జస్టిస్ ఫర్ సుగాలి ప్రీతి.. హోరెత్తుతున్న ట్విట్టర్‌

0

2017లో అత్యాచారానికి గురై అనుమానాస్పద రీతిలో మరణించిన పదో తరగతి విద్యార్థిని బాలిక సుగాలి ప్రీతికి న్యాయం చేయాలంటూ మరోసారి రాష్ట్ర యువత ననదిస్తోంది. ‘జస్టిస్ ఫర్ సుగాలి ప్రీతి’ హ్యాష్ ట్యాగ్‌తో సోషల్ మీడియాలో హోరెత్తిస్తోంది. సుగాలి ప్రీతికి న్యాయం చేయాలనే డిమాండ్‌తో బుధవారం (ఫిబ్రవరి 12) ర్యాలీ చేయనున్నట్లు జనసేన అధినేత పవన్ కళ్యాణ్ ప్రకటించారు. ఈ నేపథ్యంలో సుగాలి ప్రీతి విషయం మరోసారి హాట్ టాపిక్‌గా మారింది.

ట్విట్టర్‌లో టాప్ ట్రెండింగ్

ఢిల్లీ ఎన్నికల ఫలితాలు మంగళవారం (ఫిబ్రవరి 11) వెలువడగా కేజ్రీవాల్ 70కి 62 సీట్లు సాధించి మరోసారి అఖండ విజయం సాధించారు. దీంతో ట్విట్టర్‌లో ‘ఢిల్లీ పోల్స్ 2020’ హ్యాష్ ట్యాగ్ టాప్ ట్రెండింగ్‌లో కొనసాగుతుండగా ‘జస్టిస్ ఫర్ సుగాలి ప్రీతి’, ‘ర్యాలీ ఫర్ జస్టిస్’ హ్యాష్ ట్యాగ్‌లు కూడా హోరెత్తిస్తున్నాయి. ‘ఢిల్లీ పోల్స్ 2020’ హ్యాష్ ట్యాగ్ పేరుతో 52 వేల మంది ట్వీట్ చేయగా.. ‘జస్టిస్ ఫర్ సుగాలి ప్రీతి’ హ్యాష్ ట్యాగ్‌తో మంగళవారం రాత్రి 9 గంటలకు 49 వేల మంది, ‘ర్యాలీ ఫర్ జస్టిస్’ హ్యాష్ ట్యాగ్‌తో 60 వేల మంది ట్వీట్ చేశారు.

పాశవికంగా ప్రీతి హత్య?

కర్నూలు నగర శివారులోని లక్ష్మీగార్డెన్‌లో ఉంటున్న ఎస్‌.రాజు నాయక్, ఎస్‌.పార్వతిదేవి దంపతుల కుమార్తె సుగాలి ప్రీతి (14) ఓ రాజకీయ నాయకుడికి చెందిన కట్టమంచి రామలింగారెడ్డి రెసిడెన్షియల్‌ స్కూల్‌లో పదో తరగతి చదివేది. 2017 ఆగస్టు 19న ఫ్యాన్‌కు ఉరి వేసుకుని చనిపోయినట్లు స్కూల్‌ యాజమాన్యం పెర్కొంది. తమ కుమార్తె ఉరి వేసుకుని చనిపోలేదని, స్కూల్‌ యజమాని కొడుకులు బలవంతంగా రేప్‌ చేసి చంపేశారని తల్లిదండ్రులు ఆరోపించారు.

పోస్టుమార్టం రిపోర్టులో వెలుగులోకి..

కర్నూలు ప్రభుత్వ ఆస్పత్రిలో పోస్టుమార్టం చేసిన డాక్టర్‌ శంకర్‌.. 2017 ఆగస్టు 20న ఇచ్చిన ప్రాథమిక రిపోర్ట్‌లో సైతం బాలిక ప్రీతిని రేప్‌ చేసినట్లు నిర్ధారించారు. పెథాలజీ హెచ్‌ఓడీ డాక్టర్‌ జి.బాలేశ్వరి సైతం ఇదే విషయాన్ని నిర్ధారిస్తూ 2017 ఆగస్టు 21న నివేదిక ఇచ్చారని ప్రీతి తల్లిదండ్రులు తెలిపారు. తమ దగ్గరున్న ఆధారాలతో బాధితురాలి తల్లిదండ్రులు తాలూకా పోలీసు స్టేషన్‌లో కట్టమంచి రామలింగారెడ్డి స్కూల్‌ యజమానితో పాటు.. అతడి కుమారులపై ఫిర్యాదు చేశారు.

కమిటీ నివేదికలో హత్యగా నిర్ధారణ

నిందితులపై పోలీసులు పోక్సో చట్టంతో పాటు ఎస్సీ, ఎస్టీ అట్రాసిటీ చట్టం కింద కేసు నమోదు చేశారు. ఈ హత్య సంఘటనపై విచారణకు ముందుగా త్రి సభ్య కమిటీని ఏర్పాటు చేసిన జిల్లా కలెక్టర్.. తర్వాత ఐదుగురు సభ్యులతో కూడిన కమిటీని నియమించారు. విద్యార్థినిపై లైంగిక దాడి చేసి.. హత్య చేశారని ఈ కమిటీ నివేదిక ఇచ్చింది. బాలిక శరీరంపై ఉన్న గాయాలను, అక్కడి దృశ్యాల పట్ల అనుమానం వ్యక్తం చేసింది.

నిందితుల అరెస్ట్.. బెయిల్‌పై విడుదల

సాక్ష్యాలు బలంగా ఉండటంతో నిందితులను అరెస్టు చేశారు. కానీ 23 రోజులకే వారికి బెయిల్ వచ్చింది. దీంతో తమ బిడ్డను రేప్‌ చేసి చంపిన వారిని శిక్షించాలంటూ బాలిక తల్లిదండ్రులు కలెక్టరేట్‌ ముందు ఆందోళనకు దిగారు. ఆధారాలు పక్కాగా ఉన్నప్పటికీ.. ఇప్పటి వరకు తమకు న్యాయం జరగలేదని బాధితురాలి తల్లి వాపోతున్నారు. ఈ విషయమై దళిత సంఘాలు ఆందోళనలు సైతం నిర్వహించాయి. అయితే ఎలాంటి న్యాయం జరగలేదు. ఈ నేపథ్యంలో ఇదే విషయమై ఆమె జనసేన అధినేత పవన్ కళ్యాణ్‌ను కలిశారు.

పవన్‌ను ఆశ్రయించిన తల్లిదండ్రులు..

తమకు న్యాయం చేయాలంటూ ఎందరో రాజకీయ నాయకులు, అధికారులను ప్రాధేయపడిన సుగాలి ప్రీతి తల్లిదండ్రులు చివరకు జనసేన అధినేత పవన్ కళ్యాణ్‌ను ఆశ్రయించారు. సుగాలి ప్రీతికి న్యాయం చేయాలంటూ పలుమార్లు వైసీపీ ప్రభుత్వాన్ని కోరిన పవన్ కళ్యాణ్.. చివరకు ఈ నెల 12న హత్యాచార ఘటనలో దోషులను శిక్షించాలనే డిమాండ్‌తో కర్నూలు నగరంలో ర్యాలీ చేపట్టాలని నిర్ణయించారు. ఈ నేపథ్యంలో మంగళవారం ‘జస్టిస్ ఫర్ సుగాలి ప్రీతి’ ట్రెండ్ అవుతోంది. సుగాలి ప్రీతి హత్యాచార కేసును సీబీఐకి అప్పగించాలని పలువురు డిమాండ్ చేస్తున్నారు.

జిల్లా ఎస్పీ ఏమన్నారంటే..

సుగాలి ప్రీతి కేసును సీబీఐకి అప్పగించేందుకు ఎలాంటి అభ్యంతరం లేదని కర్నూలు జిల్లా ఎస్పీ ఫకీరప్ప తెలిపారు. కేసుకు సంబంధించి నివేదికను డీజీపీకి పంపించామని చెప్పారు. ఈ కేసుకు సంబంధించి మంగళవారం ఎస్పీ ఫకీరప్ప మీడియాతో మాట్లాడుతూ.. ప్రీతి కేసులో మరోసారి దర్యాప్తు చేస్తున్నట్లు తెలిపారు. అదనపు ఎస్పీ ఆధ్వర్యంలో ప్రత్యేకంగా దర్యాప్తు చేస్తున్నామన్నారు. సీబీఐ విచారణ జరిపించాలని దళిత సంఘాలు కోరుతున్నాయని, సీబీఐ దర్యాప్తు కోసం కేంద్ర హోంశాఖకు ప్రతిపాదనలు పంపించామని ఎస్పీ వెల్లడించారు. ఈ కేసుపై సీబీఐ విచారణ అంశం కేంద్ర హోంశాఖ పరిశీలనలో ఉందని వెల్లడించారు.




Please Read Disclaimer