చనిపోతాననే బాధ కంటే అదే నన్ను వేధిస్తోంది.. అక్బరుద్దీన్ ఓవైసీ సంచలన వ్యాఖ్యలు

0

మృత్యువు తనను ఏ క్షణమైనా పలకరించవచ్చని ఎంఐఎం పార్టీ నేత, ఎమ్మెల్యే అక్బరుద్దీన్ ఓవైసీ అన్నారు. కరీంనగర్‌లో మజ్లిస్ పార్టీ బుధవారం (జులై 24) నిర్వహించిన బహిరంగ సభలో ఆయన సంచలన వ్యాఖ్యలు చేశారు. చనిపోతాననే విషయం కంటే కరీంనగర్‌లో ఎంపీ స్థానం బీజేపీ గెలుచుకున్న అంశం తనకు ఎక్కువ బాధ కలిగిస్తోందన్నారు. ముస్లిం సమాజం ఏకం కావాల్సిన తరుణం వచ్చిందని పిలుపునిచ్చారు. అక్బరుద్దీన్ ప్రసంగంతో సభకు హాజరైన వారిలో ఒకింత భావోద్వేగం, ఆవేశం కనిపించాయి.

‘నేను ఎంతకాలం బతుకుతానో తెలియదు. ఏక్షణమైనా మరణం నన్ను పలకరించొచ్చు. ఎక్కువ కాలం బతకనని డాక్టర్లు చెప్పారు. అయితే.. మరణం విషయంలో నాకు బాధలేదు. నాకున్న బాధంతా ఒక్కటే.. కరీంనగర్‌లో బీజేపీ బలపడటం. ఇటీవల జరిగిన ఎంపీ ఎన్నికల్లో బీజేపీ గెలవడం నాకు చాలా బాధ కలిగించింది’ అని అక్బరుద్దీన్ అన్నారు.

‘నేను భయపడేది నా గురించి కాదు. రాబోయే తరాల గురించే నా భయం. కరీంనగర్‌లో ఎంఐఎం నేత డిప్యూటీ మేయర్‌గా ఉన్నప్పుడు స్థానికంగా బీజేపీకి అడ్రస్‌ కూడా లేదు. కానీ ఇప్పుడు ఏకంగా కరీంనగర్‌ ఎంపీ స్థానాన్నే గెలుచుకుంది. మజ్లిస్‌ గెలవలేదని బాధలేదు. బీజేపీ గెలిచిందని ఆవేదనగా ఉంది. ఎంఐఎం గెలవకపోయినా ఫర్వాలేదు. బీజేపీని గెలిపించొద్దు’ అని అక్బరుద్దీన్ పిలుపునిచ్చారు. 

భయపడే వారినే భయపెట్టిస్తారు 
మూక దాడుల అంశంపైనా అక్బరుద్దీన్ ఘాటు విమర్శలు చేశారు. మూక దాడుల్లో ప్రాణాలు కోల్పోయిన వారు నేరుగా స్వర్గానికి వెళ్తారని వ్యాఖ్యానించారు. ‘ఎవరైతే భయపెడతారో వారినే భయపెట్టిస్తారు. మజ్లిస్‌ మతతత్వ పార్టీ అని దుష్ప్రచారం చేస్తున్నారు. అలా చేసేవారు ఎవరో కాదు.. గాడ్సేని పొగిడినవాళ్లే. గమ్యాన్ని ముద్దాడే భావోద్వేగాలంటే నాకు ఇష్టం’ అంటూ అక్బరుద్దీన్‌ ప్రసంగించారు. 

కొంత కాలంగా అనారోగ్యంతో బాధ పడుతున్న అక్బరుద్దీన్ ఇటీవల లండన్‌లో చికిత్స చేయించుకొని హైదరాబాద్ తిరిగొచ్చారు. తెలంగాణ అసెంబ్లీలో నూతన మున్సిపాలిటీ చట్టం ఆమోదం కోసం జరిగిన చర్చలో యాక్టివ్‌గా పాల్గొన్నారు. బిల్లుపై తన అభిప్రాయాన్ని నిక్కచ్చిగా చెప్పారు. ప్రభుత్వానికి పలు సూచనలు చేశారు. ఇంతలోనే ఆయన బహిరంగ సభలో ఇలాంటి వ్యాఖ్యలు చేయడం చర్చనీయాంశంగా మారింది. ఎంఐఎం కార్యకర్తలను ఆందోళనకు గురిచేస్తోంది. 




Please Read Disclaimer