భారత్‌ని చూసి బుద్ధి తెచ్చుకోండి.. పాక్ ప్రజలపై అక్తర్ మండిపాటు

0

కరోనా వైరస్ వ్యాప్తిని అడ్డుకోవడంలో భారతదేశ ప్రజలు చూపుతున్న చొరవని పాకిస్థాన్ మాజీ ఫాస్ట్ బౌలర్ షోయబ్ అక్తర్ ప్రశంసించాడు. ప్రధాని నరేంద్ర మోడీ పిలుపు మేరకు సుమారు 130 కోట్ల మంది జనతా కర్ఫ్యూలో ఆదివారం భాగస్వామ్యం కావడాన్ని పరోక్షంగా ప్రస్తావించిన షోయబ్ అక్తర్.. కరోనా వైరస్ కట్టడిలో పాకిస్థాన్ ప్రభుత్వం అలక్ష్యంగా వ్యవహరిస్తోందని విమర్శించాడు. ఇప్పటికీ పాక్ ప్రజల్లో కరోనా వైరస్ వ్యాప్తిపై అవగాహన లేదని చెప్పుకొచ్చిన అక్తర్.. దొరికిన సెలవుల్లో అందరూ విహారయాత్రలకి వెళ్తుండటం శోచనీయమని వెల్లడించాడు. పాక్‌లో ఇప్పటికే సుమారు 700 కరోనా వైరస్ పాజిటివ్ కేసులు నమోదైనట్లు సమాచారం.

షోయబ్ అక్తర్ తన యూట్యూబ్ ఛానల్‌లో మాట్లాడుతూ ‘‘ఆదివారం చాలా ముఖ్యమైన పని మీద ఇంటి వెలుపలికి వెళ్లాల్సి వచ్చింది. అయితే.. అక్కడికి వెళ్లి నేను ఎవరికీ షేక్‌ హ్యాండ్స్ లేదా హగ్స్ ఇవ్వలేదు. నా ప్రయాణం మొత్తం కారు అద్దాలు మూసి ఉంచాను. కానీ.. రోడ్డుపై ప్రజలు నిర్లక్ష్యంగా ప్రయాణించడాన్ని గమనించాను. ఓ బైక్‌పై నలుగురు యువకులు వెళ్తున్నారు. సెలవు కావడంతో వారు విహారయాత్రకి వెళ్తున్నారట. అలానే రోడ్డుపైనే కొంత మంది భోజనాలు చేయడాన్ని నేను గమనించాను. కరోనా వైరస్ కట్టడికి భారత్‌లో కర్ఫ్యూని విధించారు. మరి పాకిస్థాన్‌లో ఎందుకు ఎలాంటి రక్షణాత్మక చర్యలు తీసుకోవడం లేదు..? కరోనా వైరస్ ఎక్కువగా మనుషుల కాంటాక్ట్ ద్వారానే వస్తుంది. కానీ.. పాక్ ప్రభుత్వం అలక్ష్యం కారణంగా ప్రజలు ఎవరూ ఇళ్లలో ఉండటం లేదు. ఇది దేశానికి ప్రమాదకరంగా మారబోతోంది’’ అని అక్తర్ ఆందోళన వ్యక్తం చేశాడు.

కరోనా వైరస్ కారణంగా పాకిస్థాన్ సూపర్ లీగ్‌ని సెమీస్ దశలో రద్దు చేసిన పాకిస్థాన్ క్రికెట్ బోర్డు.. విదేశీ క్రికెటర్లని ఆగమేఘాల మీద వారి స్వదేశాలకి పంపించేసింది. ఇదే క్రమంలో ఆ టోర్నీలో ఆడిన క్రికెటర్లందరికీ కరోనా వైరస్ పరీక్షలు నిర్వహించింది. కానీ.. అన్నీ నెగటివ్‌గా తేలినట్లు ప్రకటించింది.




Please Read Disclaimer


30రూ|| మాస్క్ కేవలం 2రూ|| కే తయారు చేసుకోండి Make your own mask for Just Rs.2/-