నాని.. వంశీ.. ఇక్కడెవరూ గాజులు తొడుక్కోలా! నందమూరి వారసుడి స్ట్రాంగ్ వార్నింగ్

0

టీడీపీ అధినేత చంద్రబాబుపై మంత్రి కొడాలి నాని, గన్నవరం ఎమ్మెల్యే వల్లభనేని వంశీ చేసిన వ్యాఖ్యలు ఏపీ రాజకీయాల్లో హీట్ పెంచాయి. వ్యక్తిగత దూషణలకు దిగుతున్నారంటూ టీడీపీ నేతలు ఓ రేంజ్‌లో ఫైర్ అయ్యారు. దీంతో వైఎస్సార్సీపీ, టీడీపీ మధ్య మాటల యుద్ధం కొనసాగుతోంది. రాజకీయ భిక్ష పెట్టిన చంద్రబాబుపైనే విమర్శలకు దిగుతారా అంటూ తెలుగుదేశం నేతలు ఆగ్రహం వ్యక్తం చేస్తున్నారు.

నిజానికి చంద్రబాబుపై విమర్శలు చేసిన కొడాలి నాని, వల్లభనేని వంశీకి నందమూరి కుటుంబంతో సన్నిహిత సంబంధాలున్నాయనేది అందరికీ తెలిసిన విషయమే. కొడాలి నాని నందమూరి హరిక్రిష్ణ తనయుడు జూనియర్ ఎన్టీఆర్‌‌కు అత్యంత సన్నిహితుడు. వంశీకి కూడా అదే స్థాయిలో సన్నిహిత సంబంధాలున్న ప్రచారం ఉంది. ఈ నేపథ్యంలో కొడాలి నాని.. వంశీ వ్యాఖ్యలకు క్రేజ్ ఏర్పడింది. నందమూరి ఫ్యామిలీకి దగ్గరి వారే చంద్రబాబుపై విమర్శలు చేయడం పొలిటికల్ సర్కిల్స్‌లో హాట్ టాపిక్‌గా మారింది.

అయితే ఇప్పటి వరకూ రాజకీయంగా హీట్ పెంచిన కొడాలి నాని, వల్లభనేని వంశీ వ్యవహారం నందమూరి ఫ్యామిలీకి కోపం తెప్పించినట్టుంది. నందమూరి వారసుడు ఘాటుగా స్పందించారు. ఇద్దరికీ స్ట్రాంగ్ వార్నింగ్ ఇచ్చేశాడు. మా మావయ్యను ఇష్టమొచ్చినట్లు మాట్లాడితే ఊరుకునేది లేదు. జాగ్రత్త! అంటూ హెచ్చరికలు చేశాడు. ఇప్పుడిదే ఏపీ రాజకీయాల్లో హాట్ టాపిక్‌గా మారింది. ఏకంగా నందమూరి వారసుడు వార్నింగ్ ఇవ్వడం తీవ్ర చర్చనీయాంశమైంది.

చంద్రబాబుపై మంత్రి కొడాలి నాని, ఎమ్మెల్యే వల్లభనేని వంశీ విమర్శలను చూసి చాలా బాధేసిందని నందమూరి జయకృష్ణ తనయుడు నందమూరి చైతన్య కృష్ణ అన్నారు. మా మావయ్య చంద్రబాబు సీట్లిస్తేనే ఈ రోజు కొడాలి నాని, వంశీ ఈ స్థాయికి వచ్చారన్నారు. 2004, 2009లో నానికి గుడివాడ టిక్కెట్ ఇచ్చారని గుర్తు చేశారు. అలాగే వంశీకి 2009లో ఎంపీ సీటు, 2014, 2019లో ఎమ్మెల్యే టిక్కెట్లు ఇచ్చారన్నారు. వాళ్లిద్దరి మాట్లాడుతున్న భాషపై తీవ్ర అభ్యంతరం వ్యక్తం చేశారు.

మా మావయ్య చంద్రబాబు గురించి ఇంకోసారి బూతులు మాట్లాడితే మంచిది కాదంటూ చైతన్య హెచ్చరించారు. నోరుందని చెప్పి ఇష్టమొచ్చినట్లు మాట్లాడితే జాగ్రత్త.. అంటూ ఆగ్రహం వ్యక్తం చేశారు. ఇక్కడెవరూ గాజులు తొడుక్కుని కూర్చోలేదంటూ తీవ్ర హెచ్చరికలు చేశారు. విధానాలపై విమర్శలు చేస్తే ఫర్వాలేదని.. కానీ వ్యక్తిగత దూషణలకు దిగితే ఊరుకునేది లేదని.. టేక్ కేర్.. అంటూ ఓ వీడియో విడుదల చేశారు.




Please Read Disclaimer