వివేకానంద హత్య: జగన్ నాడు చేసిన డిమాండ్ నేడు బాబు నోట.. సీఎంకు తలనొప్పిలా..

0

ఎన్నికల ముందు వైఎస్ జగన్ బాబాయి వివేకానంద రెడ్డి హత్యకు గురవడం ఏపీ రాజకీయాల్లో సంచలనమైన సంగతి తెలిసిందే. తన బాబాయ్‌ని టీడీపీ నేతలే హత్య చేశారని ఆరోపించిన జగన్.. తమకు ఈ ప్రభుత్వంపై నమ్మకం లేదన్నారు. సీబీఐతో విచారణ జరిపించాలని డిమాండ్ చేశారు. కానీ చంద్రబాబు సర్కారు మాత్రం సిట్ ఏర్పాటు చేసి విచారణ ప్రారంభించింది. ఎన్నికల్లో వైఎస్ఆర్సీపీ ఘన విజయం సాధించడంతో.. ఈ కేసు త్వరలోనే ఓ కొలిక్కి వస్తుందని భావించారు. కానీ చంద్రబాబు ప్రభుత్వం హయాంలో జరిగిన ఈ హత్య మిస్టరీ ఇప్పటి వరకూ తేలలేదు.

వివేకానంద హత్య కేసు అటు ఇంటా, ఇటు బయటా జగన్‌కు ఇబ్బందిగా మారింది. జగన్ అధికారంలోకి వచ్చి మూడు నెలలు గడుస్తున్నా.. వివేకా మర్డర్ మిస్టరీ తేలకపోవడంతో కుటుంబీకులు అసంతృప్తితో ఉన్నారు. మరోవైపు రాజకీయంగానూ ఈ అంశం జగన్‌కు ఇబ్బందికరంగా మారింది.

టీడీపీ నేతలు వివేకానంద హత్య కేసు విషయంలో జగన్ సర్కారును పదే పదే టార్గెట్ చేస్తున్నారు. మాజీ సీఎం చంద్రబాబు అయితే.. సొంత బాబాయిను ఎవరు హత్య చేశారో కూడా తేల్చలేని విధంగా జగన్ పాలన సాగుతోందని ఎద్దేవా చేస్తున్నారు. టీడీపీ నేత బుద్ధా వెంకన్న లాంటి వారు.. ఈ హత్య కేసులో ప్రధాన నిందితులు జగన్‌కు సన్నిహితులేనని ఆరోపిస్తున్నారు.

తన బాబాయి మర్డర్ కేసులో పురోగతి ఏంటని ఏపీ డీజీపీపై జగన్ ఫైర్ అయ్యారు. రెండ్రోజుల్లోగా ఈ కేసు మిస్టరీని చేధించాలని, నిందితులు ఎవరో తేల్చాలని జగన్ ఆదేశించారు. నిందితులు ఎవరైనా, ఎంతటి వారైనా వెనుకడుగు వేయొద్దని సూచించారు. దీంతో డీజీపీ మంగళవారం రాత్రే కడప బయల్దేరి వెళ్లారు. దర్యాప్తు బృందంతో భేటీ అయ్యారు. ఇప్పటికైనా ఈ కేసు ఓ కొలిక్కి వస్తుందా..? ఎందుకంటే ఏపీ పోలీసులు వివేకానంద హత్య కేసు మిస్టరీ తేల్చలేకపోతే.. ఈ కేసును సీబీఐకి అప్పగించమని టీడీపీ నేత చంద్రబాబు నాయుడు డిమాండ్ చేస్తున్నారు. సీబీఐని రాష్ట్రంలో అడుగుపెట్టకుండా నిర్ణయం తీసుకున్న చంద్రబాబే ఇప్పుడు సీబీఐ విచారణ జరపాలని కోరుతుండటం గమనార్హం.

ఒకవేళ జగన్ సీబీఐ విచారణకు ఆదేశిస్తే.. తమ పోలీసు యంత్రాంగానికి ఈ కేసును చేధించడం చేతగాలేదని ఒప్పుకొన్నట్టే.




Please Read Disclaimer