PF ఖాతాదారులకు మోదీ శుభవార్త.. ఈ కొత్త రూల్‌‌తో ఇక మీ కుటుంబానికి రూ.7 లక్షలు!

మీరు ఉద్యోగం చేస్తున్నారా? మీకు ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) అందించే పీఎఫ్ అకౌంట్ ఉందా? అయితే మీకు శుభవార్త. కేంద్ర ప్రభుత్వం తాజాగా పీఎఫ్ ఖాతాదారులకు తీపికబురు అందించింది. దీంతో పీఎఫ్ అకౌంట్ కలిగిన వారి కుటుంబాలకు ప్రయోజనం కలుగనుంది.

ఈపీఎఫ్‌వో ఎంప్లాయీస్ డిపాజిట్ లింక్డ్ ఇన్సూరెన్స్ (EDLI) కింద లబ్దిదారులకు అందించే గరిష్ట హామీ ప్రయోజనాన్ని పెంచిందని కేంద్ర కార్మిక శాఖ తెలియజేసింది. ఇప్పుడు పీఎఫ్ చందాదారులు ఈడీఎల్ఐ స్కీమ్ కింద గరిష్టంగా రూ.7 లక్షల వరకు ప్రయోజనం పొందొచ్చని పేర్కొంది. ఇది వరకు రూ.6 లక్షల వరకే ఈ బెనిఫిట్ లభించేది. పీఎఫ్ అకౌంట్ కలిగిన వారు ప్రమాదవశాత్తు లేదా అనారోగ్యం కారణంగా మరణిస్తే.. వారి కుటుంబాలకు ఈ డబ్బులను అందజేస్తారు. దీంతో కుటుంబాలకు ఆర్థిక భద్రత లభిస్తుంది.

ఉద్యోగి మరణించినప్పుడు కుటుంబాలకు ఆర్థిక భద్రత కల్పించడమే ఈడీఎల్ఐ ముఖ్య లక్ష్యం. కంపెనీ, కేంద్ర ప్రభుత్వం రెండూ కలిసి ఉద్యోగికి ఈడీఎల్ఐ కింద ఆర్థిక తోడ్పాటు అందిస్తాయి. ఈపీఎఫ్, ఈపీఎస్ ప్రాతిపదికన ఈ స్కీమ్ లభిస్తుంది. ఈ బెనిఫిట్ పొందాలంటే ఉద్యోగి కంపెనీలో కనీసం ఏడాదిపాటు పని చేస్తూ ఉండాలి.

ఉద్యోగి మరణిస్తే నామినీకి ఇన్సూరెన్స్ డబ్బులు అందజేస్తారు. ఒకవేళ నామినీ మైనర్ అయితే ఆ డబ్బులను గార్డియన్‌కు ఇస్తారు. ఇన్సూరెన్స్ డబ్బులు పొందాలంటే ఉద్యోగి డెత్ సర్టిఫికెట్, బ్యాంక్ వివరాలు, వారసత్వ ధృవీకరణ పత్రం వంటి వాటిని అందించాలి. ఒకవేళ ఉద్యోగి పీఎఫ్ అకౌంట్‌కు నామినీ లేకపోతే.. అప్పుడు చట్టపరమైన వారసుడు పీఎఫ్ డబ్బులను క్లెయిమ్ చేసుకోవచ్చు. అలాగే ఇన్సూరెన్స్ ఫామ్‌ను అందించొచ్చు.

మరోవైపు ఉద్యోగులకు ఇటీవలనే ఈపీఎఫ్‌వో మరో గుడ్ న్యూస్ అందించిన విషయం తెలిసిందే. 2019-20 ఆర్థిక సంవత్సరానికి సంబంధించి వడ్డీ రేట్లను నిర్ణయించింది. 8.5 శాతం వడ్డీ రేటును చెల్లిస్తామని ప్రకటించింది. దీంతో పీఎఫ్ ఖాతాదారులకు బెనిఫిట్ కలుగనుంది. ఈపీఎఫ్‌వో ప్రస్తుతం ఈపీఎఫ్‌వో 8.15 శాతం వడ్డీని అందిస్తోన్న విషయం తెలిసిందే. ఇక మిగతా 0.35 శాతం వడ్డీని ఈపీఎఫ్‌వో డిసెంబర్‌లో చెల్లిస్తుంది. అంటే ఈపీఎఫ్‌వో తన సబ్‌స్క్రైబర్లకు రెండు విడతల్లో వడ్డీ రేటు చెల్లిస్తుందని గమనించాలి.