జగన్‌ చేతకానితనాన్ని కేసీఆర్ కూడా ఎగతాళి చేస్తున్నారు

0

ఏపీ సీఎం వైఎస్ జగన్మోహన్ రెడ్డి పాలనపై టీడీపీ అధినేత చంద్రబాబు నాయుడు విమర్శల వర్షం కురిపించారు. రాష్ట్రంలో ఇసుక కొరత, విద్యుత్ కోతలు, వైరల్ ఫీవర్లు, కౌలు రైతుల సమస్యలను ప్రస్తావిస్తూ వైఎస్సార్‌సీపీ ప్రభుత్వాన్ని దుయ్యబట్టారు. సాగు నీటి ప్రాజెక్టులపై సీఎం జగన్‌కు ఏమాత్రం అవగాహన లేదన్నారు. ఈ క్రమంలో ఏపీ ప్రభుత్వ నిర్ణయాన్ని ఉద్దేశించి ఇటీవల కేసీఆర్ చేసిన వ్యాఖ్యలను గుర్తు చేశారు. మంగళవారం (అక్టోబర్ 29) కృష్టా జిల్లా టీడీపీ విస్త్రత స్థాయి సమావేశంలో చంద్రబాబు మాట్లాడారు.

రాష్ట్రంలో బస్తా సిమెంట్‌ ధర కంటే ఇసుక ధరే ఎక్కువగా ఉండటం జగన్నాటకమే అని చంద్రబాబు ఎద్దేవా చేశారు. వరదల వల్ల ఇసుక కొరత ఏర్పడిందని చెప్పడం అబద్ధమని పేర్కొన్నారు. ఇసుక విధానం మార్చడం వల్లే రాష్ట్రంలో ఐదుగురు ఆత్మహత్య చేసుకున్నారని ఆరోపించారు.

టీడీపీ హయాంలో హాయిగా బతికిన ప్రజలు ఇప్పుడు కష్టాలు కొనితెచ్చుకున్నారని చంద్రబాబు వ్యాఖ్యానించారు. దోమలపై దండయాత్రను అసెంబ్లీలో ఎగతాళి చేశారని.. ఇప్పుడు రాష్ట్రంలో కరెంట్‌ తీసేసి దోమలమయం చేశారని ధ్వజమెత్తారు. జగన్‌ చేతకానితనాన్ని కేసీఆర్‌ కూడా ఎగతాళి చేస్తున్నారని ఎద్దేవా చేశారు.

‘ఇరిగేషన్‌లో మీకు ఓనమాలు కూడా రావని సీఎం జగన్‌కు చెప్పాం. ఇప్పుడు నేను చెప్పిందే అనుసరించాల్సి వస్తోంది. రైతులకు రూ.12500 ఇస్తామని చెప్పి ఇప్పుడు ఎందుకు ఇవ్వట్లేదో జగన్ చెప్పాలి. కౌలు రైతులు వేరే కులం వారైతే రైతు భరోసా ఇవ్వరట. ఇదెక్కడి న్యాయం’ అని చంద్రబాబు ప్రశ్నించారు. ఇంటికొకరు డెంగీ జ్వరంతో బాధపడుతున్నారని.. ఇవన్నీ చూస్తుంటే ఇక పోరాటం తప్పదనిపిస్తోందని చంద్రబాబు మండిపడ్డారు.

ఆర్టీసీ సమ్మె అంశంపై సీఎం కేసీఆర్ ఇటీవల సంచలన వ్యాఖ్యలు చేసిన విషయం తెలిసిందే. ఆర్టీసీ విలీనంతో ఏపీలో ఒక ప్రయోగం మాత్రమే చేశారని.. అక్కడ పెద్దగా చేసిందేమీ లేదని కేసీఆర్ వ్యాఖ్యానించారు. హుజూర్‌నగర్ ఉప ఎన్నిక ఫలితాల్లో టీఆర్‌ఎస్ అభ్యర్థి సైదిరెడ్డి ఘన విజయం సాధించిన నేపథ్యంలో అక్టోబర్ 24 సాయంత్రం మీడియాతో మాట్లాడిన కేసీఆర్.. విలేకర్లు అడిగిన ప్రశ్నలకు బదులిస్తూ వైఎస్ జగన్‌ ప్రభుత్వ నిర్ణయం గురించి ప్రస్తావించారు.

‘ఆర్టీసీని ప్రభుత్వంలో కలపడం అనేది పూర్తి స్థాయి అసంభవం. ఈ భూగోళం ఉన్నంతకాలం జరిగే పనికాదు. అక్కడ (ఏపీలో) ఒక ఎక్స్‌పరిమెంట్ చేశారు. ఏం మన్ను కూడా జరగలేదు. చూద్దాం ఏం జరుగుతుందో.. కమిటీ వేశారు. మూడు నెలలో, ఆర్నెళ్లకో చెబుతారట కథ. ఏమైతదో.. ఏమో దేవునికే ఎరుక’ అని కేసీఆర్ వ్యాఖ్యానించారు. ఈ వ్యాఖ్యలను చంద్రబాబు నాయుడు తాజాగా జగన్‌పై విమర్శలు సంధించడానికి వాడుకున్నారు.




Please Read Disclaimer