రోగి ద్వారా కరోనా.. తెలంగాణలో తొలి కేసు, కూకట్‌పల్లిలో ఆందోళన

0

తెలంగాణలో తొలిసారిగా స్థానికుడికి కరోనా వైరస్ సోకింది. కరోనా బారిన పడ్డ రోగి ద్వారా అతడికి ఈ వైరస్ సోకింది. కరోనా వైరస్ వ్యాప్తికి సంబంధించి రెండో దశగా పేర్కొంటున్న ఈ తరహాలో రాష్ట్రంలో ఓ కేసు నమోదవడం ఇదే తొలిసారి. రోగితో డైరెక్ట్ కాంటాక్ట్ ద్వారా వైరస్ సోకుతుంది. ఈ పరిస్థితి ఇలాగే కొనసాగితే.. క్రమంగా మూడో దశకు చేరి సమూహ వ్యాప్తి చెందుతుంది. అదే జరిగితే పరిస్థితి ఊహించలేం. చైనాలో, ప్రస్తుతం ఇటలీలో ఆందోళనకర పరిస్థితికి ఇదే కారణం.

శనివారం (మార్చి 21) సాయంత్రం వరకు రాష్ట్రంలో 21 కరోనా పాజిటివ్ కేసులు నమోదయ్యాయి. అయితే.. వీటిలో 20 కేసులు విదేశాల నుంచి వచ్చిన వారే కాగా.. తొలిసారిగా విదేశాల నుంచి వచ్చిన రోగి ద్వారా కరోనా పాజిటివ్ కేసు నమోదైంది. హైదరాబాద్‌లోని కూకట్‌పల్లిలో ఈ ఘటన జరిగింది. మార్చి 14న దుబాయ్ నుంచి ఓ వ్యక్తి హైదరాబాద్ వచ్చాడు. మార్చి 19న అతడికి కరోనా సోకినట్లు ప్రభుత్వం (P14 కేసు) ప్రకటించింది.

మార్చి 14న దుబాయ్ నుంచి వచ్చిన సదరు వ్యక్తి 17 వరకు ఇంట్లోనే ఉన్నాడు. అతడితో పాటు గదిలో 35 ఏళ్ల మరో వ్యక్తి ఉన్నాడు. దుబాయ్ నుంచి వచ్చిన రోగి ద్వారా ఇతడికి కరోనా సోకింది. ఈ విషయాన్ని తెలంగాణ వైద్య, ఆరోగ్య శాఖ విడుదల చేసిన హెల్త్ బులిటెన్‌లో పేర్కొన్నారు. దుబాయ్ నుంచి వచ్చిన వ్యక్తికి 17న దగ్గు, జ్వరం లక్షణాలు కనిపించడంతో ఆస్పత్రిలో చేరగా.. అతడి నమూనాలు పరీక్షలకు పంపించారు. రిపోర్టుల్లో కరోనా పాజిటివ్ అని తేలింది.

రాష్ట్రంలో నమోదైన 21 కేసుల్లో 20 మంది విదేశాల నుంచి వచ్చిన వారే కావడం గమనార్హం. తొలిసారిగా రోగి ద్వారా స్థానికుడికి కరోనా సోకడం కలకలం రేపుతోంది. మొదటి కేసుకు సంబంధించిన బాధితుడు పూర్తిగా కోలుకొని ఆస్పత్రి నుంచి డిచ్ఛార్జ్ కాగా.. మిగిలిన పేషంట్లు కోలుకుంటున్నారని అధికారులు వెల్లడించారు. వీరిలో ఎవరికీ ప్రమాదం లేదని వివరించారు.

ఇండోనేషియా బృందం ద్వారా ఇప్పటివరకు రాష్ట్రంలోని ఏ వ్యక్తికీ కరోనా వ్యాప్తి చెందకపోవడం గమనార్హం. ఈ విషయాన్ని సీఎం కేసీఆర్ మీడియా సమావేశంలో వెల్లడించారు. ఇండోనేషియన్లు ప్రయాణించిన ఆటో డ్రైవర్‌కు కూడా వైరస్ సోకలేదని ఆయన తెలిపారు. కరీంనగర్ పట్టణంలోనూ ఏ ఒక్కరిలో కరోనా లక్షణాలు బయటపడలేదని వివరించారు. ఇది ఊరటనిచ్చే వార్త.

అటు దేశంలో కరోనా పాజిటివ్ కేసుల సంఖ్య 306కు చేరింది. మహారాష్ట్రలో పరిస్థితి ఆందోళనకరంగా ఉంది. తమిళనాడులో 6 కేసులు నమోదైన నేపథ్యంలో ఆ రాష్ట్రం తన సరిహద్దులన్నింటినీ మూసివేస్తూ నిర్ణయం తీసుకుంది. కరోనా నియంత్రణ చర్యల్లో భాగంగా ప్రధాని మోదీ పిలుపు మేరకు ఆదివారం జనతా కర్ఫ్యూ పాటిస్తున్న యావత్ దేశం.




Please Read Disclaimer


30రూ|| మాస్క్ కేవలం 2రూ|| కే తయారు చేసుకోండి Make your own mask for Just Rs.2/-