అప్పుడు సీతక్క చెప్తే ఎగతాళి చేస్తారా.. కేసీఆర్‌కు రేవంత్ లేఖ

0

రాష్ట్రంలో తక్షణం హెల్త్ ఎమర్జెన్సీ విధించాలని కాంగ్రెస్ ఎంపీ రేవంత్ రెడ్డి ప్రభుత్వానికి సూచించారు. ఈ మేరకు ఆయన సీఎం కేసీఆర్‌కు ఆదివారం బహిరంగ లేఖ రాశారు. కరోనా కేసులు రాష్ట్రంలో పెరుగుతున్నా ప్రభుత్వం సరిగ్గా పట్టించుకోవడం లేదని విమర్శించారు. ఈ పరిస్థితుల్లో కరోనా టెస్టులు పెంచాలని ఐసీఎంఆర్ చెబుతోందని గుర్తు చేశారు. అయినా ప్రభుత్వం దాన్ని పెడ చెవిన పెడుతోందని తప్పుబట్టారు. నామమాత్రపు కరోనా పరీక్షలతోనే 32.1 శాతం పాజిటివ్ కేసులు వస్తున్నాయని తెలిపారు.

కేంద్ర ఆరోగ్య శాఖ సంయుక్త కార్యదర్శి లవ్ అగర్వాల్ నేతృత్వంలోని కేంద్ర బృందం కాంగ్రెస్ ఎంపీలకు అపాయింట్‌మెంట్‌ ఇవ్వకపోవడం వెనుక కేసీఆర్‌ ఒత్తిడి ఉందని రేవంత్ రెడ్డి అనుమానం వ్యక్తం చేశారు. ప్రభుత్వం కరోనా విషయంలో తొలి నుంచి నిర్లక్ష్యంగా వ్యవహరిస్తూనే ఉందని దుయ్యబట్టారు. వీఐపీల ప్రాణాలకు ఇస్తున్న విలువ.. పేద, మధ్యతరగతికి ఇవ్వడం లేదని రేవంత్ విమర్శించారు.

కరోనా వైద్యం కోసం ప్రభుత్వాస్పత్రికి వెళ్లేందుకు ప్రజలు భయపడుతున్నారని విమర్శించారు. ప్రభుత్వ ఆస్పత్రికి వెళ్లడం కంటే శ్మశానానికి వెళ్లడం మేలని జనం అనుకుంటున్నారని రేవంత్ ఎద్దేవా చేశారు. మొదట్లో దీనిపై ఎమ్మెల్యే సీతక్క మంచి సలహా ఇస్తే అసెంబ్లీ సాక్షిగా ఎగతాళి చేశారని రేవంత్ గుర్తు చేశారు. పారాసిట్‌మాల్‌ మందు బిళ్ల వేసుకుంటే చాలని తేలిగ్గా తీసుకున్నారని విమర్శించారు. వేడి నీళ్లు తాగితే కరోనా పోతుందని, మంత్రులు కూడా బాధ్యతారాహిత్యంగా మాట్లాడారని రేవంత్‌రెడ్డి గుర్తు చేశారు.




Please Read Disclaimer