ఏపీలో దొరికే ఇసుక గురించి తెలంగాణలో యాడ్ ఎందుకు జగన్ గారూ

0

ఏపీలో ఇసుక తుఫాన్ కొనసాగుతూనే ఉంది. ఇసుక కొరతతో భవన నిర్మాణ కార్మికులు కష్టాల్లో ఉన్నారంటూ టీడీపీ దీక్షలు, ఆందోళనలతో హోరెత్తిస్తుంటే.. వరదల కారణంగా కొన్సి సమస్యలున్నాయని.. ఇప్పుడు ఇసుక అందుబాటులోకి వచ్చిందని ప్రభుత్వం చెబుతోంది. అంతేకాదు జగన్ సర్కార్ ఓ అడుగు ముందుకేసి ఇసుకకు సంబంధించి ఫిర్యాదులు చేసేందుకు టోల్ ఫ్రీ నెంబర్ కూడా ప్రారంభించింది. ఇదిలా ఉండగానే.. జగన్ సర్కార్ పేపర్‌లో ఇచ్చిన ఓ యాడ్‌పై ఇప్పుడు దుమారం మొదలయ్యింది. ఏపీలో ఇసుక స్టాక్ పాయింట్లు ఎక్కడెక్కడా ఉన్నాయో వివరాలతో హైదరాబాద్, తెలంగాణలో కూడా యాడ్ ఇవ్వడాన్ని టీడీపీ తప్పుబడుతోంది.

ఈ యాడ్ వ్యవహారంపై మాజీ మంత్రి, టీడీపీ జాతీయ ప్రధాన కార్యదర్శి నారా లోకేష్ స్పందించారు. ‘భవన నిర్మాణ కార్మికుల మరణాలు, ఆకలి కేకలను కూడా తనకు ఆదాయంగా మార్చుకుంటున్నారు జగన్ గారు. ఇసుక కొరత ఉన్న సమయంలో పక్క రాష్ట్రాలకు ఇసుక అమ్మే అవకాశం ఉండదు. అప్పుడు తెలంగాణ, గ్రేటర్ హైదరాబాద్ ఎడిషన్స్ లో యాడ్ ఎందుకు. అత్యధిక సర్క్యూలేషన్ కలిగిన పేపర్లకు కాకుండా సాక్షి తెలంగాణ, గ్రేటర్ హైదరాబాద్ ఎడిషన్స్ లో యాడ్స్ ఇవ్వడం ఏంటి? ప్రభుత్వ సొమ్ముని సాక్షికి మళ్లిస్తున్నారు అనడానికి ఇంతకన్నా ఉదాహరణ కావాలా’అంటూ ప్రశ్నించారు.

‘మీ పేపర్లో దొరుకుతున్న ఇసుక బయట ప్రజలకు దొరకడం లేదు జగన్ గారు. ఇసుక అక్రమార్కులపై ఉక్కుపాదం మోపుతాం అంటూ భారీగా ప్రకటనలు ఇస్తున్నారు. మీరు చెప్పిన టోల్ నెంబర్ నిజంగా పనిచేస్తే మీ పార్టీ ఇసుకాసురుల కోసం పక్క రాష్ట్రం జైళ్లు కూడా అద్దెకు తీసుకోవాలి. మీ నూతన ఇసుక పాలసీ వలన 50 మంది కార్మికులు బలైయ్యారు. నిర్మాణ రంగం పడకేసి 30 లక్షల మంది భవన నిర్మాణ కార్మికులు రోడ్డున పడ్డారు. ఇసుక రేటుని మీ నాయకులు పెంచుకుంటూ పోతున్నారు. మీ పత్రికలో ప్రకటనలకు కోసం వృధా అవుతున్న ప్రజాధనంతో భవన నిర్మాణ కార్మికులను ఆదుకుంటే సంతోషిస్తాం’అన్నారు లోకేష్.




Please Read Disclaimer