‘జగన్‌ గారూ.. సీఎం అయ్యాక ఈ కంత్రీ పనులేంటి’

0

ఏపీ అసెంబ్లీ బడ్జెట్ సమావేశాల తొలిరోజే హీట్ పెంచింది. అధికారపక్షం వైసీపీ.. ప్రతిపక్షం టీడీపీ మధ్య మాటల యుద్ధం నడిచింది. కరువుపై ముఖ్యమంత్రి ప్రసంగం తర్వాత సభలో చర్చ వాడీవేడిగా జరిగింది. సున్నా వడ్డీకి రుణాలపై సీఎం జగన్-ప్రతిపక్ష నేత చంద్రబాబు మధ్య మాటల యుద్ధం నడిచింది. సవాళ్లు, ప్రతి సవాళ్లు జరిగాయి. టీడీపీ ప్రభుత్వం సున్నా వడ్డీకే రుణాలు అసలు ఇవ్వలేదని జగన్ ఆరోపిస్తే.. తమ హయాంలో ఇచ్చిన రుణాలకు సంబంధించిన ఆధారాలను మీడియా ముందు పెట్టారు చంద్రబాబు.

తాజాగా ఈ వ్యవహారంపై మాజీ మంత్రి నారా లోకేష్ ట్విట్టర్‌లో స్పందించారు. ముఖ్యమంత్రి జగన్‌పై ఘాటు వ్యాఖ్యలు చేశారు. ‘బురద జల్లి.. నిరూపించు అనేసరికి సభ నుంచి పారిపోయే ఆకతాయి చేష్టలు ప్రతి పక్షంలో ఉన్నప్పుడు చేశారంటే ఉడుకుమోతుతనం అనుకోవచ్చు. ముఖ్యమంత్రి అయ్యాక కూడా ఈ కంత్రీ పనులేంటి జగన్ గారూ! ఈ జన్మలో మీరు హుందాగా ప్రవర్తించలేరా? నిరూపించలేనప్పుడు సవాళ్ళు చేయడం దేనికి?’అంటూ ప్రశ్నించారు.

‘వడ్డీలేని రుణాలు ఇవ్వలేదన్న మీ ఆరోపణలు అబద్దం అనడానికి రుజువులు ప్రజల ముందుంచాం. మీ ఛాలెంజ్ ప్రకారం రాజీనామా చేస్తారా? ప్రతిపక్షానికి అడ్డంగా దొరికిపోయి అసెంబ్లీ నుంచి పారిపోయిన మొదటి ముఖ్యమంత్రిగారికి ఇంకో ఛాన్స్ కూడా ఇస్తున్నాం. మీ తప్పు ఒప్పుకుని ప్రజలకు క్షమాపణ చెప్పండి’అంటూ డిమాండ్ చేశారు లోకేష్.




Please Read Disclaimer