నెక్ట్స్ సీఎం నేనే… బెజవాడ గూండాల తాట తీస్తా: పవన్

0

ఆంధ్రప్రదేశ్‌కు కాబోయే సీఎం తానేనని అన్నారు జనసేన అధినేత పవన్‌కళ్యాణ్. శనివారం రాత్రి విజయవాడలో చేపట్టిన ప్రచారంలో ఆయన మాట్లాడుతూ.. ఎన్నికల తర్వాత ముఖ్యమంత్రిగా తానే ప్రమాణస్వీకారం చేస్తానని చెప్పారు. విజయవాడలో రౌడీలు, గూండాల అరాచకాలు పెరిగిపోయాయని, అధికారంలోని రాగానే వారి తాట తీస్తానని హెచ్చరించారు. రాష్ట్రంలో భూకబ్జాలకు పాల్పడే వారిని వదిలిపెట్టేది లేదని అన్నారు.

విజయవాడతో తనకు ఎంతో అనుబంధం ఉందని, రాజకీయంగా చాలా చైతన్యవంతమైన ప్రాంతమని పవన్ అన్నారు. రాష్ట్రంలో ఏ మార్పు జరగాలన్నా విజయవాడ నుంచే మొదలవుతుందన్నారు. తెలంగాణ ఉద్యమానికి అండగా నిలబడింది కూడా విజయవాడ నుంచి వెళ్లిన నాయకులే అని పవన్ పేర్కొన్నారు. ఇంత కష్టపడి తెలంగాణకు విముక్తి కలిగిస్తే.. తెలంగాణ నాయకులు మాత్రం ఆంధ్రోళ్లను దగాకోరులు, దోపిడీదారులుగా తిడుతుంటే జగన్ స్పందించడం లేదని, చంద్రబాబు, ఆయన కొడుకు లోకేశ్ అయితే ఏకంగా హైదరాబాద్ నుంచి పారిపోయి వచ్చేశారని పవన్ అన్నారు. నేడు ఆంధ్రుల ఆత్మగౌరవం గురించి హైదరాబాద్ నడిబొడ్డున మాట్లాడే దమ్మున్న నాయకుడు పవన్‌కళ్యాణ్ మాత్రమేనని స్పష్టం చేశారు.

ప్రత్యేక హోదా గురించి ధైర్యంగా పోరాడిన ఏకైక పార్టీ జనసేనే అని పవన్ అన్నార. విభజన హామీలపై కేంద్రాన్ని నిలదీసే ధైర్యం వైఎస్ జగన్‌కు లేదని విమర్శించారు. వైసీపీకి ఓటేసి రాష్ట్రాన్ని కేసీఆర్ చేతుల్లో పెట్టొద్దని సూచించారు. కేసీఆర్, జగన్ మధ్య అవగాహన ఒప్పందం ఉన్నందునే వైసీపీ తెలంగాణలో పోటీ చేయడం లేదన్నారు. ఒకే సిద్ధాంతానికి కట్టుబడి తెలంగాణ రాష్ట్రాన్ని సాధించుకున్న కేసీఆర్‌ అంటే తనకెంతో అభిమానమని, అయితే ఒకే ఒక్క సంతకంతో ఏపీకి చెందిన బీసీలను ఓసీలుగా మార్చేయడం మాత్రం తనను బాధించిందన్నారు. ఈ అంశంపై కేసీఆర్‌ను జగన్ ఎందుకు నిలదీయడం లేదన్నారు.




Please Read Disclaimer