ఒక్క నియోజకవర్గానికే రూ.100 కోట్లిచ్చి ఆర్టీసీకి రూ.47 కోట్లు ఇవ్వలేరా: హైకోర్టు

0

బ్యూరోక్రాట్లు వాస్తవాలను మరుగున పెడుతున్నారని తెలంగాణ హైకోర్టు ఆగ్రహం వ్యక్తం చేసింది. తమకు సమర్పించే నివేదికలో అతి తెలివి ప్రదర్శిస్తున్నారని న్యాయస్థానం అసహనం వ్యక్తం చేసింది. ఆర్టీసీ అంశంపై ఉన్నత న్యాయస్థానం మంగళవారం (అక్టోబర్ 29) మరోసారి విచారణ చేపట్టింది. సమ్మె విరమించాలని కార్మికులను ఆదేశించలేమని ఆర్టీసీ యాజమాన్యానికి స్పష్టం చేసింది. ఆర్టీసీకి రూ.47 కోట్లు ఇవ్వగలరా? లేదా? స్పష్టం చేయాలని ప్రభుత్వాన్ని ఆదేశించింది. హుజూర్‌నగర్ నియోజకవర్గానికి రూ.100 కోట్లు ఇవ్వగలిగినప్పుడు ఆర్టీసీకి రూ.47 కోట్లు ఎందుకు ఇవ్వలేరని నిలదీసింది.

బ్యాంకు గ్యారంటీ రూ.850 కోట్లు కట్టమని ఆర్టీసీకి చెప్పిన ప్రభుత్వం.. గ్యారంటీగా ఉన్నారు తప్పితే ఒక్క రూపాయి కూడా బ్యాంకుకు కట్టలేదని న్యాయస్థానం మొట్టికాయలు వేసింది. అధికారులు న్యాయస్థానం ముందు ఉన్న వాస్తవాలను నిజాయతీగా ఒప్పుకోవాలని వ్యాఖ్యానించింది. ఉద్దేశ పూర్వకంగా, అస్పష్టంగా, అభూతకల్పనలతో నివేదిక ఇచ్చారని కోర్టు తీవ్ర అసంతృప్తి వ్యక్తం చేసింది.

ర్టీసీకి రాష్ట్ర ప్రభుత్వం రూ.47 కోట్లు ఇవ్వలేదా అని కోర్టు మరోమారు ప్రశ్నించింది. రూ.47 కోట్లు వెంటనే ఇవ్వలేమని.. కొంత గడువు ఇస్తే ప్రయత్నిస్తామని న్యాయస్థానానికి ప్రభుత్వం సమాధానం ఇచ్చింది. ఈ సందర్భంగా ఉపఎన్నిక జరిగిన హుజూర్‌నగర్ నియోజకవర్గానికి రూ.100 కోట్ల వరాలు ప్రకటించిన అంశాన్ని కోర్టు గుర్తు చేసింది.

నియోజకవర్గం ముఖ్యమా.. రాష్ట్ర ప్రయోజనాలా?
‘ప్రభుత్వానికి ఒక్క నియోజకవర్గం ప్రజలు ముఖ్యమా? రాష్ట్ర ప్రజల ప్రయోజనాలు ముఖ్యమా? 100 కోట్ల రూపాయల వరాలు ప్రకటించిన వాళ్లకు ప్రజల ఇబ్బందులు తొలగించడానికి ఆర్టీసీకి రూ.47 కోట్లు ఇవ్వలేరా?’ అంటూ ప్రభుత్వ ప్రధాన కార్యదర్శిని హైకోర్టు ప్రశ్నించింది.

రాష్ట్రాల పునర్విభజన తర్వాత నేటివరకు ఆర్టీసీ ఆస్తులు, అప్పుల పంపకాలు ఎందుకు జరగలేదని హైకోర్టు ప్రశ్నించింది. ఆ పంపకాలు అంశం కేంద్రం పరిధిలో ఉందని తెలంగాణ ఏజీ సమాధానం ఇచ్చారు. రీఎంబర్స్‌మెంట్ బకాయిలు రూ.1099 కోట్లు ఉన్నాయని హైకోర్టు అడిగిన ప్రశ్నకు సర్కారు బదులిచ్చింది.

బకాయిల్లో 42 శాతం తెలంగాణ, 58 శాతం ఏపీ చెల్లించాలని ప్రభుత్వం న్యాయస్థానానికి సమాధానంగా చెప్పింది. బ్యూరోక్రాట్లు వాస్తవాలను మరుగున పెడుతున్నారని.. తెలివిగా మాట్లాడి నిజాలను దాస్తున్నారని హైకోర్టు వ్యాఖ్యానించింది. ఆర్టీసీకి ఎంత ఇచ్చారో చెప్పమని తాము అడగలేదని.. బకాయిలు ఎంత ఉన్నాయో స్పష్టంగా తెలపమన్నామని న్యాయస్థానం పేర్కొంది. ప్రభుత్వం చెల్లించిన రూ.4253 కోట్లలో రీయింబర్స్‌మెంట్‌ బకాయిలు ఉన్నాయా? బకాయిలు చెల్లించాల్సిన అవసరం లేదా అని న్యాయస్థానం ప్రశ్నించింది.

బకాయిల వివరాలపై అక్టోబర్ 31లోగా నివేదించాలని ఆర్టీసీ ఎండీని హైకోర్టు ఆదేశించింది. ఆర్టీసీలో ఆర్థిక వ్యవహారాలు చూసే అధికారి నవంబర్ 1న న్యాయస్థానంలో హాజరు కావాలని ఆదేశాల్లో పేర్కొంది. జీహెచ్‌ఎంసీ రూ.335 కోట్లు చెల్లించిందా? లేదా? అనే విషయాన్ని తెలపాలని ఆర్టీసీ ఎండీని ఆదేశించింది. ఆర్టీనీ సమ్మెపై విచారణను హైకోర్టు వాయిదా వేసింది. కార్మికుల సమ్మె, బకాయిల చెల్లింపు తదితర అంశాలపై విచారణ చేపట్టిన న్యాయస్థానం.. తదుపరి విచారణను శుక్రవారం (నవంబర్‌ 1)కి వాయిదా వేసింది.




Please Read Disclaimer