చరిత్రలో ఫస్ట్‌టైమ్.. భారీగా పతనమైన రూపాయి.. కరోనా దెబ్బకి మార్కెట్ ట్రేడింగ్ బంద్!

0

కరోనా వైరస్ దెబ్బకి స్టాక్ మార్కెట్ బేర్‌మంది. పేకమేడలా కూలిపోయింది. ఆరంభంలోనే భారీగా పతనమైంది. దేశంలో లాక్‌డౌన్ పరిస్థితులు ఇందుకు ప్రధాన కారణం. సోమవారం బెంచ్‌మార్క్ సూచీలు ఏకంగా 10 శాతం పడిపోయాయి. ఇండెక్స్‌లు లోయర్ సర్క్యూట్‌ను తాకాయి. దీంతో స్టాక్ మార్కెట్ ట్రేడింగ్‌ను 45 నిమిషాల పాటు నిలిపివేశారు.

బీఎస్‌ఈ సెన్సెక్స్ ఏకంగా 2,718 పాయింట్లు కూప్పకూలింది. 27,198 పాయింట్లకు క్షీణించింది. సోమవారం ట్రేడింగ్ ప్రారంభమైన కొన్ని నిమిషాల్లోనే ఇండెక్స్ ఈ స్థాయిలో పతనం కావడం గమనార్హం. ఇక ఎన్ఎస్‌ఈ నిఫ్టీ ఏకంగా 804 పాయింట్లు పడిపోయింది. 7,942 పాయింట్లకు దిగొచ్చింది. అన్ని రంగాల్లోనూ అమ్మకాల సునామీ కనిపించింది.

బ్యాంక్ నిఫ్టీ ఇండెక్స్ ఏకంగా 9 శాతం పతనమైంది. నిఫ్టీలో ఫైనాన్షియల్ రంగం ఏకంగా 42 శాతం వాటాను కలిగి ఉంటుంది. అందుకే నిఫ్టీ నిట్టనిలువుగా కుప్పకూలింది. కేవలం నిఫ్టీ బ్యాంక్ మాత్రమే కాకుండా ఇతర సెక్టోరల్ ఇండెక్స్‌లన్నీ కూడా నష్టాల్లోనే ట్రేడయ్యాయి.

బజాజ్ ఫైనాన్స్, యాక్సిస్ బ్యాంక్, మారుతీ సుజుకీ, అల్ట్రాటెక్ సిమెంట్, శ్రీ సిమెంట్, ఐసీఐసీఐ బ్యాంక్ వంటి షేర్లు భారీగా నష్టపోయాయి. ఇవి 10 శాతం నుంచి 13 శాతం మధ్యలో పతనమయ్యాయి. సెన్సెక్స్ ఈ స్థాయిలో పడిపోవడానికి హెచ్‌డీఎఫ్‌సీ బ్యాంక్, రిలయన్స్ ఇండస్ట్రీస్, ఐసీఐసీఐ బ్యాంక్ షేర్లలో నష్టాలు ప్రధాన కారణంగా చెప్పుకోవచ్చు.

ఇకపోతే మరోవైపు అమెరికా డాలర్‌తో పోలిస్తే ఇండియన్ రూపాయి నిట్టనిలువునా పడిపోయింది. తొలిసారిగా 76 మార్క్ కిందకు వచ్చేసింది. డాలర్‌తో పోలిస్తే రూపాయి ఈరోజు 76.15 స్థాయికి పతనమైంది. ఇన్వెస్టర్లు సురక్షితనమైన ఇన్వెస్ట్‌మెంట్ సాధనాల్లో ఇన్వెస్ట్ చేయడానికి అధిక ప్రాధాన్యం ఇవ్వడం ఇందుకు కారణం. వీళ్లు డాలర్ల రూపంలో ఇన్వెస్ట్ చేస్తారు. దీంతో అమెరికా డాలర్ బలపడింది.




Please Read Disclaimer


30రూ|| మాస్క్ కేవలం 2రూ|| కే తయారు చేసుకోండి Make your own mask for Just Rs.2/-