ఆర్టీసీ కార్మికులపై ప్రభుత్వ నిర్ణయం వాయిదా.. కానీ స్పష్టమైన సంకేతాలు!

0

తెలంగాణ ఆర్టీసీ కార్మికులు సమ్మె విరమణకు సిద్ధంగా ఉన్నామని సంకేతాలు ఇచ్చిన వేళ.. ఆర్టీసీ కార్మికుల విషయమై సీఎం కేసీఆర్ అధ్యక్షతన గురువారం రాత్రి సమీక్ష జరిగింది. ప్రభుత్వం భేషరతుగా తమను విధుల్లోకి తీసుకోవాలని ఉద్యోగులు కోరుతుండటంతో.. కేసీఆర్ ఎలాంటి నిర్ణయం తీసుకుంటారోనని తెలంగాణ ప్రజానీకం ఆసక్తి చూపారు. కానీ ఈ ఉత్కంఠను మరింత సమయం పొడిగిస్తూ.. శుక్రవారం హైకోర్టు తీర్పు తర్వాతే తుది నిర్ణయం తీసుకోవాలని నిర్ణయించారు.

ఆర్థకి మాంద్యం ప్రభావంతో.. ఆర్టీసీ అప్పులను భరించే స్థితిలో ప్రభుత్వం లేదన్నారు. ఆర్టీసీని యథాతథంగా నడపటం సాధ్యం కాదని అభిప్రాయపడింది. ఆర్టీసీలో రూట్ల ప్రయివేటీకరణపై శుక్రవారం హైకోర్టు తీర్పు వెలువరించనుంది. మెరుగైన రవాణా సదుపాయాలు కల్పించడంతోపాటు.. ఆర్టీసీ సమస్యలకు శాశ్వత పరిష్కారం చూపాలని తెలంగాణ సర్కారు భావిస్తోంది. కార్మికుల ఉద్యోగాలకు ఇబ్బందిని కలిగించకుండా కేసీఆర్ నిర్ణయాలు తీసుకునే అవకాశం ఉంది.

ఆర్టీసీ రూ.5 వేల కోట్ల అప్పుల్లో కూరుకుపోగా.. జీతాల చెల్లింపునకు కూడా ఇబ్బందికర పరిస్థితి ఎదురవుతోంది. ఇప్పుడు ఉన్నట్టుగానే ఆర్టీసీని నడపాలంటే నెలకు రూ.640 కోట్లు అవసరం. కానీ సంస్థకు అంత ఆదాయం రావడం లేదు. ప్రభుత్వం కూడా పూర్తిగా సాయం చేసే స్థితిలో లేదని సమీక్షలో అభిప్రాయపడినట్టు సమాచారం. ఛార్జీలు పెంచినా ప్రజల నుంచి వ్యతిరేకత వ్యక్తం అయ్యే ఛాన్స్ ఉంది.

దీంతో ఆర్టీసీలో మార్పులు తప్పవనేలా కేసీఆర్ సంకేతాలిచ్చారు. ఆర్టీసీని మూడు విభాగాలుగా విభజిస్తామని కేసీఆర్ గతంలో ప్రకటించిన సంగతి తెలిసిందే.

ఆర్టీసీ ఆధ్వర్యంలో నడిచే బస్సులు, అద్దె బస్సులు, ప్రయివేట్ ట్రావెల్స్‌తో.. ఆర్టీసీకి నష్టాలు తగ్గుతాయని కేసీఆర్ భావిస్తున్నారు. ప్రభుత్వం చెబుతున్న దాన్ని బట్టి.. ఆర్టీసీని ప్రయివేటీకరించే అవకాశాలు ఉన్నాయని నిపుణులు అభిప్రాయపడుతున్నారు. 5100 రూట్లలో ప్రయివేట్ బస్సులు నడవడానికి ప్రభుత్వం అనుమతించే అవకాశం ఉంది.

గురువారం రాత్రి నిర్వహించిన సమీక్షలో… కేసీఆర్‌తోపాటు రవాణా శాఖ మంత్రి పువ్వాడ అజయ్ కుమార్, ప్రభుత్వ ముఖ్య సలహాదారు రాజీవ్ శర్మ, చీఫ్ సెక్రటరీ ఎస్.కె.జోషి, సీనియర్ అధికారులు నర్సింగ్ రావు, ఏజీ, అడిషనల్ ఏజీ, ఆర్టీసీ ఈడీ తదితరులు పాల్గొన్నారు.




Please Read Disclaimer