జగన్ రెడ్డి.. కులాన్ని వదిలేయండి.. మతం మారాక కులం ఎందుకు?: పవన్ కళ్యాణ్

0

ఏపీ సీఎం వైఎస్ జగన్ టార్గెట్‌గా జనసేన అధినేత పవన్ కళ్యాణ్ మరోసారి ఘాటైన వ్యాఖ్యలు చేశారు. మానవత్వం నా మతం.. మాట నిలబెట్టుకోవడం నా కులం అని జగన్ చేసిన వ్యాఖ్యలకు జనసేనాని కౌంటర్ ఇచ్చారు. హిందూ ధర్మం నుంచి కులాలు వచ్చాయన్న ఆయన.. క్రిస్టియానిటీని అనుసరిస్తే.. కులం ప్రస్తావన రావొద్దన్నారు. కానీ మతం మారినా కులాలు మారడం లేదన్నారు. కులాలను కూడా వాడుకోవాలని చూస్తున్నారని జగన్‌పై పరోక్షంగా విమర్శలు గుప్పించారు. జగన్ రెడ్డికి సహనం లేదన్న పవన్.. క్రిస్టియానిటీ మీద నిజమైన విశ్వాసం ఉంటే చెట్టుకు కూడా హానీ చేయరన్నారు.

మతం మారాక కులం ఎందుకొచ్చింది?

మతం మారాక మీకు కులం ఎందుకు వచ్చింది జగన్? అని పవన్ కళ్యాణ్ ప్రశ్నించారు. నా పేరు వెనుక నాయుడు లేదన్న జనసేనాని.. దాన్ని వైసీపీ వాళ్లు తగిలించారన్నారు. రాజ్యాంగం ప్రకారం.. జగన్ రెడ్డి గారూ.. మతం మారాక కులాన్ని వదిలేయండని పవన్ సూచించారు. కులం కావాలి, మతం కావాలి, ఓట్లు కావాలి, డబ్బులు కావాలని జగన్‌ను ఉద్దేశించి వ్యాఖ్యానించారు.

నా మతం హిందూ మతం..

నా మతం హిందూ మతం అని చెప్పిన పవన్ కళ్యాణ్.. అన్ని మతాలను, ధర్మాలను సమానంగా గౌరవించాలని నా మతం చెబుతోందన్నారు. ‘నాకు ఎవరైనా ప్రసాదం ఇస్తే తింటాను. నా ధర్మం ముక్కోటి దేవతలు ఇచ్చింది. ఇంకొక దేవత వస్తే ఇబ్బంది పడదు. గల్ఫ్ దేశాలకు వెళ్లొచ్చిన చాలా మంది ముస్లింలు మన దేశం బాగుంటుందని అన్నార’ని పవన్ కళ్యాణ్ తెలిపారు.

హిందూ నాయకులే..

మతాలను విడగొట్టింది హిందూ నాయకులేనని పవన్ కళ్యాణ్ ఆరోపించారు. హిందూ నాయకులంటే బీజేపీ వాళ్లు కాదన్నారు. అన్ని కులాలను, అన్ని మతాలను సమానంగా ఆదరించాలన్నారు. ఏడు కొండలవాడి సన్నిధిలో చెబుతున్నా.. నేను ధర్మానికి కట్టుబడి ఉంటానని పవన్ తెలిపారు. తిరుపతిని గౌరవించాలన్న పవన్.. ఇక్కడ మత ప్రచారం జరపొద్దన్నారు. కడప దర్గాలో జై భవానీ అన్నా.. ఒప్పుకోనన్నారు. ఏ ధర్మానికి ఇవ్వాల్సిన గౌరవం.. ఆ ధర్మానికి ఇచ్చి తీరాలన్నారు.

శబరిమల వివాదంపై స్పందన

శబరిమల అయ్యప్ప ఆలయంలోకి మహిళ ప్రవేశం పట్ల కూడా పవన్ స్పందించారు. హిందూ ఆచారం ప్రకారం శబరిమల ఆలయంలోకి మహిళలు వెళ్లడం నిషిద్ధమన్నారు. విదేశీయురాలైన అయిన తన భార్యకు ఈ విషయం అర్థం కావడం కోసం.. చర్చికి వెళ్లినప్పుడు తానెందుకు ముసుగు వేసుకుందని అడిగానని చెప్పారు. అది మీ ఆచారమైతే ఇది హిందువుల ఆచారం అని చెప్పానన్నారు. శబరిమలలోకి మహిళల ప్రవేశం రెచ్చగొట్టాలని చేసేదని పవన్ అభిప్రాయపడ్డారు. ఆలయ సంప్రదాయాలను గౌరవించాలన్నారు. రాజ్యాంగం ఇచ్చిన స్వేచ్ఛను ఎవరూ దుర్వినియోగం చేయొద్దన్నారు.

వదలనిది ఏడుకొండల వాణ్ని మాత్రమే..

వైసీపీ నేతలు ఏడుకొండల వాడికి మాత్రమే రంగులు వేయడం లేదని పవన్ కళ్యాణ్ చురకలు అంటించారు. వైసీపీది రంగుల రాజ్యం అని జనసేనాని ఎద్దేవా చేశారు.

సింగపూర్‌లో..

సింగపూర్‌లో 80 శాతంపైగా చైనీస్, 7 శాతం తమిళులు, ఇతరులు ఉన్నారు. తమిళులు, సిక్కులు సింగపూర్ వదిలి వెళ్లాని ఓ చైనీస్ సంతతి కుర్రాడు గోడ మీద రాస్తే.. సింగపూర్ ప్రభుత్వం అతణ్ని శిక్షించింది. అందరూ సమానం అనేలా చట్టాలు ఉండాలని పవన్ సూచించారు.




Please Read Disclaimer