరింత ఉద్రిక్తంగా మారింది. 47 మంది విద్యార్థులను పోలీసులు అరెస్ట్‌ చేశారు.

విజయనగరంలో విద్యార్థులపై పోలీసుల లాఠీ ఛార్జీ చేయడం పట్ల ఏపీ మాజీ సీఎం చంద్రబాబు నాయుడు స్పందించారు. ‘‘మీరు చదువుకోండి ఫీజులు మేం కడతాం అని గొప్పలు చెప్పారు. ఇప్పుడు ఫీజులు చెల్లించమంటే, స్కాలర్ షిప్‌లు అడిగితే విద్యార్థులని లాఠీలతో కొడతారా? విజయనగరం విద్యార్థులపై లాఠీ ఛార్జ్ అమానుషం. వెంటనే విద్యార్థులకు ఫీజులు చెల్లించాలి. ఉపకార వేతనాలు తక్షణమే విడుదల చేయాల’’ని ప్రభుత్వాన్ని బాబు డిమాండ్ చేశారు.

అమ్మ ఒడి పథకంలో భాగంగా స్కూలు, ఇంటర్ కాలేజీలకు వెళ్లే విద్యార్థుల తల్లులకు ఏటా రూ.15 వేలు అందజేస్తామని వైఎస్ జగన్ ప్రకటించిన సంగతి తెలిసిందే. ఈ విషయాన్ని పరోక్షంగా ప్రస్తావిస్తూ జగన్‌పై బాబు ప్రశ్నల వర్షం గుప్పించారు.




Please Read Disclaimer