బీజేపీ గూటికి మోత్కుపల్లి.. కేసీఆర్‌కు ఆ రకంగా చిక్కులే!

0

తెలంగాణలో కీలక నేతగా గుర్తింపు ఉన్న మోత్కుపల్లి నర్సింహులు బీజేపీ తీర్థం పుచ్చుకోవడానికి రంగం సిద్ధం చేసుకున్నారు. మంగళవారం (జనవరి 7) ఢిల్లీలో కమలం పార్టీ వర్కింగ్ ప్రెసిడెంట్ జేపీ నడ్డా సమక్షంలో ఆయన బీజేపీ తీర్థం పుచ్చుకోనున్నారు. బీజేపీ రాష్ట్ర అధ్యక్షుడు కె లక్ష్మణ్‌తో కలిసి సోమవారం సాయంత్రమే ఆయన ఢిల్లీ చేరుకున్నారు. వాస్తవానికి మోత్కుపల్లి 2019 నవంబర్ 4నే బీజేపీ అధ్యక్షుడు అమిత్ షా, జేపీ నడ్డాతో భేటీ అయ్యారు. నాటి నుంచి పార్టీ నేతలతో టచ్‌లో ఉన్నారు. అయితే.. అధికారికంగా పార్టీలో మాత్రం చేరలేదు. తెలంగాణ మున్సిపల్ ఎన్నికల నేపథ్యంలో పార్టీలో చేరడానికి ఇదే అనువైన సమయంగా భావించినట్లు తెలుస్తోంది.

టీడీపీలో కీలక నేతగా ఎదిగిన మోత్కుపల్లి ఉమ్మడి ఆంధ్రప్రదేశ్ చంద్రబాబు నాయుడు హయాంలో మంత్రిగా పనిచేశారు. అసెంబ్లీ ఎన్నికలకు ముందు ఆయన టీడీపీకి గుడ్‌బై చెప్పారు. చంద్రబాబుపై తీవ్ర విమర్శలు గుప్పించడమే కాకుండా.. కేసీఆర్ పనితీరును మెచ్చుకున్నారు. తెలంగాణలో టీడీపీని టీఆర్‌ఎస్‌లో విలీనం చేయాలంటూ సంచలన వ్యాఖ్యలు చేశారు. దీంతో ఆయన టీఆర్‌ఎస్‌లో చేరతారంటూ ఆ మధ్య జోరుగా ప్రచారం జరిగింది. కానీ, కేసీఆర్ నుంచి ఎలాంటి హింట్ రాకపోవడంతో ఆ ప్రయత్నాలు మానుకున్నట్లు తెలుస్తోంది.

తెలంగాణలో అధికార టీఆర్‌ఎస్‌ పార్టీకి తామే ప్రత్యామ్నాయం అని చెప్పుకుంటున్న బీజేపీ రాష్ట్రంలో క్రమంగా బలపడుతోంది. మోత్కుపల్లి చేరికతో ఆ పార్టీ మరింత దూకుడు పెంచే అవకాశం ఉంది. తెలంగాణ ఉద్యమ సమయంలో కేసీఆర్‌పై ఘాటు విమర్శలు చేసిన వ్యక్తిగా మోత్కుపల్లికి గుర్తింపు ఉంది. ఒక దశలో కేసీఆర్‌కు దీటైన నేతగా ఆయణ్ని ప్రచారం చేశారు. ఈ నేపథ్యంలో కేసీఆర్‌కు కొత్త తలనొప్పి మొదలైనట్టేనని రాజకీయ వర్గాల్లో చర్చ జరుగుతోంది.

మరోవైపు.. తెలంగాణలో టీడీపీ నుంచి బీజేపీలోకి వలసల పర్వం కొనసాగుతోంది. ఎంపీ గరికపాటి మోహన్ రావు నేతృత్వంలో పలువురు కీలక నేతలు బీజేపీ పార్టీలో చేరడం కొనసాగుతోంది. టీడీపీలో కీలకంగా పనిచేసిన నేతలందరినీ బీజేపీ గూటికి చేర్చడంలో ఎంపీ గరికపాటి సఫలీకృతులవుతున్నారు.




Please Read Disclaimer