చంద్రయాన్-2 : విక్రమ్ ఆచూకీ తెలిసింది..

0

భారత అంతరిక్ష పరిశోధన సంస్థ (ఇస్రో) చంద్రుడి ఉపరితలంపై పరిశోధనలకు ప్రయోగించిన చంద్రయాన్-2 చివరి మెట్టుపై నిలిచిపోయిన విషయం తెలిసిందే. విక్రమ్ ల్యాండర్ చంద్రుడి ఉపరితలంపై దిగుతూ భూకేంద్రంతో సంబంధాలు తెగిపోయిన తర్వాత దాని ఆచూకీ తెలుసుకోడానికి ఇస్రో తీవ్రంగా ప్రయత్నించింది. ఈ విషయంలో అమెరికా అంతరిక్ష పరిశోధన సంస్థ నాసా కూడా రంగంలోకి దిగింది. విక్రమ్ జాడ కోసం గత రెండు నెలలుగా చేస్తున్న ప్రయత్నాలు ఎట్టకేలకు ఫలించాయి. చంద్రుడి ఉపరితలానికి అతి సమీపంలోకి వెళ్లి కూలిన విక్రమ్‌ ల్యాండర్‌ ఆచూకీని నాసా కనుగొంది. నాసాకు చెందిన లూనార్‌ రీకనైసాన్స్‌ ఆర్బిటర్‌ (ఎల్‌ఆర్‌వో) విక్రమ్‌ శకలాల వల్ల చంద్రుడి ఉపరితలంపై ప్రభావితమైన ప్రదేశాలను స్పష్టంగా గుర్తించింది.

ఈ మేరకు ఫోటోలను తీసిన ఎల్ఆర్వో.. చంద్రుడి ఉపరితలంపై కొన్ని కిలోమీటర్ల మేర విక్రమ్ ల్యాండర్ శకలాలు విస్తరించి రెండు డజన్ల ప్రదేశాల్లో పడ్డట్లు గుర్తించింది. షణ్ముగ సుబ్రహ్మణియన్‌ అనే వ్యక్తి విక్రమ్‌కు సంబంధించిన తొలి శకలాన్ని గుర్తించినట్టు నాసా పేర్కొంది. విక్రమ్‌ కూలిన ప్రదేశానికి వాయువ్య దిశలో 750 మీటర్ల దూరంలో శకలాన్ని శాస్త్రవేత్త షణ్ముగం గుర్తించారని, అనంతరం ఎల్‌ఆర్‌వో ప్రాజెక్టు బృందం ఇతర శకలాలను గుర్తించిందని నాసా తెలిపింది. చంద్రుడి దక్షిణ ధ్రువం మీదుగా అక్టోబర్ 14, 15, నవంబర్‌ 11న ఎల్‌ఆర్‌వో ప్రయాణించినప్పుడు తీసిన ఫోటోలు వీటిని ధ్రువీకరించినట్లు ప్రకటించింది.

నాసా ఎల్ఆర్‌వో తీసిన ఫోటోల్లో నీలి రంగులో ఉన్న చుక్కలు విక్రమ్ వల్ల ప్రభావితమైన చంద్రుడి ఉపరితలాన్ని.. ఆకుపచ్చ వర్ణంలో ఉన్న చుక్కలు విక్రమ్‌ శకలాల్ని సూచిస్తున్నాయి. ‘ఎస్‌’తో సూచించిన శకలం షణ్ముగం సుబ్రహ్మణియన్‌ కనిపెట్టింది. విక్రమ్‌ శకలాలు పడడానికి ముందు, పడిన తర్వాత చంద్రుడి ఉపరితలం ఎలా ఉందో కూడా నాసా చిత్రాలు విడుదల చేసింది.

వాస్తవానికి విక్రమ్‌ సాఫ్ట్‌ ల్యాండింగ్‌ కోసం ముందుగా నిర్దేశించిన ప్రాంతాన్ని ఎల్‌ఆర్‌వో సెప్టెంబరు 17నే తన కెమెరాల్లో బంధించింది. కానీ, ఆ ప్రాంతంలో అప్పటికి చీకటిగా ఉండడంతో ల్యాండర్‌ని కచ్చితంగా గుర్తించలేకపోయారు. ఫోటోలు తీసిన సమయానికి రాత్రివేళ కావడంతో విక్రమ్‌ దట్టమైన నీడలో ఉండే అవకాశం ఉందని అప్పట్లో ప్రకటించారు. అక్టోబర్‌లో రెండోసారి ఎల్‌ఆర్‌వో ప్రయాణించిన సమయానికి వెలుతురు ఉండటంతో విక్రమ్ జాడను కచ్చితంగా కనుగొనడానికి సాధ్యమైంది.

ఈ ఫోటోలను మరింత లోతుగా పరిశోధించి అవి విక్రమ్‌ శకలాలే అని నిర్ధరించుకున్న నాసా తాజాగా ఆ వివరాలను వెల్లడించింది. ఎల్ఆర్వో కెమెరా సెప్టెంబరు 17న తీసిన ఫోటోలను సెప్టెంబరు 26న విడుదల చేసింది. వీటిని సుబ్రమణ్యం సహా నాసా ఎల్ఆర్వో బృందం విశ్లేషించింది. అయితే, ఈ ఫోటోల్లో స్పష్టత లేకపోవడంతో విక్రమ్ ల్యాండర్ ఆచూకీ గుర్తించలేకపోయారు.


సెప్టెంబర్‌ 7న చంద్రుడి ఉపరితలంపై దిగుతూ చంద్రయాన్‌-2లోని విక్రమ్‌ ల్యాండర్ చివరి నిమిషంలో భూ కేంద్రంతో సంబంధాలు కోల్పోయిన విషయం తెలిసిందే. అప్పటి నుంచి విక్రమ్‌ జాడ తెలుసుకోడానికి ఇస్రోతో పాటు నాసా అనేక ప్రయత్నాలు చేస్తోంది. మరోవైపు విక్రమ్‌ చివరి క్షణంలో తప్పటడుగులు వేయడానికి గల కారణాలేంటో ఇస్రో ఇప్పటికే విశ్లేషించింది. సాఫ్ట్‌వేర్‌ సమస్య వల్లే ల్యాండింగ్‌లో లోపం తలెత్తిందని గుర్తించారు.




Please Read Disclaimer