నారా లోకేశ్ సెమీ ఫైనల్ ట్వీట్ వైరల్.. జగన్ గారూ అది నేరం కాదా!

0

కోహ్లీ సేనను ఉద్దేశించి మాజీ మంత్రి నారా లోకేశ్ చేసినట్లుగా చెబుతున్న ఓ ట్వీట్ సోషల్ మీడియాలో తెగ చక్కర్లు కొడుతోంది. ‘సెమీ ఫైనల్లో ఓడిపోతే ఓడిపోయారు.. కానీ, ఫైనల్లో కచ్చితంగా గెలవండి. ఓటమి నుంచి పాఠాలు నేర్చుకున్నవారే అసలైన విజేతలు’ అనేది ఆ ట్వీట్ సారాంశం. నారా లోకేశ్ తన ట్విటర్ ఖాతా నుంచి చేసిన వ్యాఖ్యలుగా వాటిని ప్రచారం చేస్తున్నారు. వాటిని చూసిన వారు.. మాజీ ముఖ్యమంత్రి తనయుడికి క్రికెట్ గురించి కనీస పరిజ్ఞానం కూడా లేదా అని ముక్కున వేలేసుకుంటున్నారు.

వాస్తవానికి ఇలాంటి వ్యాఖ్యలతో లోకేశ్ ఎలాంటి ట్వీట్ చేయలేదు. ఆయన ట్విటర్ హ్యాండిల్ నుంచి చేసిన పోస్టు మాదిరిగా ఫొటో మార్ఫింగ్ చేసి వైరల్ చేస్తున్నారు. ఈ ట్వీట్‌ అంశంపై ఆసక్తికర చర్చ నడుస్తున్న తరుణంలో నారా లోకేశ్ స్పందించారు. ఆ పోస్టు చేసిన వ్యక్తిపై ప్రభుత్వం చర్యలు తీసుకోదా? అని ప్రశ్నించారు.

‘మీకు వ్యతిరేకంగా పోస్టులు పెడితే కేసులు పెట్టి వేధించమని చెప్పిన @ysjagan గారూ, నా ట్వీట్‌ను మార్ఫింగ్ చేసి మీ వాళ్లు ఇలా పోస్టు చేస్తే పర్వాలేదా? ఇది నేరం కాదా? ఈ పోస్టు చేసిన వ్యక్తిపై మీ ప్రభుత్వం చర్యలు తీసుకోదంటే చెప్పండి, మేము న్యాయపరంగా ముందుకెళ్తాం’ అని ట్విటర్ వేదికగా లోకేశ్ ప్రశ్నించారు.

గత బుధవారం (జులై 10) జరిగిన ప్రపంచ కప్ సెమీ ఫైనల్ మ్యాచ్‌లో కివీస్ చేతిలో టీమిండియా పరాజయం పాలైన సంగతి తెలిసిందే. అసమాన పోరాటంతో చివరి దాకా వచ్చి కోహ్లీ సేన విజయం అంచున బోల్తా పడింది. ఈ మ్యాచ్ అనంతరం నారా లోకేశ్ ట్వీట్ చేశారు.

‘వరల్డ్ కప్ రేసు నుంచి ఇండియా వైదొలగడం ఎంతగానో బాధించింది. కానీ, రవీంద్ర జడేజా, ఎంఎస్ ధోనీ అద్భుత పోరాటం చేశారు. భారత ఆటగాళ్లు తమ స్థాయికి తగ్గట్లు ఆడారు. కానీ, ఇది మన రోజు కానట్లుంది.’ అని లోకేశ్ ట్వీట్ చేశారు. వాస్తవానికి ఆయన ఈ ట్వీట్‌ను ఇంగ్లిష్ భాషలో చేశారు. కానీ, ఆయన పోస్టును ఎవరో కావాలనే మార్ఫింగ్ చేసి దుష్ప్రచారం చేస్తున్నట్లుగా కనిపిస్తోంది. మొత్తానికి నారా లోకేశ్ సెమీ ఫైనల్ ట్వీట్ అంశంపై వైఎస్సార్‌సీపీ నేతలు ‘ఫైనల్‌’గా ఏవిధంగా స్పందిస్తారో చూడాలి!!




Please Read Disclaimer