హ్యాపీగా విధుల్లో చేరండి.. ఆర్టీసీ కార్మికులకు సీఎం కేసీఆర్ శుభవార్త

0

ఆర్టీసీ సమస్యకు సీఎం కేసీఆర్ ముగింపు పలికారు. రాష్ట్రంలో 52 రోజులుగా సుదీర్ఘంగా సమ్మెలో పాల్గొని విధులకు దూరమైన 48 వేల మంది కార్మికులకు తిరిగి ఉద్యోగాల్లో చేరడానికి అవకాశం కల్పించారు. శుక్రవారం (నవంబర్ 29) ఉదయం నుంచే ఆనందంగా విధుల్లో చేరవచ్చని ప్రకటించారు. తాత్కాలికంగా విధులు నిర్వహించిన వారికి కూడా భవిష్యత్తులో లబ్ది చేకూర్చే నిర్ణయం తీసుకుంటామని భరోసా ఇచ్చారు. ఇన్ని రోజులుగా ప్రజలకు సేవ అందించిన తాత్కాలిక డ్రైవర్లు, కండక్టర్లకు ప్రత్యేక ధన్యవాదాలు తెలిపారు.

తెలంగాణ మంత్రివర్గ సమావేశం అనంతరం గురువారం సాయంత్రం సీఎం కేసీఆర్ ప్రగతి భవన్‌లో మీడియా సమావేశంలో మాట్లాడారు. కేబినెట్ భేటీలో తీసుకున్న నిర్ణయాలను వెల్లడించారు. ఆర్టీసీ కార్మికులకు శుభవార్త అందించారు.

ఆ కుటుంబాలను ఆదుకుంటాం..
ఆర్టీసీ సమ్మె కాలంలో మరణించిన కార్మికుల కుటుంబాలను ఆదుకుంటామని ముఖ్యమంత్రి కేసీఆర్ భరోసా ఇచ్చారు. బాధితు కుటుంబాల్లో ఒక వ్యక్తికి ఉద్యోగం కల్పిస్తామని చెప్పారు. అర్హతలను బట్టి ఆర్టీసీలో లేదా, ప్రభుత్వంలో ఉద్యోగంలోకి తీసుకుంటామని హామీ ఇచ్చారు.

కార్మికుల ఆత్మహత్యలకు యూనియన్లే కారణమని కేసీఆర్ చెప్పారు. సమ్మె కాలంలో కార్మికులు తనను ఇష్టారీతిన దూషించారని.. కానీ, బాధ్యతమైన స్థానంలో ఉండి వాటన్నింటినీ పట్టించుకోనని వ్యాఖ్యానించారు. తమకు మానవత్వం ఉందని చెప్పారు. కార్మికులు తమ బిడ్డలేనని, వారిని కడుపున పెట్టుకొని చూసుకుంటామని చెప్పారు.

కార్మికులు ఉద్యోగ భద్రత వరకు కోరుకుంటే తప్పులేదని.. క్రమశిక్షణతో వ్యవహరించకుంటే మాత్రం ఉపేక్షించేది లేదని ముఖ్యమంత్రి స్పష్టం చేశారు. డిపోకు ఇద్దరు చొప్పున కార్మికులను త్వరలో ప్రగతి భవన్‌కు పిలిపించి మాట్లాడుతానని కేసీఆర్ చెప్పారు. యూనియన్ నేతలను రానిచ్చేది లేదని స్పష్టం చేశారు.

‘ఇన్ని మంచి పనులు చేసిన మాకు ఇదో (ఆర్టీసీ సమస్య) పెద్ద సమస్యా? ఆర్టీసీ సంస్థ మీది. మంచిగా పని చేసుకోమని చెప్పాం. యూనియన్ నేతలు, ప్రతిపక్షాల వారి మాటలు విని బతుకులు ఆగం చేసుకోవద్దని కార్మికులకు సూచించాం. సంస్థ మునిగితే రోడ్డున పడేది మీరే కాదా’ అని కేసీఆర్ ప్రశ్నించారు.

కి.మీ.కు 20 పైసల చొప్పున టికెట్ ఛార్జీల పెంపు
ఆర్టీసీ కోసం రాష్ట్ర ప్రభుత్వం తక్షణం రూ. 100 కోట్లు కేటాయిస్తున్నట్లు కేసీఆర్ వెల్లడించారు. ఆర్టీసీ సంస్థను పరిరక్షించే క్రమంలో టికెట్ ఛార్జీలు పెంచుతున్నట్లు తెలిపారు. కిలోమీటరుకు 20 పైసల చొప్పున ఛార్జీలు పెంచుతున్నట్లు చెప్పారు. ఆర్టీసీలో ప్రస్తుతం నెలకొన్న సంక్షోభాన్ని నివారించడానికే ఈ నిర్ణయం తీసుకున్నామని.. ప్రజలు కూడా అర్థం చేసుకోవాలని తెలిపారు. పెరిగిన ఛార్జీలు సోమవారం నుంచి అమల్లోకి రానున్నాయి.

సింగరేణి కార్మికులు ఇటీవల లక్షా 60 వేల రూపాయలు బోనస్‌గా తీసుకున్నారని సీఎం కేసీఆర్ గుర్తు చేశారు. చెప్పిన మాట వింటే.. ఆర్టీసీ సంస్థ కూడా బాగుపడుతుందని వ్యాఖ్యానించారు. డిపో నుంచే ఇద్దరు చొప్పున కార్మికులతో వర్కర్స్ వెల్ఫేర్స్ కౌన్సిల్‌ను ఏర్పాటు చేస్తామని కేసీఆర్ చెప్పారు. వారిని నేరుగా రవాణా శాఖ మంత్రికి అటాచ్ చేస్తామని.. క్రమం తప్పకుండా వారితో మాట్లాడి సమస్యల గురించి ఎప్పటికప్పుడు తెలుసుకుంటామని చెప్పారు.




Please Read Disclaimer