ప్రశాంత్ ప్రేమకు పాక్‌కు సంబంధం ఏంటి? సరిహద్దు ఎలా దాటాడు? కీలక వివరాలు..

0

మైదం ప్రశాంత్.. ప్రస్తుతం తెలుగు ప్రజల నోళ్లలో నానుతున్న పేరిది. ‘మమ్మీ, డాడీ బావున్నారా.. నన్ను ఇక్కడ కోర్టుకు తీసుకొచ్చారు’ అంటూ అతడు మాట్లాడుతున్న వీడియో ఒకటి సోషల్ మీడియాలో వైరల్ అవుతోంది. హైదరాబాద్‌కు చెందిన ఈ యువకుడు ఇప్పుడు పాక్ చెరలో ఉన్నట్లు తెలియడంతో దేశం ఉలిక్కిపడింది. ప్రశాంత్‌తో పాటు మరో భారతీయుడిని కూడా అరెస్టు చేసినట్లు పాక్ పోలీసులు చెబుతున్నారు. భారత్‌కు చెందిన ఓ సాఫ్ట్‌వేర్ ఉద్యోగి అక్రమంగా పాకిస్థాన్‌లోకి చొరబడ్డాడని.. ఆధునిక సాంకేతికతతో అక్కడ పెద్ద ఎత్తున పేలుళ్లు జరపడానికి కుట్ర జరిగిందని పాక్ పత్రికల్లో కొన్ని కథనాలు కూడా వచ్చినట్లు తెలియడం కలవరానికి గురి చేస్తోంది.

అసలు ప్రశాంత్.. పాక్ పోలీసుల చేతికి ఎలా చిక్కాడు? అతడి లవ్ స్టోరీకి, పాక్‌కు సంబంధం ఏంటి? ప్రశాంత్ పాక్ చెరలో ఉన్నట్లు ఇండియన్ రా ఏజెంట్ 10 నెలల కిందటే చెబితే.. ఇప్పటిదాకా ఎందుకు పట్టించుకోలేదు? ఇలాంటి ప్రశ్నలు వేధిస్తున్నాయి. ఈ నేపథ్యంలో ప్రశాంత్, అతడు పాక్ గడ్డపైకి వెళ్లిపోయిన ఘటనకు సంబంధించిన కొన్ని కీలక విషయాలు తెలుసుకునే ప్రయత్నం చేద్దాం..

తనతో పనిచేసిన ఓ అమ్మాయితో ప్రేమలో పడి.. ఆమెను వెతుక్కుంటూ ప్రశాంత్ పాక్ భూభాగంలోకి వెళ్లిపోయినట్లు భావిస్తున్నారు. రాజస్థాన్‌ సమీపంలోని చోలిస్థాన్ వద్ద నవంబర్ 14న అతడిని పాక్ పోలీసులు అరెస్టు చేసినట్లు మీడియా కథనాల ద్వారా తెలుస్తోంది. రాజస్థాన్‌లోని శ్రీగంగానగర్ సరిహద్దులకు చేరువలో ఈ చోలిస్థాన్ ఉంది. ఈ ప్రదేశంలో భూభాగం, వాతావరణ పరిస్థితులు అత్యంత సంక్లిష్టంగా ఉన్నాయి.

రాజస్థాన్‌లోని థార్ ఎడారిలో ప్రచండ గాలులు వీస్తుంటాయి. ఈ ప్రచండ గాలులకు కొన్నిసార్లు ఇసుక తిన్నెలు ఒక చోట నుంచి మరో చోటుకి మారుతాయి. ఫలితంగా భారత్-పాక్ సరిహద్దు వెంట ఉన్న కంచె కొన్నిసార్లు కనిపించదని అధికారులు చెబుతున్నారు. ఇలాంటి సమయాల్లో కొంత మంది పొరపాటున పాక్ భూభాగంలోకి వెళ్లిపోతుంటారు. భారత్ సందర్శించడానికి వచ్చిన కొంత మంది విదేశీ పర్యాటకులు ఇలాగే సరిహద్దు దాటి వెళ్లిపోయిన ఘటనలు గతంలో చోటు చేసుకున్నాయి. ప్రశాంత్ కూడా ఇలాగే పాక్ గడ్డపైకి వెళ్లిపోయాడేమో అని అనుమానిస్తున్నారు.

courtesy: samayam

అయితే.. ప్రశాంత్ మతిస్థిమితం కూడా సరిగా లేదని అతడి కుటుంబ సభ్యులు చెబుతుండటం ఈ ఘటనలో మరో విషాద కోణం. ఆశ్చర్యకరమైన విషయం ఏమిటంటే.. అతడు రెండున్నరేళ్ల కిందటే ఇంటి నుంచి వెళ్లిపోయాడు. మాదాపూర్‌లో ఓ ఐటీ కంపెనీలో పనిచేస్తున్న ప్రశాంత్.. 2017 ఏప్రిల్ 28న ఆఫీస్‌కు వెళ్లి ఇంటికి తిరిగి రాలేదు. ఆ మరుసటి రోజే అతడి తండ్రి బాబు రావు పోలీస్ స్టేషన్‌కు వెళ్లి తమ కుమారుడు కనిపించడం లేదంటూ ఫిర్యాదు చేశాడు.

బాబురావు చెప్పిన వివరాలను ఆధారంగా చేసుకొని పోలీసులు ప్రశాంత్ కోసం గాలించారు. కానీ, అతడు ఎక్కడికి వెళ్లాడు? ఏమయ్యాడు అనేది మిస్టరీగా మారింది. తాజాగా ప్రశాంత్‌కు సంబంధించిన వీడియో బయటకి రావడంతో అతడి కుటుంబ సభ్యుల్లో ఆశలు చిగురించాయి. కానీ, అతడు దాయాది దేశ చెరలో ఉన్నట్లు తెలియడంతో వాళ్లు కన్నీరుమున్నీరవుతున్నారు.

తన కుమారుడు అమాయకుడని.. చాలా మంచివాడని, ఎవరికీ ఎలాంటి హాని చేసే తత్వం అతడిది కాదని ప్రశాంత్ తండ్రి బాబురావు చెబుతున్నాడు. అతడి గర్ల్‌ఫ్రెండ్ దూరం కావడంతో డిప్రెషన్‌లోకి వెళ్లిపోయాడని.. పొరపాటున పాక్ గడ్డపైకి వెళ్లిపోయి ఉంటాడని పోలీసుల వద్ద ఆవేదన వ్యక్తం చేశారు. బాబురావు చెప్పిన వివరాల ప్రకారం.. ప్రశాంత్ ప్రేమించిన యువతి 2013 తర్వాత స్విట్జర్లాండ్ వెళ్లిపోయింది. దీంతో అతడు డిప్రెషన్‌కు గురయ్యాడు. అయితే.. గర్ల్‌ఫ్రెండ్ స్విట్జర్లాండ్ వెళ్లిపోతే అతడు పాక్ వైపు ఎందుకు వెళ్లాడనేది ఇక్కడ మరో మిస్టరీ.

ఇక ప్రశాంత్ కుటుంబ నేపథ్యం విషయానికి వస్తే.. అతడి స్వస్థలం విశాఖపట్నం. 2010లో ఇంజనీరింగ్ పూర్తి చేసిన వెంటనే అతడికి బెంగళూరులో ఓ సాఫ్ట్‌వేర్ కంపెనీలో ఉద్యోగం వచ్చింది. 2010 నుంచి 2013 వరకు అతడు అక్కడే పనిచేశాడు. ఈ సమయంలో తనతో పాటు పనిచేసే ఓ అమ్మాయితో అతడు ప్రేమలో పడ్డాడు.

2013 తర్వాత ప్రశాంత్ హైదరాబాద్‌కు షిఫ్ట్ అయ్యాడు. ఇదే సమయంలో అతడి కుటుంబం కూడా వైజాగ్ నుంచి హైదరాబాద్‌కు వచ్చేసింది. ప్రశాంత్ తండ్రి బాబు రావు ప్రైవేట్ జాబ్ చేస్తూ గత ఐదేళ్లుగా కూకట్‌పల్లిలో నివాసం ఉంటున్నారు.

ఈ కేసులో అతి ముఖ్యమైన విషయం ఏమిటంటే.. పోలీసులు ప్రశాంత్‌ది ఇప్పటివరకు కేవలం మిస్సింగ్ కేస్‌గా మాత్రమే నమోదు చేసుకున్నారు. ప్రశాంత్ వ్యవహారంలో జరుగుతున్న ప్రచారాన్ని నమ్మొద్దని తెలంగాణ పోలీసులు తెలిపారు. 10 నెలల కిందటే ఇండియన్ రా ఏజెంట్ ప్రశాంత్ తండ్రి బాబురావు దగ్గరికి వచ్చారని.. ప్రశాంత్ పాకిస్థాన్‌లో ఉన్నట్లు సమాచారం ఇచ్చారని వస్తున్న వార్తల్లో వాస్తవం లేదని చెప్పారు.

ప్రశాంత్ కుటుంబసభ్యులతో మాట్లాడి పోలీసులు పూర్తి వివరాలు సేకరిస్తున్నారు. కేంద్ర హోంశాఖకు నివేదిక ఇవ్వనున్నారు. ప్రశాంత్‌ను స్వదేశానికి రప్పించడానికి ఇండియన్ ఎంబసీ ప్రయత్నాలు ప్రారంభించింది. బాబురావు ఇండియన్ ఎంబసీని సంప్రదించడానికి ఢిల్లీ బయల్దేరి వెళ్లారు.

తన ప్రేయసి కోసం వెతకడానికి ప్రశాంత్ పాక్ భూభాగానికి వెళ్లాడనేది కూడా అవాస్తవం. ఒకవేళ అతడు పాక్ వెళ్లాలనుకుంటే.. ఇలా అడ్డదారుల్లో వెళ్లాల్సిన పనిలేదని.. పాస్‌పోర్టు, వీసా తీసుకొని వెళ్లేవాడని అతడి తండ్రి చెబుతున్నాడు. పైగా అతడి గర్ల్‌ఫ్రెండ్ స్విట్జర్లాండ్ వెళ్లిందనేది ఇక్కడ గమనించాల్సిన అంశం.

ఏదేమైనా.. ప్రశాంత్ ఇప్పుడు దాయాది దేశ చెరలో ఉన్నాడు. ఈ అంశం భారత్, పాక్ మధ్య మరోసారి దౌత్య పరమైన వివాదానికి దారి తీసే ప్రమాదం ఉంది. ఇండియన్ నేవీ మాజీ అధికారి కుల్ భూషణ్ జాదవ్‌పై పాక్ సైనిక కోర్టు గూఢచర్య ఆరోపణలతో ఇప్పటికే మరణ శిక్ష విధించింది. ఇలాంటి పరిణామాల నేపథ్యంలో ఈ వ్యవహారం భారతీయులను కలవరానికి గురిచేస్తోంది. వింగ్ కమాండర్ అభినందన్ వర్ధమాన్‌లా ప్రశాంత్, అతడితో పాటు అరెస్టైన మధ్యప్రదేశ్‌ వ్యక్తి దరీలాల్ క్షేమంగా తిరిగి రావాలని ప్రార్థిద్దాం..




Please Read Disclaimer