కేటీఆర్ అవినీతిపై కేసీఆర్‌కు లేఖ రాస్తావా?.. వీహెచ్ మండిపాటు

0

కేటీఆర్ ఆస్తులపై విచారణ జరిపించాలని సీఎంకు రేవంత్ రెడ్డి లేఖ రాయడాన్ని కాంగ్రెస్ సీనియర్ నేత వీహెచ్ తప్పుబట్టారు. లేఖను సీఎంకు కాకుండా కేంద్ర హోంమంత్రి అమిత్ షాకు రాసి ఉంటే బాగుండేదని సూచించారు. కేటీఆర్ ఆస్తులపై కేసీఆర్ విచారణ జరిపిస్తారనే నమ్మకం ఏమాత్రం లేదని వ్యాఖ్యానించారు. ఆదివారం ఆయన మీడియాతో మాట్లాడారు.

కేటీఆర్ చేసిన అవినీతిపై సమగ్ర విచారణ జరిపించాలని శనివారం కాంగ్రెస్ ఎంపీ రేవంత్ రెడ్డి డిమాండ్ చేశారు. ఈ మేరకు ముఖ్యమంత్రి కేసీఆర్‌కు బహిరంగ లేఖ రాశారు. జీవో నెంబరు 111 పరిధిలో బినామీ పేరుతో రాజమహల్ వంటి ఇల్లు కట్టుకున్నారని లేఖలో పేర్కొన్నారు. ఆ జీవో పరిధి నుంచి కొన్ని గ్రామాల మినహాయింపు ఆలోచన వెనుక కుట్ర దాగి ఉందని రేవంత్ ఆరోపించారు. 2014లో రూ.8 కోట్లుగా ఉన్న కేటీఆర్ ఆస్తి.. 2018 నాటికి రూ.41 కోట్లకు పెరగడం వెనుక ఆంత్యం ఏంటని ప్రశ్నించారు. టీఆర్ఎస్ పార్టీ విరాళాలు కూడా భారీగా ఎలా పెరిగాయని నిలదీశారు. రాష్ట్రం అప్పుల్లో ఉంటే మీ కుటుంబం ఎలా రూ.వేల కోట్లు సంపాదించిందంటూ ప్రశ్నించారు. కేటీఆర్ అవినీతి బాగోతంపై సమగ్ర వివరాలతో పుస్తకం వేయిస్తానని రేవంత్ రెడ్డి శనివారం చెప్పారు.

నేను కూడా పీసీసీ రేసులో.. :వీహెచ్
మరోవైపు, తెలంగాణలో పీసీసీ అధ్యక్షుడి రేసులో తాను సైతం ఉన్నట్లు వీహెచ్‌ స్పష్టం చేశారు. టీపీసీసీ ర‌థ‌సార‌థిగా బీసీ నేతను నియమించాలని కోరారు. ఇందుకు పార్టీ నేతలు కూడా సహకరించాలని అభ్యర్థించారు. తెలంగాణ సీఎం కేసీఆర్‌ కూడా బీసీలకు ఆత్మగౌరవ భవనాలు కట్టిస్తూ వారందరినీ తమవైపునకు తిప్పుకుంటున్నారని, ఓటు బ్యాంకు కోసమైనా బీసీలకు పీసీసీ అధ్యక్ష పదవి ఇవ్వాలని సూచించారు. అయితే, తనను పీసీసీ పదవి ఇచ్చే విషయంలో వయస్సును సాకుగా చూపడం సరికాదని అన్నారు.




Please Read Disclaimer