కోడెల తరహాలో ఆ జైల్లోనే చచ్చేవాడిని.. చింతమనేని సంచలన వ్యాఖ్యలు

0

జగన్ సర్కార్‌పై నిప్పులు చెరిగారు టీడీపీ నేత, దెందులూరు మాజీ ఎమ్మెల్యే చింతమనేని ప్రభాకర్. ఈ రోజు బెయిల్‌పై విడుదలైన చింతమనేని మీడియా సమావేశంలో మాట్లాడారు. తనపై అన్యాయంగా ఎస్సీ, ఎస్టీ కేసులు బనాయించారని ఆవేదన చెందారు. ఎస్సీ, ఎస్టీ యాక్టును దుర్వినియోగం చేస్తున్నారన్నారు. దళితులతో తాను ఉన్నంత చనువుగా మరే అగ్రకుల నాయకుడు కూలా లేడని.. కావాలంటే నియోజకవర్గంలోని గ్రామాలకు వెళ్లి అడగాలంటూ సవాల్ చేశారు. దళిత వ్యతిరేకి చింతమనేని అని ముద్ర వేసేందుకు జరిగిన కుట్రలో భాగమేనని అభివర్ణించారు.

ఇతరులకు సాయం చేసేందుకు సొంత ఆస్తులు తగలేసుకునేవాడినే కానీ.. తాను ఏ దళితుడి ఆస్తి కోసం ఆశపడలేదన్నారు. తనపై 18 కేసులు పెట్టారని.. వేటాడి వేధించారని ఆయన ఆగ్రహం వ్యక్తం చేశారు. ఒక్క కేసులో తప్పు చేసినట్టు తేలినా.. ఈ ప్రపంచం నుంచే నిష్క్రమించేందుకు సిద్ధమన్నారు. దళితులెవరూ తనపై కేసులు పెట్టలేదని.. కేసులు పెట్టిన వ్యక్తిని కూడా తాను గుర్తు పట్టలేనని చింతమనేని అన్నారు. తమ సామాజికవర్గం వారే వెనకుండి తనపై కేసులు పెట్టించారని ఆయన ఆరోపించారు.

సీఎం వైఎస్ జగన్ మంచి ముఖ్యమంత్రి అనిపించుకుంటానన్నారని చింతమనేని గుర్తు చేశారు. రైతు భరోసా, ఆటో డ్రైవర్లకు రూ.10 వేలు, ఆరోగ్య శ్రీ వంటి సంక్షేమ పథకాలే కాదు, శాంతిభద్రతలను కూడా పట్టించుకోవాలని హితవు పలికారు. దెందులూరు నియోజకవర్గ పరిధిలో ఏ ఒక్క గ్రామంలోనైనా దళిత వ్యతిరేకి అనిపిస్తే తనకెవరూ శిక్షలు వేయక్కర్లేదని, తానే దోషినని ఒప్పుకుంటానన్నారు. రాజకీయాలకు పనికిరానని ప్రజలు చెబితే శాశ్వతంగా తప్పుకుంటానన్నారు.

ఈ సందర్భంగా ఎమ్మార్వో వనజాక్షిపై దాడి ఘటనను చింతమనేని ప్రస్తావించారు. వనజాక్షి వ్యవహారాన్ని ఇప్పటికీ ప్రచారం చేస్తున్నారని అభ్యంతరం వ్యక్తం చేశారు. అప్పట్లో చంద్రబాబు తనపై కేసు పెట్టించారని చింతమనేని తెలిపారు. ఇప్పుడు మీ ప్రభుత్వమే కదా ఉంది.. వనజాక్షి వ్యవహారంపై విచారణ జరిపించాలని నిజాలు నిగ్గు తేల్చాలని చింతమనేని డిమాండ్ చేశారు. 150 మంది ఎమ్మెల్యేల బలం ఉందని అహంభావం తగదంటూ ఘాటు వ్యాఖ్యలు చేశారు. జైలు నుంచి వస్తున్న సమయంలో కూడా పోలీసులు అతిగా ప్రవర్తించారని.. అంత అవసరం లేదంటూ చురకలంటించారు.

తప్పుడు కేసులు పెట్టి జైల్లో పెట్టారని చింతమనేని ఆరోపించారు. ‘తనపై పెట్టిన కేసులకు ఆర్నెల్లు శిక్ష పడుతుందేమో.. మరి జగన్‌పై ఉన్న కేసుల్లో శిక్ష పడితే ఆయనకు బాధ ఉండదా? జగన్‌ను జైల్లో పెట్టినప్పుడు ఆయన తల్లి, చెల్లి, కార్యకర్తలు ఎంత బాధపడి ఉంటారు. మీలాంటి మనసులు కావా ఇతర పార్టీల నేతలవి? మీలాంటి హృదయాలు కావా ఇతరులవి? ఎంత చెట్టుకు అంత గాలి! నీది పెద్దచెట్టు కాబట్టి అంతగాలి, నాకుండే గాలి నాకుంటుంది కదా! అంటూ చింతమనేని తీవ్రస్థాయిలో స్పందించారు.

ఏపీ అసెంబ్లీ మాజీ స్పీకర్ కోడెల శివప్రసాదరావు ఆత్మహత్య విషయాన్ని చింతమనేని ప్రస్తావించారు. తాను కూడా విప్‌గా పనిచేశానని.. తనకు కూడా ఫర్నిచర్ ఇచ్చారన్నారు. ప్రభుత్వం మారాక డబ్బులు చెల్లించానని చెప్పారు. కోడెలపై అసెంబ్లీ ఫర్నీచర్ దొంగిలించారంటూ కేసులు పెట్టి వేధించారని.. అందుకే ఆయన ఆత్మహత్యకు పాల్పడ్డారని ఆరోపించారు. తనకు న్యాయ దేవతపై నమ్మకం ఉందని.. లేకుంటే కోడెల తరహాలోనే అదే జైలులో చనిపోయి ఉండేవాడినన్నారు. న్యాయవ్యవస్థపై నమ్మకంతోనే ప్రభాకర్‌ ఇంకా బతికి ఉన్నాడని వ్యాఖ్యానించారు.




Please Read Disclaimer